စပိန်လက်ရွေးစင်ကြယ့်ပွင့်ကစားသမားလေး လာမိုင်းယာမယ်လ်ဟာ အသင်းနဲ့အတူ ၂၀၂၄ ယူရိုပြိုင်ပွဲ ခရီးစဉ်မှာလိုက်ပါခဲ့သော်လည်း ကျောင်းအိမ်စာတွေလုပ်စရာရှိနေတာကြောင့် အိမ်စာတွေကို တစ်ပါတည်းသယ်ဆောင်လာခဲ့တယ်လို့သိရပါတယ်။ ယာမယ်လ်ဟာ လာမယ့်နွေရာသီအားလပ်ရက်တွေအတွက် ပြင်ဆင်နေတဲ့အခြား ၁၆ နှစ်သား သာမန်ကလေးတွေလိုမဟုတ်ဘဲ ဂျာမနီမှာကျင်းပမယ့် ယူရို ၂၀၂၄ ပြိုင်ပွဲမှာ စပိန်အသင်းအတွက် ပါဝင်ကစားပေးသွားမှာဖြစ်ပါတယ်။

ဘာစီလိုနာအသင်းမှာ ထွန်းတောက်လာခဲ့တဲ့ ကျောက်ရိုင်းတုန်းလေးဟာ အသက်-၁၆ နှစ်အရွယ်သာ ရှိသေးပေမယ့် စပိန်လက်ရွေးစင်အသင်းကြီးအတွက် ၇ ပွဲအထိ ပါဝင်ကစားထားရပြီဖြစ်ပါတယ်။ သို့သော်လည်း အရပ် ၅ ပေ ၁၀ လက်မရှိတဲ့ ကစားသမားလေးဟာ သူ့ရဲ့ကျောင်းက ဆရာတွေရဲ့မှာကြားချက်ကို လိုက်နာတဲ့အနေနဲ့ ယူရိုပြိုင်ပွဲတစ်လျှောက်မှာ အိမ်စာတွေကိုလည်းလုပ်သွားရဦးမှာဖြစ်ပါတယ်။

အိမ်စာတွေလုပ်စရာရှိနေကြောင်းကို တောင်ပံကစားသမားက “ကျွန်တော် ယူရိုပြိုင်ပွဲတွေကို အမေနဲ့အတူ ဆိုဖာပေါ်မှာလှဲလျောင်းပြီး ကြည့်ခဲ့ဖူးပါတယ်။ အခု ကျွန်တော်ဒီရောက်နေတာ အေးအေးဆေးဆေးနေဖို့မဟုတ်ပါဘူး။ သမိုင်းဝင်အောင်မြင်မှုတစ်ခုကို ဖော်ဆောင်ဖို့ပါ။ ကျွန်တော်တို့ ဒီပြိုင်ပွဲမှာတတ်နိုင်သလောက် ဝေးဝေးသွားနိုင်ဖို့မျှော်လင့်ပါတယ်။ ကျွန်တော်ကအခု ESO(မသင်မနေရကျောင်းစာ) စတုတ္ထနှစ်ရောက်နေပြီဖြစ်လို့ အိမ်စာတွေကိုလည်း တစ်ပါတည်းယူလာခဲ့ပါတယ်။ အတန်းကိုလည်း လိုင်းပေါ်ကနေတက်နေပြီး စာကောင်းကောင်းလုပ်နေပါတယ်။ ကျွန်တော့်ကို ဆရာ ကျောင်းမထုတ်ပါစေနဲ့လို့မျှော်လင့်ပါတယ်”လို့ပြောကြားခဲ့ပါတယ်။

ယာမယ်လ်ဟာ ရာစုနှစ်တစ်ခုကျော်အတွင်း ဘာစီလိုနာရဲ့အသက်အငယ်ဆုံး ပထမအသင်း ကစားသမားဖြစ်လာခဲ့ပြီး ၂၀၂၃ ခုနှစ်၊ ဧပြီလ အသက်-၁၅ နှစ်အရွယ်မှာ စတင်ပွဲထွက်ခွင့်ရခဲ့ပါတယ်။ လက်ရှိအချိန်မှာတော့ လူငယ်ကစားသမားဟာ ဘာစီလိုနာအသင်းကြီးအတွက် စုစုပေါင်း ၅၁ ပွဲအထိ ပါဝင်ခွင့်ရထားပြီး ၇ ဂိုးအထိ သွင်းယူပေးထားနိုင်ပါတယ်။ ယာမယ်အနေနဲ့ ယခုယူရိုမှာ စပိန်အသင်းအတွက် ဆုဖလားဆွတ်ခူးပေးနိုင်ခဲ့မယ်ဆိုရင်တော့ ကမ္ဘာ့စွမ်းရည်အမြင့်မားဆုံးလူငယ်တွေထဲမှ တစ်ဦးအဖြစ် သတ်မှတ်ခံရတော့မှာဖြစ်ပါတယ်။

လာမယ့်ဇူလိုင်လမှာ အသက်-၁၇ နှစ်ပြည့်မယ့် ယာမယ်လ်အနေနဲ့ စပိန်အသင်းရဲ့ ယူရိုအုပ်စုအဆင့်ပွဲစဉ်တွေဖြစ်တဲ့ ခရိုအေးရှား၊ အီတလီနဲ့ အယ်လ်ဘေးနီးယားတို့နဲ့ ပွဲစဉ်မှာ ပါဝင်ကစားခွင့်ရဖို့မျှော်လင့်နေမှာဖြစ်ပါတယ်။