အင်္ဂလန်လက်ရွေးစင်အသင်းအတွက် ပွဲထွက်ခွင့်ရရှိဖို့စောင့်ဆိုင်းနေရမှုကို အဆုံးသတ်ပြီး လတ်ဗီးယားရဲ့ခံစစ်ပိုင်းကိုဖြိုခွဲနိုင်ခဲ့တဲ့ အံ့အားသင့်လောက်စရာဖရီးကစ်သွင်းဂိုးအတွက် ရီစီဂျိမ်းစ် အံ့သြမင်သက်နေခဲ့ပါတယ်။ ၂၀၂၃ ခုနှစ်၊ မတ်လ အီတလီနဲ့ရင်ဆိုင်ရတဲ့ပွဲစဉ်မှာ အင်္ဂလန်အတွက် နောက်ဆုံးအကြိမ်ပါဝင်ကစားခဲ့တဲ့ ရီစီဂျိမ်းစ်က ပြီးခဲ့တဲ့သောကြာနေ့၊ အယ်လ်ဘေးနီးယားနဲ့ပွဲစဉ်ကို အရန်ခုံတန်းမှတဆင့် ပါဝင်လာခဲ့ပြီးနောက် လတ်ဗီးယားကိုသုံးဂိုးပြတ်အနိုင်ရရှိတဲ့ပွဲစဉ်အတွက် ပွဲထွက်ကစားသမားအဖြစ် သွင်းဂိုးလည်း ရယူနိုင်ခဲ့ပါတယ်။ 

ပထမပိုင်းပွဲချိန်အတွင်း အံ့အားသင့်လောက်စရာဖရီးကစ်ကန်ချက်မှတဆင့် ရီစီဂျိမ်းစ် အောင်ပွဲခံနိုင်ခဲ့ပြီး သူ့ရဲ့ကန်ချက် ဂိုးဝင်သွားလို့ အံ့သြမင်သက်မိတယ်လို့ ဝန်ခံပြောဆိုခဲ့ပါတယ်။ ဒဏ်ရာပြဿနာတွေနဲ့အတူ ရုန်းကန်ခဲ့ရပြီး အင်္ဂလန်လက်ရွေးစင်အသင်းနဲ့အဆက်ပြတ်နေခဲ့တဲ့ ရီစီဂျိမ်းစ်က ချဲလ်ဆီးနည်းပြဟောင်းတူချယ်လက်ထက်မှာတော့ လက်ရွေးစင်အသင်းဆီ ပြန်လည်ရောက်ရှိလာခဲ့ပါတယ်။ သူသာ ကြံ့ခိုင်မှုပြည့်ဝနေမယ်ဆိုရင် တနင်္လာနေ့သွင်းဂိုးက ပုံမှန်ပွဲထွက်ခွင့်ရရှိဖို့အတွက် အာမခံပေးပါလိမ့်မယ်။

ITV Sport နဲ့တွေ့ဆုံချိန် ရီစီဂျိမ်းစ်က “ အချိန်တွေလည်း အတော်လေးကြာမြင့်သွားခဲ့ပါတယ်။ ကျွန်တော့်အတွက်တော့ စိတ်ပျက်စရာနှစ်နှစ်တာကာလပါပဲ။ လက်ရွေးစင်အသင်းမှာ ပြန်အရွေးချယ်ခံရလို့ ဝမ်းသာမိပါတယ်။ ပြိုင်ဘက်ရဲ့ခံစစ်လူတံတိုင်းကို မြင်တွေ့ပြီးနောက် ဝေ့ဝိုက်ကန်သွင်းနိုင်မယ်လို့ ခံစားမိပါတယ်။ ဂိုးပေါက်ဆီ ဘောလုံးဝင်သွားလို့ နည်းနည်းတော့အံ့သြမိခဲ့ပါတယ်။ တူချယ်ရဲ့အတွေးအခေါ်တွေကတော့ ရှင်းလင်းပါတယ်။ ကျွန်တော်တို့မှာ ရည်မှန်းချက်တစ်ခုရှိပြီး ဒါကို ကမ္ဘာ့ဖလားမတိုင်ခင် အခုသီတင်းပတ်မှာ စတင်လိုက်ပါပြီ”လို့ ပြောပါတယ်။

ရီစီဂျိမ်းစ်က လာမယ့်အင်္ဂါနေ့၊ တော့တင်ဟမ်နဲ့ရင်ဆိုင်ရမယ့် စတမ်းဖို့ဒ်ဘရစ်ချ်ပရီးမီးယားလိဂ်ပွဲစဉ်အတွက် ချဲလ်ဆီးဆီ ပြန်လည်ပူးပေါင်းသွားပါလိမ့်မယ်။အင်္ဂလန်လက်ရွေးစင်အသင်းကတော့ လာမယ့်ဇွန်လမှာ အန်ဒိုရာနဲ့ ကမ္ဘာ့ဖလားခြေစစ်ပွဲစဉ်၊ ဆီနီဂေါနဲ့ ခြေစမ်းပွဲစဉ်တွေကို ယှဉ်ပြိုင်ကစားရပါမယ်။