ဗင်နီးစီးယက်စ်က ကမ္ဘာ့လုပ်ခလစာအများဆုံးဘောလုံးသမားစာရင်းမှာ ပါဝင်နေသူတစ်ဦး ဖြစ်ပါတယ်။ အသက်-၂၄ နှစ်အရွယ် ရီးရဲလ်မက်ဒရစ်စူပါစတားက ဆန်တီယာဂိုဘာနေဗျူးမှာ သီတင်းတစ်ပတ်လုပ်ခ ပေါင် ၃၅၀,၀၀၀ ဝန်းကျင် ရရှိနေပါတယ်။

ဒီလိုငွေကြေးတွေက ဘရာဇီးတောင်ပံကစားသမားအတွက် စပိန်နိုင်ငံရဲ့မြို့တော်မှာ အံ့အားသင့်လောက်စရာ လူနေမှုဘဝပုံစံတစ်ခုကို ဖန်တီးထုဆစ်ပေးနိုင်ပါတယ်။ ရှေ့ပိုင်းနှစ်တွေမှာ ဗင်နီးစီးယက်စ်က Audi အမှတ်တံဆိပ်မော်တော်ကားတွေကို ထည်လဲမောင်းနှင်နေခဲ့ပေမယ့် အခုအချိန်မှာတော့ သူက ပေါင် ၁၆၅,၀၀၀ တန်ဖိုးရှိ BMW တစ်စီးနဲ့ အခြေကျနေခဲ့ပါပြီ။

သတင်းတွေအရ ဗင်နီးစီးယက်စ်ဟာ နေရေးထိုင်ရေးအတွက် မက်ဒရစ်မြို့လူကုံထံအရပ်မှာ ပေါင် ၁၀ သန်းတန်နေအိမ်တစ်လုံးကို ၂၀၁၈ ခုနှစ်အတွင်း ဝယ်ယူခဲ့တယ်လို့ သိရပါတယ်။ ဒါကြောင့် ဗင်နီးစီးယက်စ်တစ်ယောက် ငွေကြေးတွေကို ဘယ်လိုစီမံခန့်ခွဲသလဲဆိုတာ လေ့လာကြည့်ကြမယ်။

မင်သားလေးတစ်ပါးလို
------------------------
ဗင်နီစီးယက်စ်က ၂၀၁၇ ခုနှစ်မှာ ပေါင်သန်း ၄၀ တန်ကြေးရှိ အပြောင်းအရွှေ့သဘောတူညီမှုတစ်ခုနဲ့အတူ ရီးရဲလ်မက်ဒရစ်အတွက် တရားဝင်လက်မှတ်ရေးထိုးခဲ့ပါတယ်။ ဒါပေမယ့် သူက စပိန်ဘီလူးကြီးဆီ နောက်တစ်နှစ်အကြာ၊ အသက်-၁၈ နှစ်ပြည့်မြောက်ပြီးချိန်မှသာ အပြီးသတ်တရားဝင်ရောက်ရှိလာခဲ့ပါတယ်။

စပိန်မြေဆီရောက်ရှိလာပြီး မကြာခင်မှာပဲ ဗင်နီးစီးယက်စ်က မက်ဒရစ်မြို့၊ La Moraleja လူကုံထံရပ်ကွက်ရှိ အံ့အားသင့်စရာ နေအိမ်တစ်လုံးအတွက် သူ့ရဲ့ငွေကြေးတွေကို သုံးစွဲခဲ့ပါတယ်။အမေရိကန်နိုင်ငံရဲ့ကွန်နက်တီကတ်ပြည်နယ်၊ ဂရင်းဝစ်ချ်ဒေသလိုပဲ ဒီအရပ်ဒေသမှာ စပိန်နိုင်ငံရဲ့ အချမ်းသာဆုံးလူကုံထံတွေ နေထိုင်ကြပါတယ်။

