ယမန်နေ့(အင်္ဂါနေ့)၊ ဥဇဘက်ကစ္စတန်နဲ့ တစ်ဖက်နှစ်ဂိုးစီသရေကျပြီးနောက် အီရန်လက်ရွေးစင်အသင်းက ၂၀၂၆ ကမ္ဘာ့ဖလားအုပ်စုအဆင့်မှာ ပါဝင်ယှဉ်ပြိုင်နိုင်ဖို့အတွက် ကြိုတင်စာရင်းသွင်းလာနိုင်တဲ့ ဆဋ္ဌမမြောက်အသင်း ဖြစ်လာခဲ့ပါတယ်။

AFC ကမ္ဘာ့ဖလားခြေစစ်ပွဲစဉ်အဖြစ် အိမ်ကွင်းမှာယှဉ်ပြိုင်ကစားရတဲ့ အီရန်က ပြိုင်ဘက်ကို နှစ်ကြိမ်တိုင် ဦးဆောင်ဂိုးတွေ ခွင့်ပြုပေးခဲ့ရပေမယ့် တာရီမီရဲ့သွင်းဂိုးနှစ်ဂိုးနဲ့ အိမ်ရှင်ပရိသတ်ရှေ့မှောက် ရှုံးပွဲမကြုံတွေ့အောင် စွမ်းဆောင်နိုင်ခဲ့ပါတယ်။ အခုပွဲစဉ်ရလဒ်ပိုင်းနဲ့အတူ အီရန်က ဥဇဘက်ကစ္စတန်ထက် သုံးမှတ်အသာ၊ အုပ်စု(A)ရဲ့ထိပ်ဆုံးမှာ ဆက်လက်ရပ်တည်နေခဲ့ပါတယ်။ ဥဇဘက်ကစ္စတန်ကတော့ နောက်ထပ်နိုင်ပွဲတစ်ခုကို ဖော်ဆောင်နိုင်မယ်ဆိုရင် ၂၀၂၆ ကမ္ဘာ့ဖလားပြိုင်ပွဲကြီးဆီ သေချာပေါက်ပါဝင်ယှဉ်ပြိုင်ခွင့် ရရှိသွားပါလိမ့်မယ်။

နှစ်ပွဲကစားရဖို့ကျန်ရှိနေသေးပေမယ့် အီရန်ကတော့ အုပ်စုဗိုလ်အဖြစ်ဆက်လက်ရပ်တည်နိုင်ဖို့ ကြိုးစားသွားရပါဦးမယ်။ ဒါပေမယ့် ယမန်နေ့ပွဲစဉ်ရလဒ်ပိုင်းအရ အနည်းဆုံးတော့ အုပ်စုထိပ်ဆုံးနှစ်နေရာမှာ ရပ်တည်ဖို့ သေချာသွားခဲ့ပြီး ကမ္ဘာ့ဖလားပြိုင်ပွဲကြီးကို လေးကြိမ်ဆက်ယှဉ်ပြိုင်ခွင့် ရရှိသွားခဲ့ပါတယ်။

အခုကမ္ဘာ့ဖလားပြိုင်ပွဲကြီးအတွက် အီရန်အပြင် အခြားအသင်းငါးခုသာ ခြေစစ်ပွဲအောင်မြင်ထားပါတယ်။ ဒီအသင်းတွေကတော့ အိမ်ရှင်အဖြစ်လက်ခံကျင်းပမယ့် အမေရိကန်၊ ကနေဒါနဲ့ မက္ကဆီကို၊ အာရှဇုန်မှ ဂျပန်နဲ့ သမုဒ္ဒရာပိုင်းဇုန်မှ နယူးဇီလန်တို့ ဖြစ်ပါတယ်။ ပြိုင်ပွဲစတင်ဖို့ တစ်နှစ်ကျော်လိုအပ်နေသေးပြီး အသင်းအများစုကတော့ လက်ကျန် ၄၂ နေရာအတွက် ဆက်လက်တိုက်ပွဲဝင်နေကြပါတယ်။