ပက်ဂွါဒီယိုလာက ယူနိုက်တက်ဂန္တဝင် ဝိန်းရွန်းနီကို မန်စီးတီးအသင်း ဘယ်လိုအလုပ်လုပ်တယ်ဆိုတာ လာရောက်လေ့လာဖို့ ကြိုဆိုပါတယ်ဆိုပြီး ဖိတ်ခေါ်သွားခဲ့ပါတယ်။

အင်္ဂလန်အသင်းခေါင်းဆောင်ဟောင်းက သူသာ ဂွါဒီယိုလာရဲ့လက်ထောက်ဖြစ်လာမယ်ဆိုရင် အီတီဟတ်ကို လမ်းလျှောက်သွားလိုက်မယ်ဆိုပြီး ဒီအပတ်အတွင်းမှာ ပြောကြားခဲ့ပါတယ်။ ယခုအချိန်မှာတော့ ဂွါဒီယိုလာက ရွန်းနီသာ လာရောက် လေ့လာမယ်ဆိုရင် အမြဲတံခါးဖွင့်ထားပါတယ်လို့ ပြောခဲ့တာ ဖြစ်ပါတယ်။

ဂွါဒီယိုလာက "သူ ဘယ်မှာနေလဲဆိုတာ ကျွန်တော်မသိပါဘူး။ ချက်ရှိုင်းယားမှာလား? ဒါဆိုရင် နီးနီးလေးပဲ။
သူ အချိန်မရွေးဒီကိုလာနိုင်ပါတယ်။ သူ့ကို ကြိုဆိုနေပါတယ်"လို့ ပြောခဲ့ပါတယ်။ ဂွါဒီယိုလာဟာ အင်္ဂလန်မှာ နည်းပြလုပ်နေတာ ၈နှစ်ကြာပြီဖြစ်တဲ့အတွက် ရွန်းနီက ဘယ်လောက်တော်တယ်ဆိုတာ သိရှိထားပါတယ်။

ဆက်လက်ပြီး ဂွါဒီယိုလာက "မန်ချက်စတာမြို့အတွက် သူက အရမ်းအရေးပါပါတယ်။ ဒါပေမယ့် သူက သရဲနီတစ်ဦးပါ။ သူက ယူနိုက်တက်အသင်းသားတစ်ဦးဖြစ်ပေမယ့် ကျွန်တော်တို့အားလုံးအတွက် သူ့ပုံရိပ်က ပိုကောင်းစေပါတယ်။ ရွန်းနီက အင်္ဂလန်မှာ သမိုင်းတစ်လျှောက် အကောင်းဆုံးကစားသမားတစ်ဦးဖြစ်တဲ့အတွက် ကျွန်တော်တို့အတွက်သာ ကူညီပေးမယ်ဆိုရင် အရမ်းကောင်းမှာပါ။ သူ ဒီမှာ နှစ်ပေါင်းများစွာ အလုပ်လုပ်နေတဲ့အတွက် ဘာလုပ်ရမယ်ဆိုတာ သူသိပြီးသားပါ။ သူ ပရီးမီးယားလိဂ်ဖလားတွေအများကြီးရခဲ့ပါတယ်။ ဒါကြောင့် ဒီမှာကစားရတာ ဘယ်လောက်ခက်ခဲတယ်ဆိုတာ သူသိသလို ဘာကြောင့်ခက်တယ်ဆိုတာလည်း သိနေမှာပါ"လို့ ပြောခဲ့ပါတယ်။