စပိန်အသင်းနဲ့အတူ လက်ရွေးစင်အဆင့်တာဝန်ထမ်းဆောင်ဖို့ ရောက်ရှိလာတဲ့ လမိုင်းယာမယ်လ်ဆီ ဘာစီလိုနာအသင်းမှာ ဟန်စီဖလစ်ခ် ဘာကြောင့်အောင်မြင်နေသလဲဆိုတဲ့ မေးခွန်းတွေ ရောက်ရှိလာခဲ့ပါတယ်။ ဂျာမန်သားနည်းပြက သူ့ရဲ့အသင်းကို လာလီဂါအမှတ်ပေးဇယားထိပ်ဆုံးနေရာဆီ ပို့ဆောင်ပေးထားသလို ကိုပါဒယ်လ်ရေးဖလားပြိုင်ပွဲမှာ ဆီမီးဖိုင်နယ်၊ ချန်ပီယံလိဂ်ပြိုင်ပွဲမှာ ကွာတားဖိုင်နယ် တက်ရောက်နိုင်အောင် ဦးဆောင်ပေးထားပါတယ်။

Diario Sport နဲ့တွေ့ဆုံချိန် ယာမယ်လ်က “ အရေးအကြီးဆုံးအရာက စိတ်အားထက်သန်မှုဖြစ်တယ်ဆိုတာကို ကျွန်တော်တို့ရဲ့အတွင်းစိတ်အထိ သူ ထည့်သွင်းပေးခဲ့ပါတယ်။ ဒါကြောင့် ကျွန်တော်တို့က အရာရာတိုင်းအတွက် တိုက်ပွဲဝင်ပါတယ်။ ကျွန်တော်တို့က ဒီကလပ်အသင်းဂျာစီအတွက်၊ ကစားသမားတွေအတွက်၊ ပရိသတ်တွေအတွက်၊ မိသားစုဝင်တွေအတွက် အရာရာတိုင်းကို ပေးဆပ်ကစားပါတယ်။ ကျွန်တော်တို့ဆီမှာ အနိုင်ရရှိလိုစိတ်တွေ အမြဲလိုလိုကိန်းအောင်းနေရပါမယ်။ သူက လူတိုင်းနဲ့အရမ်းရင်းနှီးသလို အားလုံးကိုလည်း ဂရုစိုက်ပါတယ်။ ဘယ်အရာတွေ တိုးတက်ရမယ်၊ ဘယ်အရာတွေတော့ မလိုတော့ဘူးဆိုတာကို အသေးစိတ်သိရှိရအောင် ရှင်းပြပေးပါတယ်”လို့ ပြောပါတယ်။

ဆက်လက်ပြီး လီဝန်ဒေါစကီးနဲ့ဆက်ဆံရေးအကြောင်း ယာမယ်လ်ဆီ မေးမြန်းခဲ့ရာ စပိန်ကြယ်ပွင့်က လက်ရှိလေ့ကျင့်ရေးကွင်းအတွင်း အသင်းအဖွဲ့စိတ်ဓါတ်ပိုင်းကို မီးမောင်းထိုးရှင်းပြသွားခဲ့ပါတယ်။ ယာမယ်လ်က “ ကျွန်တော်တို့တွေ ပြီးခဲ့တဲ့နှစ်ထက် အသင်းအဖွဲ့နဲ့ ပိုတူလာခဲ့ပါပြီ။ အချိန်ကာလတစ်ခုကို ကစားသမားအစုအဖွဲ့တစ်ခု အတူတကွဖြတ်သန်းခဲ့ပြီးနောက် အခုလိုအသင်းအဖွဲ့လိုက်စိတ်ဓါတ်ပိုင်း အားကောင်းလာတယ်ဆိုတာ သာမန်ကိစ္စရပ်တစ်ခုပဲ ဖြစ်ပါတယ်။

ယူရိုပြိုင်ပွဲအပြီး ဒါနီအိုလ်မိုတစ်ဦးတည်းလောက်ပဲ ကစားသမားသစ်အဖြစ် ရောက်ရှိလာခဲ့တာပါ။ ကျွန်တော်တို့အသင်းမှာ စပိန်သားအများစုရှိပြီး တကယ့်ကိုကြီးမားတဲ့မိသားစုအသွင်သဏ္ဍာန်မျိုး ဖြစ်ပါတယ်။ ဒါတွေကို အက်သလက်တီကိုမက်ဒရစ် (သို့မဟုတ်) ဘင်ဖီကာနဲ့ပွဲစဉ်အပြီး အောင်ပွဲခံမှုတွေမှာ မြင်တွေ့ရနိုင်ပါတယ်။ ကျွန်တော်တို့အားလုံး ကိုယ့်အသင်းဖော်တွေအတွက် ပျော်ရွှင်ကျေနပ်ကြပြီး ဒါကပဲ အသင်းအတွက် အဓိကအချက်ဖြစ်ပါတယ်”လို့ ပြောပါတယ်။

ယာမယ်လ်က ဘာစီလိုနာအသင်းဖော်အများစုနဲ့အတူ စပိန်လက်ရွေးစင်တာဝန်ကို နယ်သာလန်နဲ့ရင်ဆိုင်ရမယ့် နေးရှင်းလိဂ်ပွဲစဉ်တွေမှာ ထမ်းဆောင်သွားပါလိမ့်မယ်။