ပြင်သစ်သရေကျပြီး အီတလီနိုင်ပွဲရခဲ့တဲ့ ယူရိုအကြိုခြေစမ်းပွဲစဉ်များ
ယနေ့နံနက်က ယှဉ်ပြိုင်ခဲ့တဲ့ ယူရိုအကြိုခြေစမ်းပွဲစဉ်တွေမှာ ပြင်သစ်က ကနေဒါနဲ့ သရေကျခဲ့ပြီး အီတလီက ဘော့စနီးယားကို အနိုင်ရခဲ့ပေမယ့် ဆလိုဗက်ကီးယားနဲ့တွေ့ဆုံခဲ့တဲ့ ဝေးလ်ကတော့ ဂိုးပြတ် ရှုံးပွဲကြုံတွေ့ခဲ့ရပါတယ်။
ယူရိုမှာ ဗိုလ်စွဲဖို့ ရေးပန်းစားနေတဲ့ပြင်သစ်အသင်းဟာ ကနေဒါကိုတော့ အနိုင်ယူဖို့ ရုန်းကန်ခဲ့ရတဲ့အပြင် ဂိုးသွင်းဖို့ပါ မတတ်နိုင်ခဲ့တာကြောင့် ၀-၀ ဆိုတဲ့သရေ ရလဒ်သာ ပုံဖော်နိုင်ခဲ့ပါတယ်။ ဝါရင့်တိုက်စစ်မှူး အိုလီဗာဂီရောက်ဦးဆောင်တဲ့ ပြင်သစ်တိုက်စစ်ဟာ ယခုပွဲစဉ်မှာ ဂိုးပေါက်ကန်သွင်းခွင့် အကြိမ်ကြိမ်ရရှိခဲ့ပေမယ့် ဂိုးအဖြစ်ပြောင်းလဲနိုင်ခဲ့ခြင်းမရှိပါဘူး။
ပွဲပြီးကာနီး မိနစ် ၂၀ အလိုမှာ အမ်ဘာပေက လူစားဝင်ကစားသမားအဖြစ် ဝင်ရောက်လာတဲ့အချိန်မှာတော့ ပြင်သစ်တိုက်စစ် ပိုသွက်လာခဲ့ပြီး အခွင့်အရေးတွေ ပိုမိုဖန်တီးနိုင်ခဲ့ပေမယ့် ကနေဒါနောက်တန်းကိုတော့ ကျော်ဖြတ်ဖို့ ရုန်းကန်ခဲ့ရတာဖြစ်ပါတယ်။ ယခုပွဲစဉ်ဟာ ပြင်သစ်ရဲ့နောက်ဆုံး ခြေစမ်းပွဲစဉ်ဖြစ်တာကြောင့် လာမယ့်အပတ် တနင်္လာနေ့မှာ ယူရိုအုပ်စုအဆင့်ရဲ့ ပထဆုံးပွဲစဉ်အဖြစ် ဩစတြီးယားနဲ့ စတင်ကစားသွားရတော့မှာဖြစ်ပါတယ်။
နောက်ထပ် ခြေစမ်းပွဲစဉ်တစ်ပွဲဖြစ်တဲ့ အီတလီနဲ့ ဘော့စနီးယားတို့ပွဲစဉ်မှာတော့ အီတလီက ဖရက်တီဆီရဲ့ တစ်လုံးတည်းသော အနိုင်ဂိုးနဲ့အတူ ၁-၀ ဆိုတဲ့ရလဒ်ကို ဖော်ဆောင်နိုင်ခဲ့ပြီး နိုင်ပွဲရယူခဲ့ပါတယ်။ အီတလီက ပွဲချိန်တစ်လျှောက်လုံးလွှမ်းမိုးပြီး အခွင့်အရေးတွေအများအပြားဖန်တီးနိုင်ခဲ့ပေမယ့် အဆုံးသတ်ပိုင်း ညံ့ဖျင်းမှုတွေကြောင့် ဂိုးအဖြစ်ပြောင်းလဲနိုင်ဖို့ ရုန်းကန်ခဲ့ရတာဖြစ်ပါတယ်။
သို့သော်လည်း အနိုင်ဂိုးကိုတော့ ပထမပိုင်း ၃၈ မိနစ်မှာပဲ စတင်ရရှိခဲ့တာဖြစ်ပြီး တောင်ပံကစားသမား ဖရက်တီဆီက ဗော်လီကန်ချက်နဲ့ လှလှပပသွင်းယူပေးခဲ့တာ ဖြစ်ပါတယ်။ လာမယ့်စနေနေ့မှာတော့ အီတလီဟာ ယူရိုအုပ်စုအဆင့်ပြိုင်ပွဲကို စတင်ကစားသွားရမှာဖြစ်ပြီး ပထမဆုံးပွဲစဉ်မှာ အယ်လ်ဘေးနီးယားနဲ့ ယှဉ်ပြိုင်သွားရမှာဖြစ်ပါတယ်။
အီတလီဟာ လက်ရှိချန်ပီယံဖြစ်နေတာကြောင့် ယခုပြိုင်ပွဲမှာလည်း ချန်ပီယံဆုကို ကာကွယ်သွားနိုင်မလား စောင့်ကြည့်ရပါမယ်။ နောက်ထပ်ပွဲစဉ်မှာတော့ ဆလိုဗက်ကီးယားက ဝေးလ်ကို ၄-၀ ဆိုတဲ့ရလဒ်နဲ့ ဂိုးပြတ် အနိုင်ယူခဲ့ပြီး တိုက်စစ်အစွမ်းပြသခဲ့ပါတယ်။ ပထမပိုင်းမှာတော့ ဆလိုဗက်ကီးယားက ဂိုးသွင်းဖို့ ရုန်းကန်ခဲ့ရတာကြောင့် ပွဲကစားချိန် ၄၅ မိနစ်မှသာ ဦးဆောင်ဂိုး ရရှိခဲ့တာဖြစ်ပါတယ်။
သို့သော်လည်း ဒုတိယပိုင်းမှာတော့ ဂိုးတွေဆက်တိုက်ရရှိခဲ့ပြီး ပြတ်သားတဲ့အနိုင်ရလဒ်ကို ဖော်ဆောင်နိုင်ခဲ့ပါတယ်။ လာမယ့်တနင်္ဂနွေနေ့မှာတော့ ဆလိုဗက်ကီးယားဟာ ယူရိုပြိုင်ပွဲအတွက် ပထမဆုံးအုပ်စုအဆင့်ပွဲစဉ်မှာ နာမည်ကြီး ဘယ်လ်ဂျီယံနဲ့ ထိပ်တိုက်တွေ့ဆုံနေတာကြောင့် ယခုဂိုးပြတ်နိုင်ပွဲဟာ ခက်ခဲတဲ့ပွဲစဉ်ကစားသွားရမယ့် အသင်းရဲ့ကစားသမားတွေအတွက် အားတက်စရာဖြစ်နေမှာသေချာပါတယ်။
