မန်စီးတီးဟာ အီဂျစ်တိုက်စစ်မှူး မိုမာမာမွတ်ရှ်ကို ဖရန့်ဘတ်ကနေ ခေါ်ယူလိုက်ကြောင်း ကြေညာလိုက်ပါတယ်။ အသက် ၂၅ နှစ်အရွယ် ကစားသမားဟာ ပရီးမီးယားလိဂ်ချန်ပီယံနှင့် ၄ နှစ်ခွဲစာချုပ်ချုပ်ဆိုလိုက်တာဖြစ်ပြီး ပေါင် ၅၉.၁ သန်း အပြင် အပိုဆုကြေး ပေါင် ၄.၂ သန်းဖြင့် ရောက်လာခဲ့တာဖြစ်ပါတယ်။ဇန်နဝါရီအပြောင်းအရွှေ့တွင် ခံစစ်မှူးဖြစ်တဲ့ ကူဆာနိုနှင့် ဗစ်တာရိစ်တို့ရောက်လာပြီးနောက် မာမွတ်ဟာ မန်စီးတီးသို့ ရောက်ရှိလာတဲ့ တတိယမြောက် ကစားသမားဖြစ်ပါတယ်။

မာမွတ်ရှ်က "ဒီနေ့ကို ကျွန်တော် ဘယ်တော့မှ မေ့မှာ မဟုတ်ပါဘူး။ မန်စီးတီးလို့ အသင်းမျိုးနှင့် စာချုပ်ချုပ်ရတာက အရမ်းကိုအံ့အားသင့်ရတဲ့ ခံစားချက်မျိုးပါ" "ကျွန်တော် ဝမ်းသာပါတယ်၊ ကျွန်တော့်မိသားစုကလည်း ဂုဏ်ယူနေမှာဖြစ်ပြီး ကျွန်တော်တို့အားလုံး မန်ချက်စတာမှာရှိရတဲ့အပေါ် ပျော်ပါတယ်" လို့ ပြောပါတယ်။ တိုက်စစ်ရဲ့နေရာစုံမှာ ကစားနိုင်တဲ့ မာမွတ်ရှ်ဟာ ၂၀၂၃ ခုနှစ်နွေရာသီတွင် ဖရန့်ဘတ်သို့ရောက်လာခဲ့ပြီးကတည်းက ၆၇ ပွဲတွင် ၃၇ ဂိုး သွင်းယူပေးထားပါတယ်။

ဘယ်နေရာမှာ ကစားရတာကိုနှစ်သက်သလဲလို့မေးရာတွင် မာမွတ်ရှ်က "ကျွန်တော်က နေရာစုံမှာ ကစားတဲ့သူပါ။ လက်ရွေးစင်အသင်းအတွက်ဆိုရင် ဘယ်တောင်ပံမှာ အများဆုံး ကစားပါတယ်။ အရင်အသင်းဟောင်းမှာ နံပါတ် ၉ အဖြစ် ကစားပြီး တစ်ခါတစ်ရံမှာ နံပါတ် ၈အဖြစ်လည်း ကစားပါတယ်" "ညာတောင်ပံမှာလည်း ကစားခဲ့ဖူးပါတယ်။ ကျွန်တော်က နေရာစုံမှာ ကစားနိုင်ပါတယ်။ ဒါပေမဲ့ အဆင်ပြေဆုံးနေရာကတော့ တိုက်စစ်မှူးရဲ့နောက် နံပါတ် ၁၀ နေရာပါ။ အဲ့ဒီနေရာကနေဆိုရင် မြန်မြန်ဆန်ဆန် ဂိုးသွင်းနိုင်ပြီး ဒါ့ပေမဲ့ နေရာစုံမှာ ကစားရလည်း အဆင်ပြေပါတယ်"

"ကစားရတဲ့အချိန်တိုင်း အစွမ်းကုန်ကြိုးစားပြီး ကစားပါတယ်။ ကျွန်တော်အမြဲတမ်း အားထားတဲ့အရာကတော့ အနိုင်ရရှိဖို့ပါပဲ။ ကွင်းအတွင်းမှာ ကျွန်တော်က အရမ်းမြန်ဆန်ပြီး နေရာလွတ်နဲ့ ပြိုင်ဘက်ကို ဒုက္ခပေးနိုင်တဲ့နေရာကို ရှာလေ့ရှိပါတယ်" လို့ ပြောပါတယ်။ မာမွတ်ရှ်ဟာ ကစားသမားဘဝကို အီဂျစ်ပရီးမီးယားလိဂ်ကလပ် ဝီဒီဒက်လာမှာ ကစားခဲ့ပြီး ၂၀၂၀ ခုနှစ်မှာ ဂျာမနီက ဝုဖ်ဘတ်သို့ ပြောင်းသွားခဲ့ပြီး အဲ့ဒီနောက် စိန့်ပေါလ်လီနှင့် စတုဂတ်တို့မှာ ကစားခဲ့ပါတယ်။