ဒေးဗစ်ဘက်ခမ်၊ ဘန်ဇီမာ၊ စီရော်နယ်ဒိုနဲ့ ဟီဂူအင်အပါအဝင် ရီးရဲလ်မက်ဒရစ်ကြယ်ပွင့်အချို့လည်း La Moraleja ဒေသမှာ နေအိမ်တွေ ဝယ်ယူခဲ့ဖူးပါတယ်။ဒီအရပ်ဒေသမှာ ဂေါက်ကွင်းများစွာအပြင် ကလေးသူငယ်တွေအတွက် ပုဂ္ဂလိကစာသင်ကျောင်းတွေလည်း တည်ထောင်ထားပါတယ်။ ဗင်နီးစီးယက်စ်ရဲ့နေအိမ်က ရီးရဲလ်မက်ဒရစ်လေ့ကျင့်ရေးကွင်းနဲ့ ၁၅ မိနစ်စာအကွာအဝေး၊ ဘာနေဗျူးကွင်းနဲ့လည်း မိနစ် ၃၀ စာအကွာအဝေးအတွင်းမှာ တည်ရှိနေပါတယ်။

ဒီအိမ်ကြီးထဲမှာဆိုရင် အိပ်ခန်းခြောက်ခန်း၊ ရေချိုးခန်းခြောက်ခန်းအပြင် ဧည့်ခန်းကျယ်များစွာလည်း ပါရှိပါတယ်။ ဒါ့အပြင် ကိုဘီဘရိုင်ယန်၊ ပီလီတို့လို အားကစားအကျော်အမော်တွေရဲ့ပုံတွေကို ချိတ်ဆွဲထားတဲ့ ခေတ်မီ Gym တစ်ခုလည်း ရှိနေပါတယ်။ ဗင်နီးစီယက်စ်ရဲ့အိမ်ထဲမှာ ရုပ်ရှင်ရုံ၊ ရေနွေးငွေ့ခန်းနဲ့ ချွေးထုတ်ခန်းတို့လည်း ရှိနေပါသေးတယ်။ အိမ်ပြင်ပဧရိယာမှာတော့ ပုဂ္ဂလိကရေကူးကန်တစ်ခု၊ တင်းနစ်ကွင်းနဲ့ မြက်ခင်းတုဘောလုံးကွင်းတို့ကို စိတ်တိုင်းကျသုံးစွဲနိုင်အောင် ဖန်တီးပေးထားပါတယ်။

မော်တော်ကားများ
--------------------
ဗင်နီးစီးယက်စ်ရဲ့မော်တော်ကားစုဆောင်းမှုက ရီးရဲလ်မက်ဒရစ်အသင်းရရှိတဲ့ စပွန်ဆာစာချုပ်တွေနဲ့ တိုက်ရိုက်ချိတ်ဆက်ထားပါတယ်။ လွန်ခဲ့တဲ့နှစ်တွေအတွင်း ကလပ်အသင်းရဲ့မူဝါဒအရ Audi အမှတ်တံဆိပ်မော်တော်ကားများစွာကို ဗင်နီးစီးယက်စ် စုဆောင်းထားရှိခဲ့ပါတယ်။ ဗင်နီးစီးယက်စ်က ပေါင် ၅၅,၀၀၀ တန်ကြေးရှိ Audi A7 တစ်စီးနဲ့အတူ ခရီးစဉ်တွေကို စတင်ခဲ့ပါတယ်။

နောက်ပိုင်းမှာ သူက ပေါင် ၁၀၅,၀၀၀ အထိ တန်ကြေးမြင့်တက်နိုင်တဲ့ ကျယ်ဝန်းသော SUV ပုံစံ Q8 မော်ဒယ်လ်အမျိုးအစား အမိုက်စားမော်တော်ကားကို စီးနင်းခဲ့ပါတယ်။ ဗင်နီးစီယက်စ်ရဲ့ Audi အမှတ်တံဆိပ်နောက်ဆုံးမော်တော်ကားကတော့ Q7 ဖြစ်ပါတယ်။ အဲ့ဒီမော်တော်ကားအမျိုးအစားကတော့ ပေါင် ၇၀,၀၀၀ ဝန်းကျင် တန်ကြေးရှိပါတယ်။

ဒီမော်တော်ကားတွေအကုန်လုံးက ပေါင် ၂၁ သန်းဝန်းကျင်ကြွယ်ဝချမ်းသာနေပြီဖြစ်တဲ့ အမျိုးသားတစ်ဦးအတွက် သင့်တင့်မျှတပြီး ရွေးချယ်ချင်စရာအကောင်းဆုံး ကုန်ပစ္စည်းတွေ ဖြစ်ပါတယ်။ ပြီးခဲ့တဲ့စက်တင်ဘာလအတွင်းမှာ ရီးရဲလ်မက်ဒရစ်က သူတို့အသင်းအတွက် နောက်ဆုံးမော်တော်ကားစပွန်ဆာအဖြစ် BMW နဲ့အတူ သဘောတူညီမှုတစ်ခုကို လက်မှတ်ရေးထိုးခဲ့ပါတယ်။ ဒါက ဗင်နီးစီးယက်စ်ဆီ အံ့သြလောက်စရာမော်တော်ကားတစ်စီး ရောက်ရှိလာစေရေး အကူအညီဖြစ်စေပါတယ်။

