လီဗာပူးနည်းပြ ယာဂန်ကလော့ပ်က သူ့နေရာမှာ ဆက်ခံသူဖြစ်လာဖို့ သတင်းကြီးနေတဲ့ အလွန်ဆိုအပေါ် သူတို့မျိုးဆက်ရဲ့အထူးခြားဆုံးနည်းပြတစ်ဦးအဖြစ် တင်စားကာ ချီးကျူးဂုဏ်ပြုလိုက်ပါတယ်။

လေဗာကူဆင်ကို ဘွန်ဒက်စ်လီဂါအမှတ်ပေးဇယားထိပ်ဆုံးနေရာမှာ ရပ်တည်နိုင်အောင် စွမ်းဆောင်ပေးထားတဲ့ အလွန်ဆိုက လတ်တလောမှာ လီဗာပူးနည်းပြသစ်ဖြစ်လာဖို့ ထိပ်ဆုံးမှ ရေပန်စားနေပါတယ်။ ယာဂန်ကလော့ပ်ရဲ့ အခုလို ချီးကျူးပြောဆိုမှုကြောင့် အန်ဖီးလ်ကလပ်တာဝန်ရှိသူတွေအနေဖြင့် အသင်းရဲ့အနာဂတ်အတွက် စဉ်းစားရာမှာ ထူးခြားတဲ့စပိန်သားအပေါ် စိတ်ဝင်စားမှု ပိုမိုရှိလာပါလိမ့်မယ်။

အခုရာသီကုန်မှာ လီဗာပူးမှထွက်ခွာတော့မယ့် ယာဂန်ကလော့ပ်က “ဇာဗီအလွန်ဆိုက မယုံကြည်နိုင်လောက်စရာအလုပ်တစ်ခုကို လုပ်ဆောင်နေတာပါ။ အန်ဆယ်လော့တီ၊ မော်ရင်ဟို၊ ပက်ဂွါဒီယိုလာနဲ့ ကျွန်တော်တို့လို ဒိုင်နိုဆောကြီးတွေတောင် နှစ်ပေါင်း ၂၀ ကျော်ကြာတဲ့အထိ ဒီလိုမျိုး မလုပ်ဆောင်နိုင်တော့ပေမယ့် မျိုးဆက်သစ်နည်းပြတွေကတော့ အဆင်သင့်ရှိနေပါပြီ။ အလွန်ဆိုကတော့ ဒီအပိုင်းမှာထူးချွန်တယ်လို့ပဲ ပြောရပါလိမ့်မယ်။ သူက ကမ္ဘာ့အဆင့်ကစားသမား တစ်ဦးဖြစ်ခဲ့သလို နည်းပြတစ်ဦးအဖြစ်လည်း ရောက်ရှိနေပါပြီ။ သူစုစည်းပေးထားတဲ့ အသင်းကလည်း ထူးခြားလှပါတယ်။ သူတို့စုဆောင်းထားနိုင်တဲ့ ရမှတ်ပိုင်းသာမက သူတို့ရဲ့ ကစားဟန်ကြောင့် အခုလိုပြောရတာပါ”လို့ ဆိုပါတယ်။

ကလော့ပ်က ဒေါ့မွန်ကိုဦးဆောင်ရင်း ဘိုင်ယန်မြူးနစ်ရဲ့ ဘွန်ဒက်စ်လီဂါ ချန်ပီယံအောင်ပွဲကို တားဆီးနိုင်ခဲ့တဲ့ နောက်ဆုံးနည်းပြဖြစ်ပါတယ်။ ဒီနောက်ပိုင်းမှာ ဘိုင်ယန်မြူးနစ်က ဘွန်ဒက်စ်လီဂါချန်ပီယံဆုကို ၁၁ နှစ်ဆက်တိုက် သိမ်းပိုက်ခဲ့ပါတယ်။ အခုဘောလုံးရာသီမှာတော့ အလွန်ဆိုရဲ့အသင်းကို ပြီးခဲ့တဲ့သီတင်းပတ်အတွင်း သုံးဂိုးပြတ်အရေးနိမ့်တဲ့ ဘိုင်ယန်မြူးနစ်က အမှတ်ပေးဇယားထိပ်ဆုံးနေရာနဲ့ ရမှတ်ကွာဟမှုရှိလာပါတယ်။

ကလော့ပ်က “ကျွန်တော်တို့ ဘိုင်ယန်မြူးနစ်ကို အနိုင်ယူခဲ့ပါတယ်။ ဘာကြောင့်လဲဆိုတော့ ကျွန်တော်တို့က ခံစစ်နဲ့ တန်ပြန်တိုက်စစ်ကို အကောင်းဆုံးကစားနိုင်ခဲ့လို့ပါ။ ဒါပေမယ့် လေဗာကူဆင်ကတော့ အံ့အားသင့်လောက်စရာ ခြေစွမ်းပိုင်းပိုမိုကောင်းမွန်တာ သိသာနေပါတယ်။ ဒီလိုအလုပ်မျိုးကို အလွန်ဆိုက ကာလတိုလေးမှာပဲ လုပ်ဆောင်ပြထားတာပါ။ ဒီကာလတွေအတွင်းမှာပဲ အလွန်ဆိုက သူ့ရဲ့အမှတ်တံဆိပ်ကို ထင်ထင်ရှားရှားခတ်နှိပ်ပြထားပါတယ်။ အသင်းကလည်း အရမ်းကိုဟန်ချက်ညီနေပါတယ်။ နည်းပြပိုင်းနဲ့ပတ်သက်ရင်လည်း ထူးခြားလှပါတယ်။ သူက တကယ့်ကို စပါယ်ရှယ်အလုပ်တစ်ခု လုပ်နေတာပါ။ ဝိုး…ဒါ လုံးဝကို အထင်ကြီးစရာပဲလို့တော့ ဂျာမနီမှာ ပြောနေကြပါပြီ”လို့ ဆက်ပြောခဲ့ပါတယ်။

လေဗာကူဆင်က ဂျာမန်ဖလားဆီမီးဖိုင်နယ်အဆင့်ဆီ တက်လှမ်းထားသလို ယူရိုပါလိဂ်ပြိုင်ပွဲမှာလည်း ရှုံးထွက်အဆင့်ဆီ ရောက်ရှိနေပါတယ်။ ဒါကြောင့် လေဗာကူဆင်က ယူရိုပါလိဂ်နောက်ပိုင်းအဆင့်တွေမှာ လီဗာပူးနဲ့ ရင်ဆိုင်ရနိုင်ခြေ ရှိပါတယ်။