သူဟာ အီဂျစ်လက်ရွေးစင်အသင်းအတွက် ၃၅ ပွဲကစားထားပြီး ၆ ဂိုးသွင်းယူပေးထားပါတယ်။ အီတီဟက်ကွင်းသို့ရောက်တဲ့အခါ ကလပ်ဟာ ဆိုးရွားနေတဲ့အခြေအနေကနေ ပြန်လည်ရုန်းထနိုင်ဖို့ ကြိုးစားနေတာဖြစ်ပါတယ်။ ပြီးခဲ့တဲ့ ၄ရာသီအတွင်း ချန်ပီယံဖြစ်ခဲ့တဲ့ မန်စီးတီးဟာ လက်ရှိမှာတော့ ပရီးမီးယားလိဂ်ရဲ့ အဆင့် ၅ တွင် ရပ်တည်နေပြီး အဆင့် ၁ နေရာက လီဗာပူးနှင့် ၁၂ မှတ်ကွာဟနေပါတယ်။ ဗုဒ္ဓဟူးနေ့က ချန်ပီယံလိဂ်ပွဲစဉ်မှာ ပီအက်စ်ဂျီကို ရှုံးနိမ့်ခဲ့ကာ ရှုံးထွက်အဆင့်သို့ တက်ရောက်နိုင်မယ့် အရေးအတွက် စိုးရိမ်စရာဖြစ်လာပါတယ်။

မာမွတ်ရှ်က "ပတ်နှင့်အတူ သူ့ရဲ့နည်းပြအဖွဲ့တွေ အပါအဝင် ကမ္ဘာ့အဆင့်မီ အသုံးအဆောင်ပစ္စည်းတွေက ဒီမှာရှိပါတယ်။ ပိုကောင်းလာဖို့အတွက် ကစားသမားတွေကလည်း လိုအပ်တာမှန်သမျှအကုန်ရပါတယ်။ ဒီလိုအသင်းသို့ရောက်လာရတာက ကျွန်တော့်အတွက် စိတ်အားတက်စရာဖြစ်ပါတယ်" "ဆုဖလားတွေရရှိချင်တယ်ဆိုတာ ကျွန်တော်မငြင်းပါဘူး။ အင်္ဂလန်မှာ မန်စီးတီးဆိုတာက အောင်မြင်မှုအရှိဆုံးကလပ်တစ်ခုဖြစ်ပြီး အနိုင်ရရှိဖို့အတွက်လုပ်ဆောင်နေတဲ့ အသင်းသို့ ကျွန်တော်ပြောင်းလာတယ်ဆိုတာ သိပါတယ်" "အခြားသောကစားသမားတွေနဲ့လည်း တွေ့ချင်နေပြီး ကျွန်တော်ဘာလုပ်နိုင်သလဲဆိုတာကို ပရိသတ်တွေကို ပြသဖို့အတွက် စောင့်မျှော်နေပါတယ်" လို့ ပြောပါတယ်။

မန်စီးတီးမှာ ယခုလတွင် အခြေခံအားဖြင့် ပေါင် ၁၂၂.၅ သန်းအထိ အသုံးပြုထားပါတယ်။ မန်စီးတီးရဲ့အားကစားဒါရိုက်တာက "အိုမာက အရမ်းတောင်ပြီး စိတ်လှုပ်ရှားဖို့ကောင်းတဲ့ တိုက်စစ်မှူးတစ်ဦးပါ။ သူ့ကိုခေါ်ယူနိုင်တဲ့အတွက် ပျော်ပါတယ်" "ထိပ်တန်းတိုက်စစ်မှူးမှာလိုအပ်တဲ့ အရည်အချင်းတွေအားလုံး သူ့မှာရှိပါတယ်။ သူ့ရဲ့တိုးတက်ဖို့အတွက် ပတ်နှင့်အတူ နည်းပြအဖွဲ့တွေနဲ့အတူတူလုပ်ဆောင်ပြီး အကောင်းဆုံးဖြစ်လာမယ့်အပေါ် ကျွန်တော် သံသယမရှိပါဘူး" လို့ ပြောပါတယ်။