ဘာစီလိုနာဆီ ပြောင်းရွှေ့ခဲ့မှုနဲ့ပတ်သက်လို့ နောင်တမရပါဘူးလို့ ဆိုလိုက်တဲ့ ကော်တင်ဟို
ဖီလစ်ပီကော်တင်ဟိုက ဖြစ်ပျက်ခဲ့တဲ့အခြေအနေတွေကြောင့် စိတ်ပျက်ခဲ့ရပေမယ့် ဘာစီလိုနာဆီ ပြောင်းရွှေ့တဲ့ဆုံးဖြတ်ချက်နဲ့ပတ်သက်လို့ နောင်တမရပါဘူးလို့ ပြောဆိုလိုက်ပါတယ်။
ဘရာဇီးသားက လီဗာပူးအသင်းမှ ထွက်ခွာလာပြီးနောက် ကြီးမားတဲ့ ခြေလှမ်းသစ်တစ်ခု ဖြစ်လာလိမ့်မယ်လို့ မျှော်လင့်ခဲ့ပေမယ့် သူ့အတွက် သုံးစွဲခဲ့ရတဲ့ ပြောင်းရွှေ့ကြေးစရိတ်နဲ့ ထိုက်တန်တဲ့ ခြေစွမ်းမျိုးပြသနိုင်ဖို့ ရုန်းကန်ခဲ့ရပါတယ်။ ဘောလုံးသုံးသပ်သူတွေကတော့ ကော်တင်ဟိုရဲ့အပြောင်းအရွှေ့ဟာ ဘောလုံးသမိုင်းတလျှောက် အဆိုးရွားဆုံးအပြောင်းအရွှေ့တွေအနက် တစ်ခုဖြစ်တယ်လို့ ပြောကြပါတယ်။
ကော်တင်ဟိုက “ကျွန်တော် စိတ်ကူးထားသလို အရာရာတိုင်းက ဖြစ်မလာခဲ့ဘူး။ ကျွန်တော်ကိုယ်တိုင်က ကွင်းတွင်းမှာဆိုရင် ကိုယ့်ကိုကိုယ်တောင်းဆိုမှုအများဆုံးလုပ်တက်သူဖြစ်တာကြောင့် လူတွေ မျှော်လင့်ထားခဲ့သလိုပဲ ကျွန်တော်လည်း မျှော်လင့်ထားခဲ့ပါတယ်။ ကိုယ့်ကိုကိုယ်လည်း ကွင်းတွင်းမှာ အစွမ်းကုန်ပေးဆပ်ရမယ်စသဖြင့် ပြောဖြစ်ခဲ့ပါတယ်။ အရာရာတိုင်းကို ကြိုးစားခဲ့ပါတယ်။ ကိုယ်တိုင်လည်း အမြဲတမ်းပရိုပီပီသသဖြစ်နေခဲ့ပြီး နောင်တရစရာ ဘာအကြောင်းတရားမှ မရှိပါဘူး။ ကျွန်တော့်ရဲ့အိပ်မက်က ဘာစီလိုနာအတွက် ကစားပေးရဖို့ ဖြစ်ပြီး ဒီအသင်းဆီ ရောက်ရှိလာကာ ဒီလိုအတွေ့အကြုံကိုလည်း ခံစားခဲ့ရပါတယ်။ ကျွန်တော် လူတွေအများကြီးနဲ့ တွေ့ဆုံနိုင်ခဲ့ပြီး ဆုဖလားတွေလည်း ဆွတ်ခူးနိုင်ခဲ့ပါတယ်။ ဒါက ကျွန်တော့်ဘဝရဲ့ ဇာတ်လမ်းတစ်ခုအဖြစ် အမြဲတမ်းရှိနေပါလိမ့်မယ်”လို့ ပြောပါတယ်။
ကော်တင်ဟိုက ဘာစီလိုနာကစားသမားအဖြစ် လာလီဂါချန်ပီယံဆုနှစ်ကြိမ်၊ ကိုပါဒယ်လ်ရေးနှစ်ကြိမ်နဲ့ စပိန်စူပါဖလားတစ်ကြိမ် ဆွတ်ခူးနိုင်ခဲ့ပါတယ်။ သူက လက်ရှိမှာ ကာတာပြည်တွင်းကလပ် အယ်လ်ဒူဟီးလ်အတွက် ကစားပေးနေပါတယ်။ ဘာတွေ ဆက်လုပ်ဖြစ်ဦးမလဲလို့ မေးမြန်းလာမှုကို ကော်တင်ဟိုက အပြောင်းအလဲတစုံတရာမရှိသေးဘူးလို့ တုံ့ပြန်ခဲ့ပါတယ်။
“အတိတ်ဆီ ပြန်သွားဖို့ဆိုတာ မဖြစ်နိုင်ပါဘူး။ ဒါပေမယ့် ကျွန်တော်ပြောခဲ့သလိုပါပဲ နောင်တမရပါဘူး။ ပြီးခဲ့တဲ့နှစ်မှာ လုပ်ခဲ့သလို၊ အခုဒီနေရာမှာ လုပ်နေသလိုပဲ လေ့ကျင့်ရေးကွင်းမှာ အရာအားလုံးကို ကျွန်တော် အမြဲတမ်းပေးဆပ်နေပါတယ်။ ဒါမျိုးကိုပဲ နောက်နှစ်တွေမှာ ဆက်လုပ်သွားပါလိမ့်မယ်။ အရာရာတိုင်းက အဆင်ပြေပြေဖြစ်နေမယ်ဆိုရင် ကောင်းပါတယ်။ မဖြစ်လာရင်လည်း သည်းခံရပါမယ်”လို့ ကော်တင်ဟိုက ဆက်ပြောခဲ့ပါတယ်။
