ဘာနာဒိုဆေးလ်ဗားက မန်စီးတီးအသင်းဆီ ဦးတည်ကျရောက်နေတဲ့ ဝေဖန်သံတွေကို တုံ့ပြန်လာခဲ့ပြီး သူနဲ့ သူ့အသင်းဖော်တွေရဲ့အကောင်းဆုံးအချိန်ကာလ ကျော်လွန်သွားခဲ့ပြီဆိုတဲ့ ဆွေးနွေးမှုတွေကိုလည်း ဒေါသတကြီးပယ်ချခဲ့ပါတယ်။

မန်စီးတီးနည်းပြအဖြစ် ပက်ဂွါဒီယိုလာစတင်တာဝန်ယူတဲ့ ၂၀၁၆ ခုနှစ်နောက်ပိုင်း အဆိုးဝါးဆုံးရာသီကို ဖြတ်သန်းနေရပေမယ့် ဘုန်းမောက်ကို အထင်ကြီးလောက်စရာကောင်းတဲ့ Comeback ဖြင့် အနိုင်ယူပြီးနောက် အက်ဖ်အေဖလားဆီမီးဖိုင်နယ်အဆင့်တက်လှမ်းကာ ဗိုလ်စွဲနိုင်ဖို့အတွက် အခွင့်အရေးရှိနေဆဲဖြစ်ပါတယ်။ အခုရာသီ၊ ပြိုင်ပွဲစုံ ၁၅ ပွဲအထိ ရှုံးနိမ့်မှုမှာ မန်စီးတီးရဲ့အသက်အရွယ်ရနေတဲ့ လူစာရင်းပိုင်းက အဓိကဝေဖန်ထောက်ပြစရာ အချက်အလက်တစ်ခုဖြစ်ခဲ့ပေမယ့် ကွင်းလယ်ကစားသမားကတော့ ပွဲပြီးသတင်းစာရှင်းလင်းပွဲမှာ သူနဲ့ သူ့အသင်းဖော်တွေကို အင်တိုက်အားတိုက်ကာကွယ်ပေးခဲ့ပါတယ်။

ဘုန်းမောက်နဲ့ပွဲစဉ်အတွင်း တိုက်စစ်ပိုင်းကစားသမားခြောက်ဦးအနက် လေးဦးက အသက် ၃၀ နှစ်နဲ့အထက် ကစားသမားတွေ ဖြစ်ကြပါတယ်။ အထူးသဖြင့် ဒီဘရိုင်း (၃၃ နှစ်)နဲ့ ဂမ်ဒိုဂန်(၃၄ နှစ်)တို့ ပွဲထွက်လူစာရင်းမှာ ပါဝင်ခဲ့ပါတယ်။ဒုတိယပိုင်းပွဲချိန်တွေမှာတော့ မန်စီးတီးက အပြောင်းအလဲတွေပြုလုပ်ပြီး ပြိုင်ဘက်ကို လုံးဝလွှမ်းမိုးကာ အနိုင်ရလဒ်တစ်ခုဖော်ဆောင်ခဲ့ပါတယ်။ ပွဲစဉ်အပြီး အသင်းရဲ့ပျှမ်းမျှအသက်အရွယ်အပေါ် ပရိသတ်တွေရဲ့မေးခွန်းထုတ်မှုအကြောင်း သတင်းထောက်တွေက မေးမြန်းလာချိန် ဘာနာဒိုဆေးလ်ဗား အပြင်းအထန်တုံ့ပြန်လာခဲ့ပါတယ်။

ဘာနာဒိုဆေးလ်ဗားက “ဘယ်ကစားသမားဆိုတာ ကျွန်တော့်ကိုပြောပြပါ? အမည်အတိအကျပြောပါ။ ကျွန်တော်လည်း အသက် ၃၀ နှစ်အရွယ်၊ ကိုဗာဆစ်လည်း အသက် ၃၀ နှစ်အရွယ် ရှိပါပြီ။ အသက် ၃၆ နှစ်အရွယ်ဘောလုံးသမားတွေအကြောင်း ဆွေးနွေးနေတာမျိုး မဟုတ်ပါဘူး။ ကျွန်တော်တို့မှာ အလွန်ဆိုးဝါးတဲ့ ခြောက်လ(သို့မဟုတ်)လေးလတာကာလ ရှိပါတယ်။ ဒီနေရာမှာ မထင်မှတ်ဘဲ ကျွန်တော်တို့ အိုမင်းနေပြီဆိုတဲ့အချက် ထွက်ပေါ်လာပါတယ်။ 

ကျွန်တော်တို့မှာ လုံလောက်တဲ့ကောင်းမွန်မှုမျိုး မရှိလို့လား? ပြီးခဲ့တဲ့ဘောလုံးရာသီရှစ်ခုမှာ ကျွန်တော်တို့ ပရီးမီးယားလိဂ်ချန်ပီယံခြောက်ကြိမ် ဖြစ်ခဲ့ပါတယ်။ ဒီဆိုးရွားတဲ့ လေးလတာကာလအတွက်ပဲ ကျွန်တော်တို့က အိုမင်းပေးရမှာလား? ဒီလိုပြောနေသူတွေက ဘောလုံးပွဲအကြောင်း နားမလည်သူတွေ၊ ဘောလုံးမကန်ဖူးတဲ့သူတွေ ဖြစ်ပါတယ်။ ဘောလုံးနဲ့ပတ်သက်ပြီး လုံးဝနားမလည်သူတောင် ဖြစ်နိုင်ပါတယ်”လို့ ပြောပါတယ်။