သူက ပေါင် ၁၆၅,၀၀၀ ဝန်းကျင်တန်ကြေးရှိပြီး BMW ထုတ်ကုန်တွေအနက် လျှပ်စစ်စွမ်းအင်သုံး အမြန်ဆုံးမော်တော်ကားဖြစ်တဲ့ i7 M70 တစ်စီးကို လက်ဝယ်ပိုင်ပိုင်ရရှိခဲ့ပါတယ်။

အားကစားဖိနပ်များဝယ်ယူစုဆောင်းခြင်းအမှုမှာ ခုံမင်တပ်မက်လွန်းသူ
-------------------------------------------------------------
Marca သတင်းစာရဲ့အဆိုအရ ပေါ့ပါ့ပါးပါးဝတ်ဆင်ရန်အထူးသင့်လျော်တဲ့အားကစားဖိနပ်တွေ ဝယ်ယူစုဆောင်းခြင်းအမှုကို စွဲလန်းနေတဲ့အကျင့်တစ်ခု ဗင်နီးစီးယက်စ်မှာရှိတယ်လို့ သိရပါတယ်။ လူမှုကွန်ရက်စာမျက်နှာတွေမှာလည်း သူ့ကို Nike Air Jordans နဲ့အတူ မကြာခဏမြင်တွေ့ရလေ့ ရှိပါတယ်။

ဘာကြောင့်ဖိနပ်တွေရာနဲ့ချီပြီး စုဆောင်းထားတာလဲဆိုတဲ့မေးခွန်းကို ဗင်နီးစီးယက်စ်က ဖိနပ်စုဆောင်းခြင်းအလေ့အကျင့်ကို ကလေးဘဝကတည်းကပင် စွဲလန်းခဲ့လို့  အခုလိုစုဆောင်းဖြစ်တာပါလို့ ထုတ်ပြောခဲ့ပါတယ်။ သူက Joe La Puma ဦးဆောင်ကျင်းပတဲ့ အခမ်းအနားတစ်ခုဆီ တက်ရောက်ဖို့ လော့စ်အိန်ဂျယ်လိစ်ဆီ sneaker mecca Flight Club စီးကာ တက်ရောက်ခဲ့ပါတယ်။

ဒီနေရာမှာ ဗင်နီးစီးယက်စ်က Louis Vuitton x Nike Air Force 1s ဖိနပ်ကိုလည်း ကြိုက်နှစ်သက်တယ်ဆိုတာ ထုတ်ပြောခဲ့ဖူးပါတယ်။ ရီးရဲလ်မက်ဒရစ်စတား ပိုင်ဆိုင်ထားတဲ့ အချို့ရှားပါးဖိနပ်တွေက အွန်လိုင်းဈေးကွက်မှာ ပေါင် ၁၂,၀၀၀ အထိ တန်ကြေးရှိပါတယ်။ ဘရာဇီးကြယ်ပွင့်က သူ့ရဲ့ဖိနပ်တွေကို နေအိမ်အတွင်းရှိ အထူးဗီရိုကြီးတစ်ခုထဲမှာ သိမ်းဆည်းထားပါတယ်။

လတ်တလောနှလုံးသားရေးရာ
--------------------------
လူမှုကွန်ရက်စာမျက်နှာထက် ထင်ရှားကျော်ကြားပြီး ရင်သပ်ရှုမောဖွယ်မော်ဒယ်လ်တစ်ဦးဖြစ်တဲ့ မာရီယာဂျူလီယာမာဇောလီနဲ့ ဗင်နီးစီးယက်စ်တို့ရဲ့ အချစ်ဇာတ်လမ်းက ၂၀၁၉ ခုနှစ်မှာ လူသိရှင်ကြားထွက်ပေါ်လာခဲ့ပါတယ်။ အဲ့ဒီကာလမတိုင်ခင်အထိတော့ ဘောလုံးကစားရာမှာ လျှပ်စီးလက်သလိုမြန်ဆန်လွန်းလှတဲ့ တောင်ပံကစားသမားက သူတို့နှစ်ဦးရဲ့အချစ်ဇာတ်လမ်းကို ငြင်းဆန်နေခဲ့ပါတယ်။

