ဒဏ်ရာပြဿနာကြောင့် ပယ်လ်မာ ဖူလ်ဟမ်နဲ့ပွဲကို လွဲချော်သွားမယ်လို့ မာရက်စ်ကာအတည်ပြု
ချဲလ်ဆီးနည်းပြ အန်ဇိုမာရက်စ်ကာက အသင်းရဲ့အဓိကကွင်းလယ်တိုက်စစ်ကစားသမား ကိုးလ်ပယ်လ်မာဟာ ဒဏ်ရာပြဿနာကြောင့်ဖူလ်ဟမ်နဲ့ယှဉ်ပြိုင်သွားရမယ့် ပရီးမီးယားလိဂ်ပွဲစဉ်ကို လွဲချော်သွားမယ်လို့ အတည်ပြုပြောကြားလာခဲ့ပါတယ်။
ပယ်လ်မာဟာ ပြီးခဲ့တဲ့ရက်သတ္တပတ်က ပေါင်ခြံဒဏ်ရာရရှိခဲ့တာဖြစ်ပြီး ကြားရက်က ပြုလုပ်ခဲ့တဲ့ ချဲလ်ဆီးရဲ့ လေ့ကျင့်ရေးအစီအစဉ်တွေကိုလွဲချော်ထားခဲ့ပါတယ်။ အင်္ဂလန်လက်ရွေးစင်ဟာ ဝက်စ်ဟမ်းကိုအနိုင်ရခဲ့တဲ့ ပရီးမီးယားလိဂ်ပွဲစဉ်မှာလည်း ပွဲထွက်လူစာရင်းမှာပါဝင်ခဲ့ပေမယ့် သွေးပူလေးကျင့်ခန့်ပြုလုပ်ရင်း ဒဏ်ရာရခဲ့တာကြောင့် လူစာရင်းကနေ နုတ်ထွက်ခဲ့ရဝာာဖြစ်ပါတယ်။
အဆိုပါပွဲစဉ်အပြီး ပယ်လ်မာရဲ့ဒဏ်ရာကိုစစ်ဆေးရာမှာ ပေါင်ခြံဒဏ်ရာရရှိခဲ့ကြောင်း ချဲလ်ဆီးကအတည်ပြုခဲ့ပြီး ယခုအခါမှာတော့ ကစားသမားဟာ ဖူလ်ဟမ်နဲ့ပွဲကိုပါ လွဲချော်သွားမှာဖြစ်ပါတယ်။ စနေနေ့ကပြုလုပ်ခဲ့တဲ့ပွဲကြိုသတင်းစာရှင်းလင်းပွဲမှာ မာရက်စ်ကာက "ပယ်လ်မာက ဖူလ်ဟမ်နဲ့ပွဲကိုလွဲချော်သွားပါမယ်။ ဘာဒီယာရှီးလ်နဲ့ လာဗီယာတို့လည်း ဒီပွဲမှာမပါနိုင်ပါဘူး။ ပယ်လ်မာရဲ့အခြေအနေကို ကျွန်တော်တို့ တစ်ရက်ချင်းစီစောင့်ကြည့်သွားရပါမယ်" လို့ပြောကြားခဲ့ပါတယ်။
ပယ်လ်မာမပါဝင်ပေမယ့် ချဲလ်ဆီးဟာ ဝက်စ်ဟမ်းနဲ့ပွဲမှာ ၅ ဂိုးအထိတိုက်စစ်အစွမ်းပြခဲ့တာကြောင့် ယခုဖူလ်ဟမ်နဲ့ပွဲမှာလည်း နောက်ထပ်ဂိုးပြတ်နိုင်ပွဲတစ်ခုကို ဆက်လက်ဖော်ဆောင်သွားနိုင်မလား စောင့်ကြည့်ရပါမယ်။
