ပီအက်စ်ဂျီကို ၄-၂ နဲ့အရေးနိမ့်ခဲ့တဲ့ ချန်ပီယံလိဂ်ပွဲမှာ စီးတီးအနေနဲ့ ၄ ဂိုးပဲပေးခဲ့ရတာဟာ ကံကောင်းခဲ့တာလို့ ကာရေဂါက အခိုင်အမာပြောကြားလိုက်ပါတယ်။ စီးတီးဟာ ဒီရာသီမှာ အံ့အားသင့်ဖွယ်ရလဒ်တွေဆိုးဝါးနေပြီး ပီအက်စ်ဂျီနဲ့ပွဲမှာလည်း ဒုတိယပိုင်းမှာ ၂ ဂိုးပြတ်ဦးဆောင်နိုင်ခဲ့ပေမယ့် အဆုံးသတ်မှာ ၄-၂ နဲ့ အရေးနိမ့်ခဲ့တာဖြစ်ပါတယ်။

စီးတီးဟာ ပီအက်စ်ဂျီကို ဂရီးလစ်ချ် ၊ ဟာလန်းတို့ရဲ့ဂိုးတွေနဲ့ ဦးဆောင်နိုင်ခဲ့ပေမယ့် ပီအက်စ်ဂျီကနေ နောက်ကနေလိုက်ကစားကာ ၄-၂ နဲ့ အနိုင်ရရှိခဲ့တာဖြစ်ပါတယ်။ အဆိုပါအခြေအနေတွေနဲ့ပတ်သက်ပြီး ကာရေဂါက စီးတီးအနေနဲ့ အခုပွဲမှာ ၄ ဂိုးသာပေးခဲ့ရတာဟာ ကံကောင်းခဲ့တာလို့ အခိုင်အမာပြောကြားခဲ့ပါတယ်။

“အဲ့တာက လုံးဝမတူညီတဲ့ပွဲ ၂ ပွဲနဲ့ဆင်တူပါတယ်။ ပထမပိုင်းမှာက စမ်းသပ်နေကြတဲ့ပွဲလို့ မြင်မိပါတယ်။ ဒုတိယပိုင်းကတော့ ကျွန်တော်ချန်ပီယံလိဂ်အုပ်စုပွဲစဉ်တွေ ကြည့်ခဲ့တဲ့တစ်လျှောက် အကောင်းဆုံးတွေထဲကတစ်ပွဲပါ။ ပီအက်စ်ဂျီက လူစားလဲမှုတွေပြုလုပ်ပြီးချိန်မှာပဲ ပွဲအနေအထားက ပြောင်းလဲလာခဲ့တာပါ။ အထူးသဖြင့် ဒမ်ဘီလီဝင်လာချိန်မှာပါ။ ကျွန်တော် သီယာရီနဲ့တောင် ပွဲမတိုင်ခင်ပြောဖြစ်ပါသေးတယ်။

အဆုံးသတ်မှာ သူတို့က အကောင်းဆုံးအသင်းတွေလို့ ခံစားခဲ့ရပါတယ်။ မန်စီးတီးက ပရီးမီးယားလိဂ် နဲ့ ချန်ပီယံလိဂ်အုပ်စုအတွင်း စွမ်းဆောင်ရည်တွေကို ကျွန်တော်တို့ သိပြီးသားပါ။ ဒီနေ့ပွဲမှာတော့ သူတို့အခြေအနေက တော်တော်ဆိုးဝါးခဲ့ပါတယ်။ လူကြီး နဲ့ ကလေးလိုဖြစ်ခဲ့ပါတယ်။ အဆုံးသတ်မှာ ၄ ဂိုးပဲပေးခဲ့ရတာက သူတို့ကံကောင်းခဲ့ပါတယ်။ အဲ့တာက အဆိုးဝါးဆုံးဖြစ်သွားနိုင်ပါတယ်”လို့ ကာရေဂါက ပြောကြားခဲ့ပါတယ်။

စီးတီးဟာ အခုပွဲမှာအရေးနိမ့်ခဲ့တာကြောင့် ချန်ပီယံလိဂ်အမှတ်ပေးဇယားရဲ့အဆင့် ၂၅ နေရာမှာ ရပ်တည်နေပြီး နောက်တစ်ဆင့်တက်နိုင်ဖို့ ဘရုဂျက်နဲ့ပွဲမှာအနိုင်ကန်ဖို့ လိုအပ်နေသလို အခြားပွဲတွေရဲ့ရလဒ်ကိုလည်း စောင့်ကြည့်ရတော့မှာဖြစ်ပါတယ်။