အာဆင်နယ်ဂိုးသမား ဒေးဗစ်ရာယာက အာဆင်နယ်အနေနဲ့ ဖလားရရှိဖို့ဆိုတာ အချိန်တစ်ခုသာ လိုတော့ကြောင်း ယုံကြည်ချက်အပြည့်နဲ့ ပြောကြားခဲ့ပါတယ်။အလားတူ စပိန်သားက ချန်ပီယံလိဂ် ကွာတားဖိုင်နယ်မှာ ရီးရဲလ်မက်ဒရစ်နဲ့ ရင်ဆိုင်ရမယ့်ပွဲအတွက် စိတ်လှုပ်ရှားနေကြောင်း ပြောဆိုခဲ့ပါတယ်။ ၂၀၂၃ ခုနှစ် နွေရာသီမှာ အာဆင်နယ်အသင်းကို ရောက်ရှိလာတဲ့ စပိန်လက်ရွေးစင်ဟာ အသင်းနဲ့အတူ ဖလားတစ်လုံးမှ မရသေးပါဘူး။

ပရီးမီးယားလိဂ်ဖလားကတော့ လီဗာပူးနဲ့ ၁၂ မှတ်အကွာမှာရှိနေတာကြောင့် အိပ်မက်တစ်ခုလိုဖြစ်နေပြီး၊ အက်ဖ်အေဖလားနဲ့ ကာရာဘောင်ဖလားတို့ကလည်း ထွက်ခွာခဲ့ရတာကြောင့် ချန်ပီယံလိဂ်ဖလား အာဆင်နယ်အတွက်ဖလားရရှိဖို့ တစ်ခုတည်းသာ အခွင့်အရေးဖြစ်လာပါတယ်။ ချန်ပီယံလိဂ်မှာ လက်ရှိချန်ပီယံ ရီးရဲလ်မက်ဒရစ်နဲ့ ကွာတားဖိုင်နယ်မှာ ရင်ဆိုင်ရမှာဖြစ်ပေမယ့် ရာယာကတော့ အာဆင်နယ်ရဲ့ အလားအလာနဲ့ပတ်သက်ပြီး ရေရှည်မှာရော၊ လက်ရှိမှာပါ အကောင်းမြင်နေပါတယ်။

ရာယာက "ဒီမှာရှိရတာ အရမ်းကောင်းပါတယ်။ ဒါဟာ အရမ်းကောင်းတဲ့ကလပ်တစ်ခုဖြစ်ပြီး အသင်းကလည်း မယုံနိုင်စရာကောင်းပါတယ်။ ကျွန်တော်တို့က အတူတူ အောင်မြင်မှုတွေရရှိဖို့အတွက် မှန်ကန်တဲ့လမ်းကြောင်းပေါ်မှာ ရောက်နေတယ်လို့ ထင်ပါတယ်။ ဒါက ဘယ်အချိန်မှာ ဖြစ်လာမလဲဆိုတာကတော့ အချိန်စောင့်ရုံသက်သက်ပါပဲ"လို့ ပြောပါတယ်။

ရာယာက ချန်ပီယံလိဂ်ပွဲအတွက် အသင်းရဲ့ စိတ်အားထက်သန်မှုကို အလေးပေးပြောကြားခဲ့ပါတယ်။ "လူတိုင်းက ချန်ပီယံလိဂ်ဖလားကို လိုချင်ကြပြီး ဘယ်လောက်ခက်ခဲတယ်ဆိုတာလည်း လူတိုင်းသိကြပါတယ်။ ဒါပေမဲ့ ကျွန်တော်တို့က အရမ်းကို စိတ်လှုပ်ရှားနေပါတယ်။ အခုဆိုရင် ရီးရဲလ်မက်ဒရစ်နဲ့ ကစားရမှာဖြစ်တဲ့ စိန်ခေါ်မှုကြီးတစ်ခု ရှိနေပါတယ်။ ဒါပေမဲ့ ဒါက ငယ်ငယ်ကတည်းက ကစားချင်ခဲ့တဲ့ ပွဲမျိုးဖြစ်ပြီး၊ လူတိုင်းက ကစားချင်တဲ့ပွဲမျိုးဖြစ်တာကြောင့် အရမ်းကို စိတ်လှုပ်ရှားနေပါတယ်"လို့ ရာယာက ဆိုပါတယ်

ဒေးဗစ်ရာယာရဲ့ ယုံကြည်ချက်အပြည့်နဲ့ ပြောဆိုမှုတွေအရ အာဆင်နယ်အသင်းဟာ ဖလားလက်မဲ့ဖြစ်နေတာကို အဆုံးသတ်နိုင်တော့မယ်လို့ ယုံကြည်မှုရှိနေပြီး ဥရောပဘုရင် ရီးရဲလ်မက်ဒရစ်ကို ကျော်လွှားရမယ့် စိန်ခေါ်မှုကြီးကို ရင်ဆိုင်ရဦးမှာ ဖြစ်ပါတယ်။