အင်တာမီယာမီစတား မက်ဆီတစ်ယောက် ပွဲထွက်ခွင့်နည်းပါးလာတာကြောင့် မေဂျာလိဂ်ပရိသတ်တွေကြား ရေပန်းစားမှု လျော့ကျလာခဲ့တယ်လို့ သိရပါတယ်။ ရွေးချယ်မှုအတွက် ပါဝင်နေပေမယ့် ချာလိုတီနဲ့ပွဲမှာ အရန်ခုံမှာသာ ပါဝင်လာခဲ့တာဖြစ်ပါတယ်။ အဆိုပါပွဲမှာ အရန်ခုံထိုင်ခဲ့ရတာကြောင့် မက်ဆီတစ်ယောက် ပြိုင်ပွဲစုံနောက်ဆုံး ၃ ပွဲကို မပါဝင်ခဲ့တာဖြစ်ပါတယ်။

မာရှေးယာနိုကတော့ မက်ဆီရဲ့ကြံ့ခိုင်မှုအနေအထားကို သေချာလေးစီမံနေတာကြောင့် အခုလိုလုပ်ဆောင်ရတာလို့ ပြောကြားခဲ့ပါတယ်။ အမေရိကပရိသတ်တွေကတော့ အခုအခြေအနေကို စိတ်ပျက်နေပြီး လာမယ့်ပွဲစဉ်တွေမှာ လက်မှတ်တွေကို အလကားပေးဖို့ ပြင်ဆင်နေတယ်လို့ သိရပါတယ်။

မက်ဆီရဲ့တွစ်တာအကောင့်မှာ တင်ခဲ့တဲ့ပို့စ်တွေရဲ့ ၂၄%ကလည်း အနုတ်လက္ခဏာဆောင်နိုင်ပြီး ၁၂% လောက်သာ အပေါင်းလက္ခဏာဆောင်နိုင်တာဖြစ်ပါတယ်။ အဆိုပါမှတ်ချက်ဟာ ပြီးခဲ့တဲ့နှစ်က ပို့စ်တွေနဲ့ယှဉ်ရင် နည်းပါးလွန်းတာဖြစ်ပါတယ်။ ကိုပါအမေရိကမှာ ခြေကျင်းဝတ်ဒဏ်ရာရရှိပြီးနောက်မှာလည်း မက်ဆီတစ်ယောက် အနုတ်လက္ခဏာဆောင်တာတွေရရှိခဲ့ပြီး ၁၈% လောက်သာ အပေါင်းလက္ခဏာဆောင်ခဲ့တာဖြစ်ပါတယ်။

”မက်ဆီအတွက်တော့ ပြီးခဲ့တဲ့အပတ်တွေက မလွယ်ကူခဲ့ပါဘူး။ ဒါပေမယ့် မေဂျာလိဂ်ပရိသတ်တွေကလည်း စိတ်မရှည်တော့ပါဘူး။ သူတို့ လူမှုမီဒီယာကနေ မက်ဆီမပါဝင်မှုအတွက် မကျေနပ်မှုတွေကို ထုတ်ဖော်ပြောကြားလာကြပါပြီ။ ၃ ပွဲဆက်လွဲချော်ခဲ့တာကြောင့် ကျွန်တော်တို့ ရှာဖွေမှုတွေအရ ၂၄% သောပို့စ်တွေမှာ အနုတ်လက္ခဏာဆောင်လာပါတယ်။ အဲ့တာက ဖေဖော်ဝါရီတုန်းကထက်စာရင် ၁၆% အထိ တိုးမြှင့်လာပါတယ်။ အမေရိကမှာ သူ့ရဲ့ရေပန်းစားမှုကလည်း ကျဆင်းလာပါတယ်။ မက်ဆီအနေနဲ့ အခုအခြေအနေတွေကို ကျော်ဖြတ်နိုင်ဖို့ စွမ်းဆောင်ရည်ကောင်းတွေပြသနိုင်ဖို့ လိုအပ်နေပါပြီ”လို့ BetVictor Canada ရဲ့ပြောရေးဆိုခွင့်ရှိသူ ဘော့စ်ဝဲလ်က ပြောကြားခဲ့ပါတယ်။

အင်တာမီယာမီဟာ လက်ရှိရာသီသစ်မှာ ၆ ပွဲဆက် ရှုံးပွဲမရှိအောင် ကစားထားနိုင်ခဲ့ပြီး လာမယ့်ကြာသပတေးနေ့မှာ ကွန်ကာကက်ဖ် ၁၆ သင်းအဆင့်ဒုတိယအကျော့ပွဲအဖြစ် ကာဗာလီယာအသင်းနဲ့ရင်ဆိုင်ရမှာဖြစ်ပါတယ်။ မက်ဆီအခြေအနေကတော့ သေချာမသိရသေးပဲ လာမယ့်တနင်္ဂနွေနေ့ အတ္တလန္တာယူနိုက်တက်နဲ့ပွဲမှာမှ ပြန်လည်ပါဝင်လာဖွယ်ရှိနေပါတယ်။