ဘရာဇီးအခြေစိုက်သတင်းစာ Lance ကတော့ ဗင်နီးစီးယက်စ်နဲ့ မာရီယာတို့အကြား ရင်းနှီးတဲ့ဆက်ဆံရေးတစ်ရပ် ရှိနေတယ်ဆိုတာကို ဖွင့်ချခဲ့ပါတယ်။ ဆိုရှယ်မီဒီယာပေါ်မှာ Selfie ဓါတ်ပုံတွေကို ဗင်နီးစီးယက်စ်နဲ့ မာရီယာတို့ အပြန်အလှန်ဝေမျှလာပြီးနောက် သူတို့နှစ်ဦးအကြားမှာ တစ်ခုခုတော့ရှိနေပြီလို့ ပရိသတ်တွေ ထင်ကြေးပေးလာခဲ့ပါတယ်။

ဒီ Selfie ဓါတ်ပုံတွေကို မက်ဒရစ်မြို့မှာရှိတဲ့ ရေချိုးခန်းတစ်ခုအတွင်း ရိုက်ကူးခဲ့တယ်ဆိုတာ ပရိသတ်တွေ အလျှင်အမြန်သတိပြုမိခဲ့ပြီးနောက် လျှို့ဝှက်ချက်တွေလည်း တသီတတန်းကြီး ထွက်ပေါ်လာခဲ့ပါတယ်။ ဒါပေမယ့် ဗင်နီးစီးယက်စ်နဲ့ မာရီယာတို့က သူတို့နှစ်ဦး ဘယ်လိုဆုံတွေ့ခဲ့သလဲ၊ အတိတ်ကာလတွေကတည်းက အချင်းချင်းသိကျွမ်းခဲ့သလားဆိုတာကိုတော့ ဝေမျှလာခြင်း မရှိပါဘူး။

မာရီယာက ဗင်နီးစီးယက်စ်နဲ့လက်တွဲပြီးမှ ကျော်ကြားလာတဲ့မိန်းကလေးတစ်ဦးတော့ မဟုတ်ပါဘူး။ သူမက Instagram လူမှုကွန်ရက်မှာ လွှမ်းမိုးမှုအားကောင်းတဲ့ပို့စ်တွေကို အသုံးချပြီး ဖော်လိုဝါများစွာ ပိုင်ဆိုင်ထားသလို ဘရာဇီးအခြေစိုက်ရုပ်မြင်သံကြားအစီအစဉ်တစ်ခုမှာလည်း အစီအစဉ်တင်ဆက်သူအဖြစ် လုပ်ကိုင်နေခဲ့ပါတယ်။

မာရီယာက ဖက်ရှင်နဲ့ ခရီးသွားဆောင်းပါးတွေကို ဖန်တီးပြီး အွန်လိုင်းလူမှုကွန်ရက်တွေမှာ သြဇာလွှမ်းမိုးလေ့ ရှိပါတယ်။ သူမရဲ့အမိုက်စားခန္ဓာကိုယ်နဲ့အတူ ဘော်ဒီကောက်ကြောင်းတွေကြောင့် အွန်လိုင်းပရိသတ်တွေအကြားမှာလည်း လူကြိုက်များလေ့ ရှိပါတယ်။ မာရီယာက အစားအသောက်ကောင်းတွေ စားသောက်ခြင်းနဲ့ လေ့ကျင့်ခန်းပြုလုပ်ခြင်းတို့ပါဝင်တဲ့ ကျန်းမာတဲ့လူနေမှုဘဝပုံစံတစ်ခု တည်ဆောက်ကြဖို့ကိုလည်း လှုံ့ဆော်ပေးနေပါတယ်။

ခရီးသွားလာမှုကို ကြိုက်နှစ်သက်တဲ့ သူမက ရီးရဲလ်မက်ဒရစ်(သို့မဟုတ်)ဘရာဇီးအသင်းအတွက် ဗင်နီးစီးယက်စ် ကစားပေးချိန်တိုင်း ပွဲကြည့်စင်ပေါ်မှာ အမြဲလိုလိုရှိနေပြီး သူမရဲ့ချစ်သူကို အားပေးနေတက်ပါတယ်။