တဖက်မှာလည်း မန်စီးတီးက ပက်ဂွါဒီယိုလာလက်အောက် ရမှတ်အနည်းဆုံးဘောလုံးရာသီကို ဖြတ်သန်းရဖို့ သေချာသွားခဲ့ပြီး စပိန်သားရဲ့ဂန္တဝင်မြောက် ၁၆ နှစ်တာနည်းပြသက်တမ်းကာလအတွင်း ရမှတ်အနည်းဆုံးဘောလုံးရာသီလည်း ဖြစ်လာခဲ့ပါတယ်။ ဒါပေမယ့် သူတို့တွေက အက်ဖ်အေဖလားဆီမီးဖိုင်နယ်အဆင့်ဆီ ခုနစ်ကြိမ်ဆက်တက်ရောက်နိုင်ခဲ့ပြီး လာမယ့်လအတွင်း ဝင်ဘာလေမှာ နော်တင်ဟမ်ဖောရက်စ်နဲ့ ရင်ဆိုင်သွားရပါမယ်။ ဘာနာဒိုဆေးလ်ဗားက “ ဝင်ဘာလေဆိုတာ ထူးရှယ်ဘောလုံးကွင်းဖြစ်ပြီး အဲ့ဒီကွင်းဆီသွားရတဲ့ခရီးလမ်းက အမြဲတမ်းပျော်ဖို့ကောင်းပါတယ်။ ကျွန်တော်တို့လည်း လွန်ခဲ့တဲ့နှစ်နှစ်တာကာလအတွင်း မန်ချက်စတာယူနိုက်တက်နဲ့ ဗိုလ်လုပွဲနှစ်ကြိမ် ကစားခဲ့ဖူးပါတယ်။ တစ်ကြိမ်မှာ ကျွန်တော်တို့ အနိုင်ရရှိပေမယ့် ပြီးခဲ့တဲ့ဘောလုံးရာသီမှာတော့ ရှုံးနိမ့်ခဲ့ပါတယ်။ ကျွန်တော်တို့ အဲ့ဒီနေရာဆီ နောက်တစ်ကြိမ်ပြန်သွားချင်ပါသေးတယ်။ ဆုဖလားအတွက် တိုက်ပွဲဝင်ဖို့ပေါ့။ ကျွန်တော်တို့က ဆီမီးဖိုင်နယ်မှာ နော်တင်ဟမ်ဖောရက်စ်နဲ့ ရင်ဆိုင်ရမှာဖြစ်လို့ မလွယ်ကူဘူးဆိုတာလည်း သိပါတယ်။ သူတို့တွေမှာ ကောင်းမွန်တဲ့ဘောလုံးရာသီတစ်ခု ရှိနေပါပြီ။ ဒါပေမယ့် ကျွန်တော်တို့ကလည်း အဲ့ဒီပွဲစဉ်အတွက် ခွန်အားတွေဖြည့်တင်းထားရပါမယ်”လို့ ပြောပါတယ်။

မန်စီးတီးက လာမယ့်ဗုဒ္ဓဟူးနေ့မှာ ရုန်းကန်နေရတဲ့လက်စတာကို ဧည့်ခံကစားပြီး ချန်ပီယံလိဂ်ဝင်ခွင့်ရရှိဖို့ သူတို့ရဲ့ကြိုးပမ်းမှုကို တိုးမြှင့်သွားပါလိမ့်မယ်။ ဘာနာဒိုဆေးလ်ဗားကလည်း သူ့ရဲ့အသင်းအနေဖြင့် လာမယ့်ဘောလုံးရာသီမှာ ပုံမှန်အတိုင်းပြန်ဖြစ်လာပြီး ဝေဖန်ထားသူတွေ ပြန်လည်တောင်းပန်ရလိမ့်မယ်လို့ ယုံကြည်နေပါတယ်။ 

သူက “ အဲ့ဒီလူတွေ မှားယွင်းတယ်ဆိုတာ သက်သေပြသွားရပါမယ်။ ဒီအတွက် ကျွန်တော်တို့မှာ အချိန်ရှိပါတယ်။ အခုဘောလုံးရာသီအတွက် ပြိုင်ပွဲလမ်းကြောင်းအချို့ပေါ်မှာ ရှိနေသေးတယ်ဆိုရင်တောင် အနည်းငယ်နောက်ကျသွားပါပြီ။ ဒါပေမယ့် မစိုးရိမ်ပါနဲ့၊ ကျွန်တော်တို့ ပြန်လာနိုင်ပါလိမ့်မယ်”လို့ ပြောပါတယ်။