ချန်ပီယံလိဂ်ဝင်ခွင့်ရကလပ်အသင်းဆီ ပြောင်းရွှေ့လုနီးပါးဖြစ်ခဲ့ပုံကို ဖွင့်ဟလာတဲ့ ဟာလန်း
၂၀၁၆ ခုနှစ်မှာ ချန်ပီယံလိဂ်ဝင်ခွင့်ရကလပ်အသင်းတစ်ခုဆီ ရောက်ရှိလုနီးပါးဖြစ်ခဲ့ပုံကို မန်စီးတီးကြယ်ပွင့်ဟာလန်းက ထုတ်ဖော်ပြောကြားလိုက်ပါတယ်။ ကိုပင်ဟေဂင်နဲ့ ကစားရမယ့် ချန်ပီယံလိဂ် ၁၆ သင်းရှုံးထွက်(ဒုတိယအကျော့)ပွဲစဉ်မတိုင်ခင် သတင်းထောက်တွေနဲ့တွေ့ဆုံချိန် ဟာလန်းက အခုလိုပြောပြခဲ့တာပါ။
မန်စီးတီးဂိုးသွင်းစက်က အခုတစ်ကြိမ်ရင်ဆိုင်ရမယ့်ပြိုင်ဘက်ဖြစ်တဲ့ ကိုပင်ဟေဂင်ဆီမှာ ၂၀၁၆ ခုနှစ်အတွင်း စမ်းသပ်စစ်ဆေးမှုခံယူပြီးနောက် လက်မှတ်ရေးထိုးလုနီးပါး ဖြစ်ခဲ့ပေမယ့် နောက်ဆုံးမှာတော့ မိုလ်ဒီဆီ ပြောင်းရွှေ့ရောက်ရှိသွားပါတယ်။ ဒါပေမယ့် ကိုပင်ဟေဂင် အသင်းဘက်ကလည်း သူ့ကို အလိုမရှိခဲ့ဘဲ အပြောင်းအရွှေ့ဟာ တရားဝင်ပေါ်ပေါက်လာခဲ့ခြင်း မရှိပါဘူး။
ဒိန်းမတ်ကလပ် အသင်းဆီ မပြောင်းရွှေ့ဖြစ်ခဲ့ပေမယ့် မန်စီးတီးကြယ်ပွင့်က သူ့နာမည်ရိုက်နှိပ်ထားတဲ့ ကိုပင်ဟေဂင်ကျောနံပါတ်-၉ ဂျာစီကို လက်ခံရရှိခဲ့ပါတယ်။
ကိုပင်ဟေဂင်ဆီ ပြောင်းရွှေ့ဖို့နီးစပ်ခဲ့ပုံဖွင့်ဟပြောပြရာမှာ မန်စီးတီးတိုက်စစ်မှူးက “၂၀၁၆ ခုနှစ်၊ ကိုပင်ဟေဂင်အသင်းမှာ ကျွန်တော်ရဲ့ခြေစွမ်း စမ်းသပ်ခံခဲ့ပါတယ်။ ကလပ်အသင်းမှာ ရှိတဲ့ ကောင်လေးအချို့ကတော့ ကျွန်တော့်ကို လိုလိုလားလားရှိခဲ့ပေမယ့် လူတိုင်းတော့ မဟုတ်ပါဘူး။ ဒီအပြောင်းအရွှေ့ မဖြစ်ပေါ်လာလို့ သူတို့အတွက် ဝမ်းနည်းစရာပါပဲ။ ကျွန်တော့်အတွက်တော့ ပိုကောင်းသွားတာမျိုး ဖြစ်ကောင်းဖြစ်နိုင်ပါတယ်။ ဘာကြောင့်လဲဆိုတော့ ကျွန်တော်က မိုလ်ဒီဆီ ပြောင်းရွှေ့ခဲ့ပြီး ဒါက ကောင်းမွန်တဲ့ရွေးချယ်မှုတစ်ခု