တနင်္ဂနွေနေ့ညကယှဉ်ပြိုင်ခဲ့တဲ့ ကာရာဘောင်ဖလား ဗိုလ်လုပွဲစဉ်မှာ နယူးကာဆယ်ဟာ လီဗာပူးကို ၁-၂ နဲ့အနိုင်ယူပြီး နှစ်ပေါင်း ၇၀ အတွင်း ပထမဆုံးအကြိမ်အဖြစ် ပြည်တွင်းဆုဖလားအောင်မြင်မှုကို ပြန်လည်ဆွတ်ခူးနိုင်ခဲ့ပါတယ်။ 

ဝင်ဘလေမှာကျင်းပခဲ့တဲ့ ယခုပွဲစဉ်ကို ပရိသတ်ပေါင်း ၉ သောင်းခန့်အထိလာရောက်ကြည့်ရှုအားပေးခဲ့ကြပြီး ပွဲအပြီးမှာတော့ နယူးကာဆယ်ပရိသတ်တွေက အသင်းနဲ့အတူအောင်ပွဲခံနိုင်ခဲ့ကြတာဖြစ်ပါတယ်။ နယူးကာဆယ်ဟာ ဥရောပဖလားအောင်မြင်မှုကို ၁၉၆၉ ခုနှစ်မှာ နောက်ဆုံးအကြိမ်အဖြစ် ဆွတ်ခူးရရှိခဲ့သေးပေမယ့် ပြည်တွင်းဆုဖလားအောင်မြင်မှုကိုတော့ ၁၉၅၅ ခုနှစ် အက်ဖ်အေဖလားအောင်မြင်မှုရရှိပြီးနောက် ယခုအခါမှာပဲ ပထမဆုံးအကြိမ် ပြန်လည်ရရှိခဲ့တာဖြစ်ပါတယ်။

ပြီးခဲ့တဲ့ရာသီက ကာရာဘောင်ဖလားကိုဆွတ်ခူးထားခဲ့တဲ့ လက်ရှိချန်ပီယံလီဗာပူးဟာ ယခုနှစ်ပြိုင်ပွဲမှာလည်း ဗိုလ်စွဲဖို့အတွက် အပြတ်အသတ်ရေပန်းစားခဲ့ပေမယ့် နယူးကာဆယ်ကတော့ နိုင်ပွဲရရှိအောင်စွမ်းဆောင်နိုင်ခဲ့တာဖြစ်ပါတယ်။လီဗာပူးနဲ့နယူးကာဆယ်တို့ဟာ ပြီးခဲ့တဲ့လက ပရီးမီးယားလိဂ်မှာထိပ်တိုက်တွေ့ဆုံခဲ့ပြီး ထိုစဉ်ကတော့ လီဗာပူးက ၂-၀ နဲ့ဂိုးပြတ်အနိုင်ယူထားခဲ့တာဖြစ်ပါတယ်။ 

သို့သော်လည်း ယခုပွဲစဉ်မှာတော့ နယူးကာဆယ်က လီဗာပူးကိုအသာစီးရအောင်ကစားနိုင်ခဲ့ပြီး ဦးဆောင်ဂိုး ၂ ဂိုးသွင်းယူကာ ဝင်ဘလေမှာ ၂ ဂိုးပြတ်အထိဦးဆောင်နိုင်ခဲ့ပါတယ်။ နယူးကာဆယ်အတွက်ဂိုးတွေကို ပထမပိုင်းပြီးကာနီးမှာ ဒန်နီယယ်ဘန်းနဲ့ ဒုတိယပိုင်းအစမှာ အီဆက်တို့က သွင်းယူပေးခဲ့ပြီး လီဗာပူးအတွက် နှစ်သိမ့်ချေပဂိုးကိုတော့ ပွဲပြီးကာနီးအချိန်ပိုမိနစ်မှာ ချီဆာက သွင်းယူခဲ့တာဖြစ်ပါတယ်။ 

ပွဲအပြီးမှာ ၂၀၀၈ ခုနှစ် ပြည်တွင်းဖလားနောက်ဆုံးအကြိမ်ဆွတ်ခူးနိုင်ခဲ့တဲ့ ဟယ်ရီရက်နပ်နောက်ပိုင်း ပထမဆုံးအကြိမ်ပြည်တွင်းဖလားကိုဆွတ်ခူးနိုင်တဲ့ အင်္ဂလိဂ်နည်းပြဖြစ်လာခဲ့တဲ့ အက်ဒီဟိုဝီက သူ့အနေနဲ့ ဒီဆုဖလားအောင်မြင်မှုအတွက် အလွန်စိတ်လှုပ်ရှားမိကြောင်း ပြောကြားခဲ့ပါတယ်။ 

အင်္ဂလန်သားနည်းပြက "ကျွန်တော်တို့အနေနဲ့ နယူးကာဆယ်မှာရှိနေတဲ့လူတွေနဲ့ ပရိသတ်တွေအတွက် ဂုဏ်ယူရအောင်လုပ်ချင်ခဲ့ပါတယ်။ ဆုဖလားအောင်မြင်မှုရရှိဖို့ ကျွန်တော်တို့ နှစ်တွေအများကြီးကြိုးစားခဲ့ကြပါတယ်။ ဒီနေ့ပွဲမှာ ရလဒ်အတွက်ရော၊ စွမ်းဆောင်ရည်အတွက်ပါ ကျွန်တော်အများကြီးကျေနပ်မိပါတယ်။ ဒီဆုဖလားက ကျွန်တော်တို့နဲ့ထိုက်တန်တယ်လို့ထင်ပါတယ်" လို့ပြောကြားခဲ့ပါတယ်။ 

ကွင်းလယ်လူ ဘရူနိုဂူမာရေးစ်ကလည်း "ဒီဆုဖလားက ပရိသတ်တွေအတွက် အများကြီးအဓိပ္ပာယ်ရှိမှာပါ။ ပရိသတ်တွေက အရာအားလုံးနဲ့ထိုက်တန်ပါတယ်။ သူတို့အတွက် ဒီဆုဖလားက ကမ္ဘာ့ဖလားလိုဖြစ်နေမှာပါ။ လူတွေက နယူးကာဆယ်ကို ချန်ပီယံအဖြစ်မမြင်ကြတာ ကြာပါပြီ။ ကျွန်တော်တို့ ဒီအသင်းနဲ့အတူ သမိုင်းမှတ်တမ်းရေးထိုးနိုင်ခဲ့ပါပြီ။ ကျွန်တော်အရမ်းပျော်ပါတယ်။ မယုံနိုင်စရာပါပဲ" လို့ပြောကြားခဲ့ပါတယ်။ 

ကြားရက်ကချန်ပီယံလိဂ်ပွဲစဉ်မှာ ပီအက်စ်ဂျီကို ပင်နယ်တီအဆုံးအဖြတ်နဲ့အရေးနိမ့်ပြီး ပြိုင်ပွဲကို လက်ပြနှုတ်ဆက်ခဲ့ရတဲ့လီဗာပူးအတွက်တော့ ယခုအခါ ကာရာဘောင်ဖလားကိုပါ ထပ်မံလက်လွှတ်ခဲ့ရတာကြောင့် အတော်လေးဆိုးဝါးတဲ့ရက်သတ္တပတ်တစ်ခုကို ကြုံတွေ့ခဲ့ရတယ်လို့ဆိုရမှာဖြစ်ပါတယ်။