ပရော်ဖက်ရှင်နယ် နပန်းသမားအဖြစ် ကြိုးဝိုင်းထဲမှာ ဆယ်စုနှစ် ၂ ခုအကြာ ကျင်လည်ခဲ့ပြီးနောက်မှာတော့ ဂျွန်ဆီနာဟာ လာမယ့်နှစ်မှာ အနားယူတော့မယ့်အကြောင်း ကြေညာလာခဲ့ပါတယ်။

နပန်းသမားလည်းဖြစ်သလို ရုပ်ရှင်သရုပ်ဆောင်လုပ်ငန်းမှာလည်း အောင်မြင်မှုရနေတဲ့ ဂျွန်ဆီနာဟာ တိုရွန်တိုမှာ ပြုလုပ်ခဲ့တဲ့ နပန်းပြိုင်ပွဲတစ်ခုမှာ ၂၀၂၅ ရာသီဟာ သူ့ရဲ့နောက်ဆုံးရာသီဖြစ်လိမ့်မယ်လို့ ပရိသတ်တွေကို အသိပေး ပြောကြားခဲ့တာဖြစ်ပါတယ်။ ဂျွန်ဆီနာအနေနဲ့ ပရော်ဖက်ရှင်နယ်ကစားသမားဘဝမှ အနားယူသွားမှာဖြစ်သော်လည်း နပန်းလောကထဲမှာတော့ ဆက်လက်ကျင်လည်နေဦးမယ်လို့ သိရပါတယ်။

ဂျွန်ဆီနာက “နှစ်ပေါင်းများစွာ ဖွဲ့စည်းခဲ့တဲ့ ဒီအသိုင်းအဝိုင်းထဲမှာ ကျွန်တော့်ကို ပါဝင်ကစားခွင့်ပေးခဲ့လို့ အားလုံးကို ကျေးဇူးအများကြီးတင်ပါတယ်” လို့ လူသိရှင်ကြားပြောကြားခဲ့တာဖြစ်ပါတယ်။

သတင်းစာရှင်းလင်းပွဲမှာတော့ ဂျွန်ဆီနာက သူ့အနေနဲ့ ရုပ်ပိုင်းဆိုင်ရာအရ နောက်ဆုံးအချိန်ဖြစ်နေပြီလို့ ခံစားရသော်လည်း သူချစ်တဲ့ဒီအားကစားကနေ အရမ်းဝေးကွာတဲ့နေရာကိုတော့ ထွက်သွားမှာမဟုတ်ဘူးလို့ ဆိုခဲ့ပါတယ်။  WWE ၁၆ ကြိမ်ချန်ပီယံဖြစ်ခဲ့တဲ့ ဂျွန်ဆီနာဟာ ၂၀၀၀ ခုနှစ်အစောပိုင်းကာလတွေမှာ ဦးထုပ်ကို နောက်ပြန်ဆောင်း၊ လည်ပင်းမှာ ရွှေရောင်ဆွဲကြိုးကြီးဆွဲပြီး ရက်ပ်ပါအထာနဲ့ နပန်းပရိသတ်တွေရဲ့ အသည်းနှလုံးကို ဆုပ်ကိုင်ခဲ့ပြီး နောက်ပိုင်းမှာတော့ သရုပ်ဆောင်နယ်ပယ်မှာပါ ဇာတ်ကောင်အမျိုးမျိုးနဲ့ အောင်မြင်မှုရခဲ့တာဖြစ်ပါတယ်။

ဂျွန်ဆီနာဟာ Blockers နဲ့ The Suicide Squad ရုပ်ရှင်ဇာတ်ကားတွေမှာ အဓိကအခန်းကဏ္ဍကနေပါဝင်သရုပ်ဆောင်ခဲ့ပါတယ်။ ဒါ့အပြင် Bumblebee ဇာတ်ကားမှာလည်း ပါဝင်ခဲ့ပြီး မကြာသေးမီက Argylle နဲ့ Box Office ရဲ့ နာမည်ကြီးဇာတ်လမ်း Barbie မှာလည်း သရုပ်ဆောင်အဖြစ်ပါဝင်ခဲ့ပါတယ်။