လီဗာပူးနည်းပြအန်းစလော့က ရီးရဲလ်မက်ဒရစ်ဆီရောက်ရှိဖို့ အတော်လေးနီးစပ်နေပြီဆိုတဲ့ အာနိုးလ်ရဲ့အနာဂတ်နဲ့ပတ်သက်တဲ့ ထင်ကြေးတွေကြောင့် သူ့အပေါ်မှာ ထိခိုက်မှုမရှိပါဘူးလို့ ပြောခဲ့ပါတယ်။ အာနိုးလ်၊ မိုဆာလက်၊ ဗန်ဒိုက်တို့က အခုနွေရာသီမှာ အန်ဖီးလ်ကလပ်နဲ့ စာချုပ်သက်တမ်းကုန်ဆုံးပါလိမ့်မယ်။

လွန်ခဲ့တဲ့သီတင်းပတ်အတွင်း သတင်းရင်းမြစ်တစ်ဦးက အသက်-၂၆ နှစ်အရွယ်ကစားသမားကို အလွတ်ပြောင်းရွှေ့ကြေးဖြင့်ခေါ်ယူနိုင်ရေးအတွက် မက်ဒရစ်အနေဖြင့် အလွန်အကောင်းမြင်ထားတယ်လို့ ESPN သတင်းဌာနဆီ ပြောခဲ့ပါတယ်။ ဒါပေမယ့် တဖက်မှာလည်း လီဗာပူးသတင်းရင်းမြစ်တစ်ဦးက ESPN သတင်းဌာနဆီ ပြောကြားရာမှာ သဘောတူညီမှုတစုံတရာရရှိထားခြင်းမရှိဘူးလို့ ရှင်းပြပါတယ်။

အင်္ဂါနေ့သတင်းစာရှင်းလင်းပွဲမှာတော့ အန်းစလော့က ကောလာဟလတွေနဲ့ပတ်သက်လို့ တုံ့ပြန်ပေးဖို့ ငြင်းဆန်ခဲ့ပြီး အာနိုးလ်အနေဖြင့် ဒဏ်ရာမှ အမြန်ဆုံးသက်သာလာစေရန် အာရုံစိုက်နေတယ်လို့ ပြောကြားခဲ့ပါတယ်။ အန်းစလော့က “ ကံဆိုးလွန်းလှလို့ အာနိုးလ် ဒဏ်ရာရရှိသွားတာပါ။ မဟုတ်ရင် လူတွေက အင်္ဂလန်လက်ရွေးစင်အသင်းအတွက် ခြေစွမ်းပြကစားလာတဲ့ သူ့အကြောင်းကို တခုတ်တရပြောကြပါလိမ့်မယ်။ ဒါပေမယ့် သူ ဒဏ်ရာရရှိခဲ့ပါတယ်။ ဆိုလိုတာကတော့ သူပြန်ကောင်းလာဖို့ အပြည့်အဝအာရုံစိုက်နေတယ်ဆိုတာပါပဲ။
 
ကျွန်တော်တို့ကတော့ အာနိုးလ် တက်နိုင်သမျှအမြန်ဆုံးပြန်ကောင်းလာစေရေး ကူညီပေးဖို့ ကြိုးစားနေပါတယ်။ အခုရှစ်လတာကာလအတွင်း အာနိုးလ်၊ ဗန်ဒိုက်၊ မိုဆာလက်တို့နဲ့ပတ်သက်လို့ ပြောဆိုမှုတွေ ခပ်တိုးတိုးသာ ရှိခဲ့ပေမယ့် ကျွန်တော်တို့ကတော့ အဲ့ဒီအရာတွေကို ဂရုမစိုက်ပါဘူး။ ကျွန်တော်တို့က ကိုယ်လုပ်ရမယ့်အရာတွေကိုပဲ အမြဲအာရုံစိုက်ထားပါတယ်။ ဗန်ဒိုက်၊ မိုဆာလက်တို့ လုပ်ရမယ့်အရာက မာဆေးဆိုဒ်ဒါဘီမှာ အနိုင်ရလဒ်ဖော်ဆောင်နိုင်ရေး ကြိုးစားသွားဖို့ပဲ ဖြစ်ပါတယ်။ အာနိုးလ်အတွက်ဆိုရင်တော့ တက်နိုင်သမျှအမြန်ဆုံး ကြံ့ခိုင်မှုပြန်လည်ပြည့်ဝလာအောင် ကြိုးစားသွားဖို့ပါပဲ။

ဒါက ရှစ်လ၊ ကိုးလလောက်ရှိပြီဖြစ်တဲ့ အခြေအနေတစ်ခုပါ။ ဒီကစားသမားသုံးဦးလုံးကလည်း အခုလိုအခြေအနေတွေအောက်မှာ အကောင်းဆုံးစွမ်းဆောင်ပြခဲ့ပါတယ်။ ဒီလိုသတင်းတွေက ကျွန်တော့်အပေါ် ထိခိုက်မှုမရှိစေပါဘူး”လို့ ဆိုပါတယ်။