ဘာစီလိုနာအသင်းဟာ ရာယို ဗယ်လီကာနိုနဲ့ပွဲစဉ်မှာ ၁-၁ ဂိုး သရေကျခဲ့ပြီးနောက် ကွင်းလယ်လူ ပက်ဒရီက VAR ပြဿနာတွေနဲ့ ပတ်သက်ပြီး လာလီဂါအဖွဲ့ချုပ်ကို ‘ပိုပြီး လေးနက်မှုရှိဖို့’ တိုက်တွန်းပြောကြားလိုက်ပါတယ်။

ပြီးခဲ့တဲ့ ရက်သတ္တပတ်က ရာယိုအသင်းနဲ့ ၁-၁ ဂိုးသရေကျခဲ့တဲ့ပွဲစဉ်မှာ VAR စနစ် ချို့ယွင်းမှုတွေ ဖြစ်ခဲ့တာကြောင့် ဘာစီလိုနာရဲ့ ရှုံးပွဲမရှိ စံချိန် ရပ်တန့်ခဲ့ရပါတယ်။ ပွဲစဉ်အတွင်းမှာ ကစားသမားတွေကို VAR ရှိတယ် VAR မရှိတော့ဘူး စတဲ့ ပြောဆိုမှုတွေက ရှုပ်ထွေးမှုနဲ့ စိတ်ပျက်စရာတွေကို ဖြစ်စေခဲ့ပြီး အသင်းနှစ်သင်းလုံးကို ကွင်းအတွင်း ဆုံးဖြတ်ချက်တွေနဲ့ပတ်သက်လို့ မသေချာမှုတွေ ဖြစ်စေခဲ့ပါတယ်။

ဘာစီလိုနာအသင်းရဲ့ ကွင်းလယ်မှာ အဓိကနေရာကနေ ကစားပေးနေတဲ့ ပက်ဒရီကတော့ အခုလိုမျိုး ခေတ်သစ်ဘောလုံးရဲ့ အဓိကအစိတ်အပိုင်းကို ကိုင်တွယ်တဲ့နေရာမှာ လာလီဂါရဲ့ ပရော်ဖက်ရှင်နယ်ဆန်မှုအပေါ် မေးခွန်းထုတ်ခဲ့ပြီး သူ့ရဲ့ဒေါသတွေကို ထုတ်ဖော်ခဲ့ပါတယ်။ ပြီးခဲ့တဲ့ရာသီကတည်းက တသတ်မတ်တည်း မရှိတဲ့ ကွင်းလယ်ဒိုင်တွေရဲ့ ပြဿနာတွေကြောင့် ကလပ်အများအပြားရဲ့ ဝေဖန်မှုတွေကို ခံထားရပြီးသားပါ။ အခု ပက်ဒရီရဲ့ ဝေဖန်မှုကတော့ VAR စနစ်နဲ့ပတ်သက်လို့ တစ်သမတ်တည်း မရှိတာတွေအပေါ် လာလီဂါရဲ့ စိတ်ပျက်စရာကောင်းတဲ့ အခြေအနေကို ပိုပြီး ပေါ်လွင်စေခဲ့ပါတယ်။ ဘာစီလိုနာအသင်းအနေနဲ့ ဒီလိုမျိုး ပွဲတွေကနေ အမှတ်ဆုံးရှုံးရတာဟာ ရာသီအကုန်မှာ ချန်ပီယံဆုအတွက် အဆုံးအဖြတ်ပေးနိုင်ပါတယ်။

ပက်ဒရီက Onda Cero နဲ့ အင်တာဗျူးတစ်ခုမှာ ‘အစပိုင်းမှာ VAR မရှိဘူးလို့ ပြောခဲ့ကြတယ်။ ပွဲအလယ်လောက်ကျတော့ VAR ရှိတယ်လို့ ပြောလာကြတယ်။ အဲဒီနောက်တော့ မရှိဘူးလို့ ပြန်ပြောတယ်။ ခင်ဗျားတို့ ဘယ်အချိန်မှာ VAR ရှိတယ်ဆိုတာ မသိခဲ့ရဘူး။ ဒီလို VAR အလုပ်မလုပ်တဲ့ပွဲမျိုးကို ပထမဆုံးအကြိမ် တွေ့ဖူးတာမို့ အရမ်းထူးဆန်းနေတယ်။ လာလီဂါ ပိုပြီး လေးနက်မှုရှိဖို့ လိုအပ်တယ်လို့ ထင်ပါတယ်။ ကွင်းလယ်ဒိုင်က အသင်းခေါင်းဆောင်တွေကို VAR ရှိလား မရှိလား ပြောပြလေ့ရှိပြီး ဖရန်ကီက ကျွန်တော်တို့ကို ပြန်ပြောပြပေးရပါတယ်’ လို့ ပြောထားပါတယ်။

ပက်ဒရီကတော့ နောက်လာမယ့် ဘူလ်ဂေးရီးယား၊ တူရကီတို့နဲ့ပွဲစဉ်တွေအတွက် စပိန်လက်ရွေးစင်အသင်းနဲ့ ပူးပေါင်းရမှာပဲ ဖြစ်ပါတယ်။ နည်းပြ ဖလစ်ခ်က သူ့ရဲ့ ကွင်းလယ်စွမ်းရည်တွေကို ဆက်လက် အားထားနေတာကြောင့် အသက် ၂၂ နှစ်အရွယ် ကစားသမားဟာ အသင်းရော လက်ရွေးစင်အသင်းအတွက်ပါ လာမယ့်ရက်သတ္တပတ်တွေမှာ အဓိကနေရာကနေ ပါဝင်လာဖွယ်ရှိနေပါတယ်။