တော့တင်ဟမ်ကြယ်ပွင့်ကစားသမား ဆွန်ဟောင်မင်က ဘာစီလိုနာအသင်းရဲ့လူငယ်ပါရမီရှင်ကစားသမား‌လေး လာမိုင်းယာမယ်လ်ဟာ မကြာမီနှစ်တွေအတွင်းမှာ ကမ္ဘာ့အကောင်းဆုံး တောင်ပံကစားသမားဖြစ်လာလိမ့်မယ်လို့ ဟောကိန်းထုတ်လာခဲ့ပါတယ်။  ဘာစီလိုနာရဲ့ လာမာစီယာအကယ်ဒမီကနေ ထွက်ပေါ်လာခဲ့တဲ့ ယာမယ်လ်ဟာ ဘောလွန်းဒီအော် ၈ ဆုအထိဆွတ်ခူးထားတဲ့ အသင်းရဲ့ကြယ်ပွင့်ဟောင်း လီယွန်နယ်မက်ဆီနဲ့ပင် နှိုင်းယှဉ်ချီးကျူးခံနေရသူဖြစ်ပြီး အသက်-၁၇ နှစ်အရွယ်မှာပဲ စံချိန်တွေရေးထိုးထားနိုင်တာဖြစ်ပါတယ်။ 

စပိန်လက်ရွေးစင်ကစားသမားဟာ တစ်ဦးချင်းဆုတံဆိပ်တွေအဖြစ် လူငယ်ရွှေဘောလုံးဆုနဲ့ ကိုပါဆုတို့ကို ဆွတ်ခူးထားနိုင်ခဲ့ပြီး ဥရောပရဲ့ အလားအလာအရှိဆုံးလူငယ်ကြယ်ပွင့်အဖြစ် သတ်မှတ်ခံထားရပါတယ်။ ၂၀၂၄ ခုနှစ် ယူရိုချန်ပီယံဆုကို စပိန်အသင်းနဲ့အတူ ဆွတ်ခူးထားနိုင်ခဲ့တဲ့ ယာမယ်လ်ဟာ လာမယ့် ၂၀၂၆ ကမ္ဘာ့ဖလားပြိုင်ပွဲမှာလည်း လက်ရွေးစင်အသင်းအတွက် အရေးပါတဲ့ကစားသမားဖြစ်လာမယ်လို့ ခန့်မှန်းထားကြတာဖြစ်ပါတယ်။ 

ယခုအခါမှာ တော့တင်ဟမ်ကြယ်ပွင့် ဆွန်ဟောင်မင်ကလည်း “မယုံနိုင်စရာကောင်းတဲ့ကစားသမားလေးပါ။ အခုလိုအသက်အရွယ်လေးနဲ့ သူ့ရဲ့စွမ်းဆောင်ရည်က အံ့မခန်းဖြစ်နေပါပြီ။ ကျွန်တော်လည်းသူ့ကို စောင့်ကြည့်နေပါတယ်။ ကောင်းတဲ့အချက်ကတော့ သူဟာ အသက်ငယ်ငယ်လေးရှိနေသေးလို့ နောက်ထပ်တိုးတက်ဖို့ အများကြီးကျန်နေပါသေးတယ်။ လာမယ့်နှစ်အနည်းငယ်အတွင်းမှာပဲ သူက ကမ္ဘာ့အကောင်းဆုံးတောင်ပံကစားသမားဖြစ်လာပါလိမ့်မယ်” လို့ပြောကြားခဲ့ပါတယ်။ 

ယာမယ်လ်ဟာ မကြာသေးမီက ဘင်ဖီကာကို ၃-၁ နဲ့အနိုင်ရခဲ့တဲ့ ချန်ပီယံလိဂ်ဒုတိယအကျော့ပွဲစဉ်မှာ ဘာစီလိုနာအတွက် အရေးပါတဲ့ကစားသမားအဖြစ် ပါဝင်ခဲ့ကာ အသင်းအတွက် ဂိုးဖန်တီးမှု ၁ ကြိမ်လုပ်ပြီး၊ သွင်းဂိုး ၁ ဂိုးလည်းရယူနိုင်ခဲ့ပါတယ်။ ဒါကြောင့် အသက်-၁၇ နှစ်အရွယ်ကစားသမားဟာ ချန်ပီယံလိဂ်သမိုင်းတစ်လျှောက် ပွဲစဉ်တစ်ပွဲအတွင်း ဂိုးဖန်တီးမှုရော၊ သွင်းဂိုးပါရယူနိုင်တဲ့ အသက်အငယ်ဆုံးကစားသမားအဖြစ် မှတ်တမ်းဝင်ခဲ့ပါတယ်။
လာမယ့် တနင်္ဂနွေနေ့မှာ ဘာစီလိုနာဟာ လာလီဂါဆုဖလားအတွက် အဓိကယှဉ်ပြိုင်နေရတဲ့ အက်သလက်တီကိုမက်ဒရစ်နဲ့ ကစားသွားရမှာဖြစ်ပြီး ယာမယ်လ်တစ်ယောက် ဘယ်လိုခြေစွမ်းကောင်းတွေ ဆက်လက်ပြသသွားနိုင်မလဲဆိုတာ စောင့်ကြည့်ရပါမယ်။