ဘီလ်ဘာအိုအသင်းကို ၂ ကျော့ပေါင်းရလဒ်နဲ့အရေးနိမ့်ပြီး ယူရိုပါလိဂ်ကနေထွက်ခွာခဲ့ရပြီးနောက် ရိုးမားနောက်ခံလူ ဟမ်းမဲလ်က သူ့လုပ်ရပ်အတွက် တောင်းပန်လိုက်ပါတယ်။
ဟမ်းမဲလ်တစ်ယောက် ပွဲကစားချိန် ၁၁ မိနစ်မှာ ဆန်နာဒီကို ပြစ်ဒဏ်ကျုးလွန်ခဲ့တာကြောင့် တိုက်ရိုက်အနီကတ်နဲ့ အထုတ်ခံခဲ့ရပါတယ်။ ဘီလ်ဘာအိုအတွက် ဂိုးတွေကို နီကိုဝီလီယံက ၂ ဂိုး ၊ ဘာချီချီတို့က သွင်းယူပေးခဲ့ပြီး ရိုးမားအတွက် ချေပဂိုးကို ပါရီဒက်စ်က သွင်းယူပေးခဲ့ကာ ၃-၁ နဲ့ အရေးနိမ့်ခဲ့ပါတယ်။

အဲ့နောက် ၂ ကျော့ပေါင်းရလဒ် ၄-၃ နဲ့ ရိုးမားအသင်း ယူရိုပါလိဂ်ကနေထွက်ခွာခဲ့ရပါတယ်။ ဟမ်းမဲလ်က သူ့ရဲ့လုပ်ရပ်နဲ့ပတ်သက်ပြီး တွစ်တာကနေ ပြန်လည်တောင်းပန်ခဲ့ပါတယ်။
“ကျွန်တော် ရိုးမားအတွက် စိတ်မကောင်းဖြစ်မိပါတယ်။ အသင်းပရိသတ်တွေ နဲ့ အသင်းဖော်တွေကို ကျွန်တော်တောင်းပန်ချင်ပါတယ်။ ကျွန်တော့်အမှားကြောင့် အားလုံးသဲထဲရေသွန်ဖြစ်ခဲ့ရပါတယ်။ ဒီလိုပွဲမျိုးမှာ ကျွန်တော့်အပေါ်မှာ မူတည်ခဲ့တာပါ။ အခုတော့ ကျွန်တော်က ရိုးမားရဲ့ယူရိုပါလိဂ်အိပ်မက်ကို ဖျက်ဆီးလိုက်မိပါပြီ။ ဘာပြောရမှန်းတောင်မသိခဲ့ပဲ ကျွန်တော် အားလုံးနည်းတူ စိတ်ပျက်မိပါတယ်”လို့ ဟမ်းမဲလ်က တောင်းပန်ခဲ့ပါတယ်။