အန်ကွန်ကူဟာ ယခုလတွင် ဘိုင်ယန်မြူးနစ် နှင့်ယူနိုက်တက် နှစ်ဦးစလုံးရဲ့ စိတ်ဝင်စားမှုကို ရရှိထားပြီး ပြီးခဲ့တဲ့ရာသီတုန်းကလည်း မာရက်စ်ကာ လက်အောက်တွင် ပုံမှန်ကစားခွင့် မရရှိခဲ့တာဖြစ်ပါတယ်။ ဂါနာချိုအတွက် သဘောတူညီချက်ရရန် ချဲလ်ဆီး နှင့် ညှိနှိုင်းဆွေးနွေးနေစဉ် ယူနိုက်တက်ဟာ အန်ကွန်ကူရဲ့ အခြေအနေကို မေးမြန်းခဲ့ပါတယ်။  

ချဲလ်ဆီးဟာ အန်ကွန်ကူကို ၂၀၂၃ ခုနှစ်တွင် လိုက်ပ်ဇစ်မှ ပေါင် ၅၂ သန်းဖြင့် ဝယ်ယူခဲ့ပြီး ယခုအခါ အသက် ၂၇ နှစ်အရွယ် ကစားသမားအတွက် ပေါင် ၆၅ သန်း တောင်းဆိုနေတာဖြစ်ပါတယ်။ အန်ကွန်ကူဟာည် ယခုလတွင် ယူနိုက်တက်သို့ ပူးပေါင်းရန် စိတ်ဝင်စားကြောင်း သိရသော်လည်း ရိုမန်နိုရဲ့ သတင်းအရ ပြင်သစ် တိုက်စစ်မှူးဟာ အပြီးသတ် အပြောင်းအရွှေ့ သို့မဟုတ် အပြီးသတ်ဝယ်ယူရန် ပါဝင်တဲ့ အငှားစာချုပ်ကိုသာ လိုလားကြောင်း သိရပါတယ်။

တစ်ချိန်တည်းမှာပင် The Athletic ရဲ့သတင်းအရ ချဲလ်ဆီးဟာ လာမယ့် တနင်္လာနေ့ ဇန်နဝါရီ လွှဲပြောင်းကာလ ကုန်ဆုံးချိန်မတိုင်မီ အန်ကွန်ကူ ထွက်ခွာမှာကို မမျှော်လင့်ထားတာဖြစ်ပါတယ်။ ဘိုင်ယန်မြူးနစ်ကလည်း ယခုတွင် အန်ကွန်ကူ အား စိတ်ဝင်စားကြောင်း ကြေညာခဲ့သော်လည်း ဘွန်ဒက်စ်လီဂါကလပ်ပါဝင်မယ့် အနေအထားက မက်သီတယ်ရဲ့ ထွက်ခွာမှုအပေါ် မူတည်နေပါတယ်။ 
 
ချဲလ်ဆီးဟာ မက်သီတယ်အတွက် သဘောတူညီချက်ရရန် ဘိုင်ယန်မြူးနစ် နှင့် ဆွေးနွေးမှုများ ပြုလုပ်ခဲ့သော်လည်း ယခင်ရာသီ ဘွန်ဒက်စ်လီဂါတွင် ၂ ပွဲသာ စတင်ကစားခွင့်ရထားတဲ့ အသက် ၁၉ နှစ်အရွယ် ကစားသမားကတော့ ဂျာမန်ကလပ်နှင့်ပဲ ဆက်လက်ရှိနေလိုကြောင်း ပြောထားပါတယ်။ အခြားတစ်ဖက်တွင် ချဲလ်ဆီးဟာ ဂျာအိုဖီးလစ်အတွက် ဗီလာနှင့် ဆွေးနွေးမှုများ ပြုလုပ်နေပြီး ပေါ်တူဂီသားကလည်း ယခင်ရာသီ မာရက်စ်ကာရဲ့ လက်အောက်တွင် ကစားခွင့် နည်းပါးခဲ့တာဖြစ်ပါတယ်။  

ဗီလာဟာ ဖီးလစ်ကို ယခင်နှစ်က ဝယ်ယူရန် ကြိုးစားခဲ့သော်လည်း နောက်ဆုံးတွင် ပေါ်တူဂီသားက ပေါင် ၄၆.၃ သန်းဖြင့် ချဲလ်ဆီး သို့ ပြောင်းသွားခဲ့တာဖြစ်ပါတယ်။ ဗီလာဟာ ဒီဆာဆီရဲ့ အငှားစာချုပ်အတွက် ချဲလ်ဆီး နှင့် နီးစပ်စွာ ဆွေးနွေးနေပြီး ပြင်သစ်ခံစစ်မှူးဟာ အမ်မရီရဲ့ အသင်းသို့ ပြောင်းရွှေ့ရန် သဘောတူထားပြီဖြစ်ကြောင်း သိရပါတယ်။