ကိုပါဒီဖရန့်စ်တွင် လန်းစ်ကို ပင်နယ်တီအဆုံးအဖြတ်ဖြင့် အနိုင်ရရှိခဲ့တဲ့ ခက်ခဲတဲ့ပွဲစဉ်တွင် ပီအက်စ်ဂျီ ရဲ့ကြိုးစားအားထုတ်မှုကို လူးဝစ်အင်းနရစ်က သဘောကျခဲ့ပါတယ်။ ပုံမှန်ပွဲကစားချိန်တွင် ၁-၁ ဂိုး သရေကျခဲ့ပြီးနောက် ချန်ပီယံတွေဟာ တောက်လျှောက် ရုန်းကန်ခဲ့ရပါတယ်။ အန်ဇိုလာရဲ့အဖွင့်ဂိုးကို ဂွန်ကာလိုရာမို့စ်က ချေပနိုင်ခဲ့ပြီးနောက် ဆာဖိုနိုဗ်က ပင်နယ်တီတွင် ကာကွယ်မှု ၂ ကြိမ် ပြုလုပ်နိုင်ခဲ့တာကြောင့် ၄-၃ ဂိုးဖြင့် အနိုင်ရရှိခဲ့တာဖြစ်ပါတယ်။

ရာမို့စ်ဟာ ပီအက်စ်ဂျီရဲ့ သမိုင်းတစ်လျှောက် ကိုပါဒီဖရန့်စ် ၃ ပွဲဆက်တိုက် ဂိုးသွင်းယူနိုင်ခဲ့တဲ့ ဒုတိယမြောက်ကစားသမားဖြစ်လာခဲ့ပြီး ၁၉၇၀ ခုနှစ် အောက်တိုဘာလနှင့် နိုဝင်ဘာလကြားတွင် ဂျက်ကီရေမွန် တစ်ဦးတည်းသာရှိခဲ့တာဖြစ်ပါတယ်။

ပီအက်စ်ဂျီဟာ ဂိုးရရရှိရန်ကြိုးပမ်းမှု ၁၈ ကြိမ်တွင် (xG) ၁.၇၄ ရှိခဲ့ပြီး လန်းစ်ကတော့ ၁၂ ကြိမ်တွင် (xG) ၁.၀၅ ရရှိခဲ့ကာ လူးဝစ်အင်းနရစ်ဟာ အသင်းရဲ့ ပွဲအားကိုင်တွယ်ပုံကို သဘောကျခဲ့တာဖြစ်ပါတယ်။ "နှစ်သင်းလုံးအတွက် ခက်ခဲတဲ့ပွဲတစ်ပွဲလို့ ကျွန်တော်ထင်ပါတယ်။ ကျွန်တော်တို့ ပွဲစဉ်ရဲ့ အတက်အကျကို ထိန်းနိုင်ခဲ့ပါတယ်"

"ကျွန်တော်တို့ ရုပ်ပိုင်းဆိုင်ရာ လန်းဆန်းမှု နည်းနည်းတော့ နဲနေပေမယ့် အသင်းက အမြဲတမ်း ယှဉ်ပြိုင်ကစားနေပြီး ပင်နယ်တီမှာ အနိုင်ရတာကလည်း အသင်းရဲ့ စိတ်ဓာတ်ကို ကောင်းမွန်စေတယ်လို့ ထင်ပါတယ်။ ဆာဖိုနိုဗ် က အရမ်းကောင်းပါတယ်။ သူ အရမ်းထိရောက်မှုရှိခဲ့ပါတယ်"

"ပင်နယ်တီကန်သွင်းသူ  ၄ ဦးကလည်း အရမ်းကို စိတ်ပိုင်းဖြတ်ထားပါတယ်။ နောက်ပြီး ထပ်ပြောချင်တာက ဒါဟာ ကျွန်တော်တို့ မိသားစုနဲ့အတူ ခရစ္စမတ်ကို ဖြတ်သန်းနိုင်စေဖို့၊ ဇန်နဝါရီလမှာ ကြုံရမယ့်အရာတွေကို ပျော်ပျော်ရွှင်ရွှင်နဲ့ စောင့်ကြိုနေတဲ့ ပြိုင်ပွဲတွေကို ပျော်ရွှင်စွာဖြတ်သန်းနိုင်စေခဲ့တဲ့ ကြီးကျယ်ခမ်းနားတဲ့ နိုင်ပွဲတစ်ခုပါပဲဖြစ်ကာ အသင်းတစ်သင်းလုံးရဲ့ ကြိုးစားအားထုတ်မှုပါ" လို့ လူးဝစ်အင်းနရစ်က ပြောကြားခဲ့ပါတယ်။

ဆာဖိုနိုဗ်ဟာ မျက်နှာဒဏ်ရာရရှိနေတဲ့ ဒွန်နာရမ်မာ အတွက် အစားထိုးဝင်ရောက်ကစားခဲ့ခြင်းဖြစ်ပြီး အန်ဇိုလာ နှင့် ဒီအော့ဖ်တို့ရဲ့ ကန်ချက်တွေကို ကာကွယ်နိုင်ခဲ့ကာ အသင်းအား ၃၂ သင်းအဆင့်သို့ ပို့ဆောင်ပေးခဲ့တာဖြစ်ပါတယ်။ "အခုတော့ လူတိုင်း ပျော်ရွှင်နေကြပြီး ဒါဟာ ပုံမှန်ပါပဲ။ ဒီနေ့ ကျွန်တော်တို့ရဲ့ ပြိုင်ဘက်က ကောင်းကောင်းကစားနိုင်လို့ အရမ်းစိတ်လှုပ်ရှားစရာကောင်းတဲ့ ပွဲတစ်ခုဖြစ်ခဲ့ပါတယ်"

"ကျွန်တော်တို့မှာ အခိုက်အတန့်တွေ အများကြီးရှိခဲ့ပေမယ့် နိုင်ပွဲရခဲ့ပြီး ပျော်ရွှင်မိပါတယ်။ ဂိုးဘားတန်းက ကူညီကယ်ဆယ်နိုင်ခဲ့လို့ ကံကောင်းတယ်လို့ ကျွန်တော်ထင်ပါတယ်။ ဒီအခိုက်အတန့်မှာ ကျွန်တော် ဂိုးပေးလိုက်ရတယ်လို့ ထင်ခဲ့ပေမယ့် ကံကောင်းခဲ့ပါတယ်" လို့ ဆာဖိုနိုဗ်က ပြောပါတယ်။