နော်တင်ဟမ်ဖောရက်စ်ကို အရေးနိမ့်ခဲ့ပေမယ့်လည်း ယူနိုက်တက်နောက်ခံလူ ဒါလော့က မိမိတို့အသင်းဟာ မှန်ကန်တဲ့လမ်းကြောင်းပေါ်မှာရှိနေတယ်လို့ ယုံကြည်နေပါတယ်။ အာမိုရင်ရဲ့အသင်းဟာ နော်တင်ဟမ်နဲ့ပွဲမှာ ရလဒ်ကောင်းရယူနိုင်ဖို့ ကြိုးစားခဲ့ပေမယ့် အီလန်ဂါရဲ့တစ်လုံးတည်းသောဂိုးနဲ့ အရေးနိမ့်ခဲ့ပါတယ်။

အခုရှုံးပွဲကြောင့် ယူနိုက်တက်ဟာ ၈ ပွဲကစားဖို့ကျန်နေချိန်မှာ အဆင့် ၁၃ အောက်မှာ ရာသီသိမ်းဖို့အလားအလာများနေပါတယ်။ ရလဒ်တွေဆိုးဝါးနေပေမယ့် ဒါလော့က မိမိတို့အသင်းဟာ ကန်ချက် ၂၄ ကြိမ်အထိ ရှိခဲ့ပြီး နော်တင်ဟမ်ကိုအနိုင်ရဖို့ နီးစပ်ခဲ့တယ်လို့ ပြောကြားခဲ့ပါတယ်။ 

“အနာဂတ်မှာ ကျွန်တော်တို့ ဆက်လက်ပြိုင်ပွဲဝင်ချင်တယ်ဆိုရင် အခုလိုမျိုး စွမ်းဆောင်နိုင်ဖိူ့ လိုအပ်ပါတယ်။ အဲ့နောက် အဆုံးသတ်မှာ ရလဒ်က နောက်ကနေလိုက်လာပါလိမ့်မယ်။ ဒါပေမယ့် နည်းနည်းချင်းစတင်ပြီး ပရီးမီးယားလိဂ်ကနေ အခြားကြီးမားတဲ့ဆုဖလားတွေကို စိန်ခေါ်နိုင်ဖို့ လိုအပ်ပါတယ်။ကျွန်တော်တို့ အခုလိုမျိုးအလေ့အကျင့်စတင်လုပ်ဆောင်ရပါမယ်။ အဲ့နောက် တည်ငြိမ်မှုရှိအောင် လုပ်ဆောင်ရမှာဖြစ်ပြီး ရလဒ်က သူ့ဘာသာသူနောက်ကနေ လိုက်လာပါလိမ့်မယ်။ ကျွန်တော် အနည်းငယ်နာကျင်နေရပါသေးတယ်။ ဒါပေမယ့် အခုအခြေအနေအတိုင်း ကြိုးစားမယ်ဆိုရင် မှန်ကန်တဲ့လမ်းကြောင်းပေါ်မှာရှိနေတယ်လို့ ထင်ပါတယ်။

အများကြီးမတွေးဖြစ်ပါဘူး။ အဲ့တာက ဒါဘီပွဲပါ။ ကျွန်တော်တို့ အနိုင်ကန်ရပါမယ်။ ကျွန်တော်တို့ ပရိသတ်တွေရှေ့မှာကန်ရမှာပါ။ အဲ့တာက မယုံကြည်နိုင်စရာကောင်းတဲ့ပရိသတ်အားဖြစ်လာမယ်လို့ ကျွန်တော်ထင်ပါတယ်။ တကယ်စိတ်လှုပ်ရှားစရာပါ”လို့ ဒါလော့က ပြောကြားခဲ့ပါတယ်။ ယူနိုက်တက်ဟာ လာမယ့်တနင်္ဂနွေနေ့မှာ မန်စီးတီးနဲ့ မန်ချက်စတာဒါဘီပွဲဆင်နွှဲရမှာဖြစ်ပြီး နော်တင်ဟမ်ကတော့ ဗီလာနဲ့ကန်ရမှာဖြစ်ပါတယ်။