လွန်ခဲ့တဲ့တနင်္ဂနွေနေ့ညပိုင်း၊ မာဆေးလ်ကို အိမ်ကွင်းမှာ ၃-၁ ဂိုးဖြင့် အနိုင်ယူပြီးနောက် ပီအက်စ်ဂျီအနေဖြင့် အခုဘောလုံးရာသီမှာ ရရှိနိုင်သမျှဆုဖလားတိုင်းကို အရယူသွားနိုင်ဖို့ ရည်မှန်းထားတယ်လို့ နည်းပြလူးဝစ်အင်းနရစ်က ပြောခဲ့ပါတယ်။

အခုနိုင်ပွဲနဲ့အတူ လက်ရှိချန်ပီယံတွေက လီဂူးဝမ်းအမှတ်ပေးဇယားထိပ်ဆုံးနေရာမှာ ၁၉ မှတ်ဖြတ် ဦးဆောင်လာခဲ့ပြီး ရှစ်ပွဲကစားရဖို့ကျန်ရှိချိန် လိဂ်ရှုံးပွဲမရှိမှတ်တမ်းကိုလည်း ဆက်လက်ကိုင်စွဲထားနိုင်ခဲ့ပါတယ်။ အခုလိုအမှတ်ကွာဟမှုက ပီအက်စ်ဂျီကို ခြောက်မှတ်လောက်ထပ်ရှာဖွေနိုင်ရင် လိဂ်ချန်ပီယံဖြစ်လာမယ်ဆိုတဲ့ အာမခံချက်တစ်ခု ပေးလာခဲ့ပါတယ်။

ဒါ့အပြင် အခုသီတင်းပတ်အတွင်း ပြင်သစ်ချန်ပီယံတွေက ဥရောပအဆင့်မှာ နာမည်ကြီးလီဗာပူးကို ဖြုတ်ချကာ ချန်ပီယံလိဂ်ကွာတားဖိုင်နယ်အဆင့်ဆီ တက်လှမ်းနိုင်ခဲ့ပါတယ်။ ပြီးခဲ့တဲ့ဇန်နဝါရီလအတွင်း Trophee des Champions ဆုဖလားဆွတ်ခူးထားနိုင်တဲ့ ပီအက်စ်ဂျီက ပြင်သစ်ဖလားပြိုင်ပွဲမှာလည်း ဆီမီးဖိုင်နယ်အဆင့်တက်လှမ်းထားသလို လာမယ့်ဇွန်လမှာကျင်းပမယ့် ကလပ်ကမ္ဘာ့ဖလားပြိုင်ပွဲကိုလည်း ဝင်ရောက်ယှဉ်ပြိုင်ခွင့် ရရှိထားပါတယ်။

သတင်းထောက်တွေနဲ့တွေ့ဆုံချိန် လူးဝစ်အင်းနရစ်က “ ကျွန်တော်တို့အတွက် ထူးခြားတဲ့သီတင်းပတ်တစ်ခု ဖြစ်ခဲ့ပါတယ်။ မာဆေးလ်ကစားသမားတွေရော၊ ပီအက်စ်ဂျီကစားသမားတွေပါ ဂန္တဝင်မြောက်ယှဉ်ပြိုင်မှုတစ်ခုအတွက် အမြဲလိုလိုစိတ်အားတက်ကြွနေပါတယ်။ ပြီးတော့ ဒီညမှာ ကျွန်တော်တို့ကိုယ်တိုင်လည်း ကောင်းမွန်တဲ့စမ်းဆောင်ရည်တစ်ခု ချပြနိုင်ခဲ့တယ်လို့ ထင်ပါတယ်။ မာဆေးလ်ဆီကနေ ဘောလုံးလုယူဖို့ဆိုတာ ပီအက်စ်ဂျီလိုအသင်းအတွက်တောင် ခက်ခဲလွန်းပါတယ်။ နည်းပြနှစ်ဦးလုံးကလည်း သူတို့အသင်းတွေကို ကိုယ့်ပုံစံအတိုင်း ကစားစေဖို့ ကြိုးစားခဲ့ပါတယ်။ လီဗာပူးနဲ့ပွဲစဉ်အပြီး ကျွန်တော်တို့အတွက် ဂန္တဝင်မြောက်ပွဲစဉ်တစ်ခုကစားဖို့ အခွင့်အရေးရှိခဲ့ကာ ကိုယ့်ရဲ့စွမ်းဆောင်ရည်ကောင်းကို ပုံမှန်အတိုင်းထိန်းထားနိုင်ခဲ့ပါတယ်။

ကျွန်တော်ကတော့ အလွန်ပျော်ရွှင်နေပါတယ်။ အသင်းနဲ့ ပရိသတ်တွေလည်း အလားတူပါပဲ။ ကျွန်တော်တို့ရဲ့ ရည်မှန်းချက်က လီဂူးဝမ်းမှာ ဗိုလ်စွဲဖို့၊ ဆုဖလားတိုင်းကို ဆွတ်ခူးသွားနိုင်ဖို့ပဲ ဖြစ်ပါတယ်။ ကျွန်တော်တို့အတွက် ကြီးမားတဲ့စိန်ခေါ်မှုတွေ စောင့်ကြိုနေပါပြီ။ ကိုယ်လိုချင်တာကို အရယူနိုင်ဖို့ နေ့စဉ်နေ့တိုင်း အလုပ်ကို ပြင်းပြင်းထန်ထန် ကြိုးစားနေပါတယ်”လို့ ပြောပါတယ်။

ပီအက်စ်ဂျီက မတ် ၂၉ ရက်မှာ လီဂူဝမ်းပွဲစဉ်အဖြစ် စိန့်အက်တီယန်နဲ့ ယှဉ်ပြိုင်ကစားပြီးနောက် ဧပြီ ၁ ရက်မှာ လီဂူတူးကလပ် Dunkerque နဲ့ ပြင်သစ်ဖလားဆီမီးဖိုင်နယ်အဝေးကွင်းပွဲစဉ် ဆင်နွှဲရပါမယ်။