ဖြစ်ခဲ့လို့ပါ။ ဒါပေမယ့် ကိုပင်ဟေဂင်အသင်းကို ကျွန်တော် ကြိုက်ပါတယ်။ နှစ်လိုဖွယ်ကောင်းတဲ့ ကလပ်အသင်းတစ်ခုပါ။ ကိုပင်ဟေဂင်မြို့မှာ ကျွန်တော့်သူငယ်ချင်းနှစ်ဦးနေထိုင်နေပြီး ပွဲစဉ်အတော်များများကို သွားရောက်ကြည့်ရှုကြပါတယ်။
သူတို့တွေ ပျော်ရွှင်နေကြပါတယ်။ အမှန်ပါပဲ၊ ကျွန်တော်လည်း ကိုပင်ဟေဂင်ဆီ ပြောင်းရွှေ့ဖို့ စိတ်ဝင်စားခဲ့ပါတယ်။ ယူ-၁၉ အသင်းအတွက် ဖြစ်ပါလိမ့်မယ်။ အမှန်ပါပဲ၊ ကျွန်တော်ကိုယ်တိုင်စိတ်ဝင်စားခဲ့လို့ ကျွန်တော် ပြောင်းရွှေ့ချင်ခဲ့ပါတယ်။ အဲ့ဒီအချိန်တုန်းက နည်းပြဖြစ်နေတဲ့ ဆိုလ်ဘက်ကန်နဲ့ စကားပြောဆိုခဲ့ဖူးတာတောင် အမှတ်ရနေပါသေးတယ်။ ကျောနံပါတ်-၉ မှာ ကျွန်တော့်နာမည်ရေးထားတဲ့ ဂျာစီအင်္ကျီတောင် လက်ခံရရှိခဲ့ပါတယ်။ ကျွန်တော် ဒီဂျာစီကို အိမ်မှာ သိမ်းထားပါတယ်။ ဒီအပြောင်းအရွှေ့ကတော့ ဘယ်တော့မှမဖြစ်လာခဲ့ပါဘူး။ ကျွန်တော့်ရဲ့ ကံကြမ္မာကလည်း တခြားနည်းလမ်းနဲ့ အခုထိ သင့်တော်တဲ့ပုံစံမျိုး ဖြစ်သွားခဲ့ပါတယ်”လို့ ရှင်းပြခဲ့ပါတယ်။
ကိုပင်ဟေဂင်က ဟာလန်းရဲ့စူပါခြေစွမ်းကို ပိုင်ဆိုင်ခွင့်ဆုံးရှုံးခဲ့ရပြီး နော်ဝေး ကလပ်မိုလ်ဒီကသာ ပိုင်ဆိုင်ခဲ့ရပါတယ်။ ဒီနောက်မှာတော့ ဆဲလ်ဘတ်က သူ့ကို ခေါ်ယူသွားခဲ့ပါတယ်။ ဆက်လက်ပြီး ဟာလန်းက ဆဲလ်ဘတ်မှ ဒေ့ါမွန်ဆီ ပြောင်းရွှေ့ရောက်ရှိလာပြီး ၂၀၂၂ ခုနှစ်၊ နွေရာသီမှာတော့ ပက်ဂွါဒီယိုလာ ကိုင်တွယ်နေတဲ့ မန်စီးတီးနဲ့ ပူးပေါင်းခဲ့ပါတယ်။
အယ်တီဟတ်ကွင်းအဖွင့်ဘောလုံးရာသီမှာပဲ ဟာလန်းက ပြိုင်ပွဲစုံ ၅၂ ဂိုးအထိ သွင်းယူခဲ့သလို လက်ရှိဘောလုံးရာသီမှာလည်း ၂၈ ဂိုးအထိ သွင်းယူကာ အထင်ကြီးလောက်စရာစွမ်းဆောင်ရည်မျိုး ပြသထားပါတယ်။
