ပက်ဂွါဒီယိုလာက ဟာလန်းမကစားနိုင်တဲ့ တိုက်စစ်ပိုင်းကို ဦးဆောင်ပေးနိုင်တဲ့ကစားသမားတွေ သူ့အသင်းမှာ အများအပြားရှိပါတယ်လို့ ပြောကြားခဲ့ပါတယ်။တနင်္ဂနွေနေ့၊ ဘုန်းမောက်ကို အနိုင်ရရှိခဲ့တဲ့ အက်ဖ်အေဖလားကွာတားဖိုင်နယ်ပွဲစဉ်အတွင်း နော်ဝေသားတိုက်စစ်မှူး ဘယ်ခြေကျင်းဝတ်ဒဏ်ရာရရှိခဲ့ပြီး သီတင်းပတ် ငါးပတ်မှ ခုနစ်ပတ်အထိ အနားယူသွားရဖွယ်ရှိပါတယ်။

ကမ္ဘာ့အကောင်းဆုံးတိုက်စစ်မှူးတစ်ဦးရဲ့နေရာမှာ တိုက်ရိုက်အစားထိုးနိုင်ဖို့ဆိုတာ မဖြစ်နိုင်ပေမယ့်လည်း ပက်ဂွါဒီယိုလာကတော့ အသင်းတိုက်စစ်မြှားဦးနေရာမှာ ကစားပေးနိုင်သူကို ရွေးချယ်ရခြင်းအတွက် ကျေနပ်နေခဲ့ပါတယ်။လက်စတာနဲ့ရင်ဆိုင်ရမယ့် ဗုဒ္ဓဟူးနေ့အဝေးကွင်းပွဲစဉ်မတိုင်ခင် ပက်ဂွါဒီယိုလာဆီ ဇန်နဝါရီအပြောင်းအရွှေ့မှာ အသစ်ခေါ်ယူထားတဲ့ အိုမာမာမွတ်ရှ်အနေဖြင့် တိုက်စစ်မြှားဦးနေရာအတွက် ကစားပေးဖို့ အဆင်သင့်ဖြစ်နေပြီလားဆိုတဲ့မေးခွန်း ရောက်ရှိလာပါတယ်။

ကတ္တလန်သားကတော့ ဒီမေးခွန်းကို အပြုသဘောဆောင်ဖြေကြားခဲ့ပေမယ့် အလားတူပုံစံမျိုးစွမ်းဆောင်ပေးနိုင်မယ့် ကစားသမားတွေကိုလည်း ရွေးထုတ်ပြခဲ့ပါတယ်။ ပက်ဂွါဒီယိုလာက “ အိုမာမာမွတ်ရှ်လည်း တိုက်စစ်ပိုင်းမှာ ကစားနိုင်ပါတယ်။ ဒီနေရာအတွက် ဖိုဒန်လည်း ရှိတယ်၊ မက်အာတီလည်းရှိတယ်၊ အော်စကာဘော့ဘ်လည်း ကစားပေးနိုင်ပါတယ်။ ဒီနေရာမှာကစားပေးနိုင်သူတွေ အများကြီးပါပဲ”လို့ ပြောပါတယ်။

ဆက်လက်ပြီး သူက အီဂျစ်လက်ရွေးစင်တိုက်စစ်မှူးမှာ ပြိုင်ဘက်အသင်းဂိုးပေါက်ဆီ အပြင်းအထန်ခြိမ်းခြောက်နိုင်စွမ်း အပြည့်ရှိတယ်လို့ အသေးစိတ်ရှင်းပြခဲ့ပါတယ်။ ပက်ဂွါဒီယိုလာက “ အိုမာမာမွတ်ရှ်က ပြိုင်ဘက်ဂိုးဧရိယာနဲ့ အနီးကပ်ဆုံးနေရာမှာကစားရတာကို ကြိုက်နှစ်သက်ပါတယ်။ သူက ဂိုးသွင်းရတာကို ကြိုက်နှစ်သက်သလို ဂိုးသွင်းယူနိုင်ဖို့အတွက်လည်း စူးရှတဲ့အမြင်မျိုးကို ပိုင်ဆိုင်ထားပါတယ်”လို့ ဆိုပါတယ်။