အာဆင်နယ်ကွင်းလယ်ကစားသမား မီကယ်မီရီနိုက နည်းပြ မီကယ်အာတီတာကို ကမ္ဘာ့ဘောလုံးလောကရဲ့ "အကောင်းဆုံးနည်းပြတွေထဲက တစ်ယောက်" အဖြစ် ချီးကျူးခဲ့ပါတယ်။ ပြီးခဲ့တဲ့နွေရာသီက အာဆင်နယ်အသင်းကို ရောက်ရှိလာတဲ့ မီရီနိုက အာတီတာဟာ  ဆရာဟောင်း ပက်ပ်ဂွါဒီယိုလာဆီက အကောင်းဆုံးအရည်အသွေးတွေကို အောင်မြင်စွာ အသုံးချနိုင်ခဲ့တယ်လို့ ယုံကြည်နေပါတယ်။

ဒီရာသီမှာ အာဆင်နယ်အသင်းဟာ ကစားသမားတွေဒဏ်ရာရရှိမှုနဲ့ ရင်ဆိုင်ခဲ့ရပေမဲ့ မီရီနိုက အသင်းအတွက် အဖိုးတန်ကစားသမားတစ်ဦးဖြစ်ကြောင်း သက်သေပြခဲ့ပါတယ်။ စပိန်လက်ရွေးစင်ဟာ အာဆင်နယ်မှာ နံပါတ် ၉ နေရာ ယာယီ ဝင်ရောက်ကစားခဲ့ပြီး ပရီးမီးယားလိဂ်နောက်ဆုံး (၇)ပွဲမှာ (၄)ဂိုးသွင်းယူကာ ကူညီပေးခဲ့ပါတယ်။

မီရီနိုက "အရမ်းကောင်းတဲ့နှစ်တစ်နှစ်ဖြစ်ခဲ့ပါတယ်။ ကျွန်တော့်ရဲ့ကစားသမားဘဝမှာ အခုလို အလုပ်လုပ်တာမျိုးကို တစ်ခါမှမမြင်ဖူးခဲ့ပါဘူး။ ဒါက ဘောလုံးအကြောင်းကိုလေ့လာပြီး တိုးတက်ဖို့လည်း အထောက်အကူပြုပါတယ်။ အာတီတာက အရမ်းပြည့်စုံတဲ့နည်းပြတစ်ယောက်ပါ။ သူက ဂွါဒီယိုလာဆီကနေ အကောင်းဆုံးတွေကို ယူသုံးထားပြီး အဲဒီအချိန်ကာလမှာ သူနဲ့အတူရှိနေခဲ့တာကို နေ့တိုင်းတွေ့မြင်နေရပါတယ်"လို့ ပြောခဲ့ပါတယ်။

မီရီနိုက အာတီတာရဲ့ နည်းဗျူဟာပိုင်းဆိုင်ရာအတွေးအခေါ်နဲ့ပတ်သက်ပြီး အသေးစိတ်ပြောပြရာမှာတော့ "ဒီအိုင်ဒီယာကတော့ ပွဲကိုလွှမ်းမိုးကစားနိုင်တဲ့အသင်းဖြစ်ဖို့ပါပဲ။ ပွဲကိုထိန်းချုပ်ပြီး ပြိုင်ဘက်အသင်းကို အသာစီးမပေးဘဲ ကစားနိုင်ဖို့ဖြစ်ပါတယ်။ သူတို့ကို ဖိအားပေးပြီး တိုက်စစ်ဆင်တာတွေကို အကန့်အသတ်ထားနိုင်ဖို့ပါပဲ။ ပြီးတော့ သူမှာ သူ့ရဲ့ထိတွေ့မှုတွေ၊ နည်းစနစ်တွေရှိပါတယ်။ အကောင်းဆုံးတွေကတော့ ဒီလိုပါပဲ။ နေရာတစ်ခုစီကနေ အကောင်းဆုံးတွေကို ယူသုံးတတ်ကြပါတယ်။ သူကတော့ အကောင်းဆုံးမဟုတ်ရင်တောင် ကမ္ဘာ့အကောင်းဆုံးနည်းပြတွေထဲက တစ်ယောက်တော့သေချာပါတယ်" လို့ ပြောကြားခဲ့ပါတယ်။