မန်စီးတီး သို့ ပေါင် ၅၉ သန်းဖြင့် ပြောင်းရွှေ့ရန် သဘောတူညီခဲ့တယ်ဆိုတဲ့ ကောလာဟလများကို ဖြေရှင်းလိုက်တဲ့ တီယာနီ ရိုင်ဂျင်ဒါ
အေစီမီလန် ကြယ်ပွင့် တီယာနီ ရိုင်ဂျင်ဒါက မီလန်မှ ထွက်ခွာပြီး မန်စီးတီးသို့ ပြောင်းရွှေ့ရန် ပြင်ဆင်နေပါတယ်ဆိုတဲ့ ခန့်မှန်းချက်များကြား သူ့ရဲ့ ရပ်တည်ချက်ကို ထုတ်ဖော်ပြောကြားခဲ့ပါတယ်။
မန်စီးတီးဟာ ရိုင်ဂျင်ဒါအတွက် ပေါင် ၅၉ သန်း (ယူရို သန်း ၇၀ /ဒေါ်လာ သန်း ၈၀) ဖြင့် သဘောတူညီမှု ရရှိခဲ့ကြောင်း သတင်းများက ဖော်ပြထားပါတယ်။ပက် ဂွါဒီယိုလာ ရဲ့ အသင်းဟာ ပြီးခဲ့တဲ့ ရာသီကုန်တွင် ကီဗင် ဒီဘရိုင်း နှုတ်ဆက်ခဲ့ပြီးနောက် အီလ်ကေး ဂန်ဒိုဂန်ရဲ့ ကစားသမားဘဝကလည်း ပြီးဆုံးမှာဖြစ်သဖြင့် ကွင်းလယ်ကို အားဖြည့်ရန် စိတ်အားထက်သန်နေပါတယ်။ ရိုင်ဂျင်ဒါဟာ လက်ရှိတွင် နယ်သာလန်လက်ရွေးစင်အဖြစ် နိုင်ငံတကာပွဲများ ကစားနေပြီး ကလပ်နှစ်သင်း ဆွေးနွေးနေကြကြောင်း အတည်ပြုခဲ့ပါတယ်။
ရိုင်ဂျင်ဒါဟာ ပြီးခဲ့တဲ့ ရာသီက မီလန်အတွက် ခက်ခဲတဲ့ ရာသီတွင် ပြိုင်ပွဲအားလုံး၌ ၁၅ ဂိုး သွင်းယူခဲ့ပါတယ်။ နေရာစုံကစားနိုင်တဲ့ ဒတ်ချ်လူမျိုးကို စီးရီးအေ ရဲ့ ရာသီအလိုက် အကောင်းဆုံး ကွင်းလယ်လူအဖြစ် ရွေးချယ်ခံခဲ့ရပြီး ဂွါဒီယိုလာရဲ့ မျက်စိကျခြင်းကို ခံခဲ့ရပါတယ်။ အတွင်းပိုင်း သို့မဟုတ် ရှေ့တန်းတွင် ပိုမို ကစားနိုင်တဲ့ ရိုင်ဂျင်ဒါဟာ ၂၀၂၄-၂၅ ရာသီတွင် စွမ်းဆောင်ရည် ကျဆင်းခဲ့ပြီးနောက် တိုးတက်ရန် ရည်ရွယ်နေတဲ့ မန်စီးတီးအသင်းအတွက် ကောင်းမွန်စွာ လိုက်ဖက်မယ့်သူ ဖြစ်နေပါတယ်။
Voetbal International သို့ သူက "ကလပ်တွေက ဆွေးနွေးနေတုန်းပါပဲ။ ကျွန်တော့်အတွက်တော့ အခုက စောင့်ဆိုင်းရမယ့် ကိစ္စပါပဲ။ ကျွန်တော် ကိုယ်တိုင် ပါဝင်မှု နည်းပါတယ်။ ကျွန်တော့်အဖေက လုပ်ပေးတာပါ။ ပရီးမီးယားလိဂ်ကတော့ တကယ့်ကို ကောင်းမွန်တဲ့ ပြိုင်ပွဲတစ်ခုပါ၊ အဲဒါက ကလေးဘဝကတည်းက အိပ်မက်မက်ခဲ့တာပါပဲ။ ဂွါဒီယိုလာနဲ့တော့ အဆက်အသွယ် မရသေးပါဘူး၊ အဲဒါက အစီအစဉ်ထဲမှာ မပါသေးပါဘူး" လို့ ပြောပါတယ်။
မန်စီးတီးသို့ ပြောင်းရွှေ့ခြင်းဟာ ရိုင်ဂျင်ဒါအား ပရီးမီးယားလိဂ် ကလပ်တွင် နယ်သာလန် အသင်းဖော် နေသန် အေကီ နှင့် ပူးပေါင်းခွင့်ရစေမည်ဖြစ်ပြီး နှစ်ဦးသား အတူတူ ကစားနိုင်ခြေကို ဆွေးနွေးခဲ့ကြပါတယ်။ သူက ထပ်လောင်းပြောကြားရာမှာ "ဒီမှာ သူ့ကို အဲဒါနဲ့ပတ်သက်ပြီး အတိုချုံး ပြောခဲ့ပြီးပါပြီ။ ကျွန်တော် အဲဒီဘက်ကို လာရင် သူ သဘောကျမှာပါ။ ဒါပေမယ့် အဲဒီလောက်အဆင့်ထိတော့ မရောက်သေးပါဘူး"
ရိုင်ဂျင်ဒါဟာ ဂွါဒီယိုလာက သူ့ရဲ့ ကစားသမားအင်အားစုကို အသစ်ပြင်ဆင်နေသည်နှင့်အမျှ မန်စီးတီးသို့ ဦးတည်နေပုံရပါတယ်။ ထိုအတောအတွင်း သူဟာ ဖင်လန် ၊ မော်လ်တာ တို့နှင့် ကမ္ဘာ့ဖလား ခြေစစ်ပွဲများတွင် နယ်သာလန်အတွက် ပါဝင်ကစားရမှာ ဖြစ်ပါတယ်။
