မာဆေးလ်အသင်းဟာ ယူနိုက်တက်စတား မေဆင်ဂရင်းဝုဒ်ကို ခေါ်ယူဖို့ ချိတ်ဆက်လာတယ်လို့ သိရပါတယ်။

အသက် ၂၂ နှစ်သားဟာ ယူနိုက်တက်မှာ အနာဂတ်မရှိတော့ပဲ အသင်းဖော်ဟောင်း ရှိုရီတိုင်းရားနဲ့ လေ့ကျင့်ခန်းသက်သက်ဆင်းနေရပါတယ်။ အင်္ဂလန်စတားဟောင်းကတော့ အခုနွေရာသီမှာ ယူနိုက်တက်ကနေ ထွက်ခွာဖို့ ပြင်ဆင်နေပါတယ်။

ဂီတာဖေးအသင်းမှာ အငှားထွက်ကစားပြီးနောက် ခြေစွမ်းပြနိုင်ခဲ့တဲ့ မေဆင်ကို အသင်းတော်တော်များများက အလိုရှိနေကြပါတယ်။  အဆိုပါအသင်းတွေထဲမှာ မာဆေးလ်လည်း ပါဝင်လာခဲ့ပြီး ယခင်တုန်းက ဂျူဗင်တပ်စ် ၊ လာဇီယို ၊ ဗလန်စီယာ နဲ့ ဒေါ့မွန်တို့က ချိတ်ဆက်နေပါတယ်။

ရိုမာနိုကတော့ မေဆင်ရဲ့အနာဂတ်နဲ့ပတ်သက်ပြီး “မာဆေးလ်က ယူနိုက်တက်အသင်းထံ မေဆင်အတွက် ကနဦးကမ်းလှမ်းမှုပြုလုပ်ထားပါတယ်။ ၂ သင်းကြားဆွေးနွေးမှုတွေတော့ ပြုလုပ်နေပါတယ်။ မာဆေးလ်ရဲ့ပစ်မှတ်စာရင်းထဲမှာ မေဆင်က ထိပ်ဆုံးမှာ ရှိနေတာပါ။ ယူနိုက်တက်က အငှား + အပြီးသတ်ရောင်းချဖို့ကို လမ်းဖွင့်ထားသလို ပြန်လည် ရောင်းချခဲ့ရင် ပေးချေရမယ့်အချက်ကိုလည်း ထည့်သွင်းဖွယ်ရှိနေပါတယ်”လို့ ပြောကြားခဲ့ပါတယ်။

အငှားခေါ်ယူမှုဖြစ်ခဲ့ရင်လည်း မေဆင်အတွက် ယူနိုက်တက်မှာ နောက်ထပ် ၁၂ လသက်တမ်းတိုးခွင့် ရှိနေပြီး အလွတ်နဲ့ထွက်ခွာခွင့်မပြုရတာဖြစ်ပါတယ်။