ဘရိုက်တန်နည်းပြ ဟာဇယ်လာကတော့ ကားလို့စ်ဘာလီဘာတစ်ယောက် အပြောင်းအရွှေ့ပြီးဆုံးချိန်အထိ အသင်းမှာ ဆက်ရှိနေမယ်လို့ ၁၀၀% ကျော်ယုံကြည်ကြောင်း ပြောကြားလိုက်ပါတယ်။ အသက် ၂၁ နှစ်သားဟာ ၂၀၂၃ လိုင်လီကနေ ဘရိုက်တန်ထံပြောင်းရွှေ့လာခဲ့ပြီးနောက် ၂ ရာသီအတွင်း ပရီးမီးယားလိဂ်ရဲ့စိတ်အလှုပ်ရှားဆုံးလူငယ်ကစားသမားဖြစ်လာခဲ့ပါတယ်။

ဘာလီဘာရဲ့စွမ်းဆောင်ရည်တွေကြောင့် အင်္ဂလန်အသင်းတော်တော်များများက စိတ်ဝင်စားနေပြီး သတင်းတွေကလည်း ထွက်ခွာနိုင်တယ်လို့ ဖော်ပြနေကြပါတယ်။ ယူနိုက်တက်က ဘာလီဘာကို ချိတ်ဆက်နေပေမယ့်လည်း အဆင်မပြေသေးတာဖြစ်ပြီး အစောပိုင်းတုန်းက ကစားသမား + ပြောင်းရွှေ့ကြေးနဲ့ ကမ်းလှမ်းခဲ့သေးတာဖြစ်ပါတယ်။

ဒါပေမယ့်လည်း အဆိုပါကမ်းလှမ်းမှု ကိုပယ်ချခံခဲ့ရပြီး ဘရိုက်တန်ဘက်က ပေါင်သန်း ၁၀၀ နီးပါးအထိ အလိုရှိနေပါတယ်။ အပြောင်းအရွှေ့မပိတ်ခင် ယူနိုက်တက်ဟာ ကွင်းလယ်လူတစ်ဦးခေါ်ယူချင်နေပေမယ့် ဘရိုက်တန်တောင်းဆိုတဲ့တန်ကြေးကြောင့် အခက်တွေ့နေပါတယ်။

သတင်းတွေအရ ယူနိုက်တက်ဟာ အပြောင်းအရွှေ့မပိတ်ခင်မှာ စပို့တင်းစတား ဟာဂျယ်မန်း နဲ့ ပဲလေ့စ်စတား ဝါတန်တို့ဘက်ကို မြှားဦးလှည့်ခဲ့ပြီလို့ သိရပါတယ်။ ဘာလီဘာအခြေအနေနဲ့ပတ်သက်ပြီး ဟာဇယ်လာက “မှန်ပါတယ်။ သူအသင်းမှာဆက်ရှိနေမယ်ဆိုတာ ၁၀၀% ကျော် ကျွန်တော်ယုံကြည်ပါတယ်"” လို့ ပြောကြားလိုက်ပါတယ်။

ဘာလီဘာဟာ ဘရိုက်တန်အသင်းရဲ့ပရီးမီးယားလိဂ်အဖွင့်ပွဲ ၂ ပွဲကို ပါဝင်ထားကာ လာမယ့်အပတ် မန်စီးတီးနဲ့ပွဲမှာလည်း ထပ်မံပါဝင်ဖွယ်ရှိနေပါတယ်။ လိုင်လီစတားဟောင်းဟာ ပြီးခဲ့တဲ့ကာရာဘောင်ဖလားပွဲအဖြစ် အောက်စ်ဖို့ဒ်ကို ၆ ဂိုးပြတ်အနိုင်ရခဲ့တဲ့ပွဲမှာ လူစားဝင်ကစားခဲ့ပါတယ်။

ဘာလီဘာ နဲ့ ဘရိုက်တန်တို့ကြား စာချုပ်သက်တမ်းက ၃ နှစ်ကျန်နေသေးတာဖြစ်ပါတယ်။ ကာရာဘောင်ဖလားပွဲအပြီး ဟာဇယ်လာက ကစားသမားအသစ်တွေဆီကနေ စွမ်းဆောင်ရည်ကောင်းတွေမြင်လိုက်ရလို့ ဝမ်းသာနေပါတယ်။“ကျွန်တော်တို့ အနည်းငယ်အသားကျအောင်လုပ်ရပါဦးမယ်။ ဒါပေမယ့် ဒီနေ့ညက ပရီးမီးယားလိဂ်ပွဲနဲ့တော့ ဝေးကွာနေဆဲပါ။ ပွဲဦးထွက်ကစားသမားတွေလည်း အစကောင်းခဲ့ပါတယ်။ ဒါပေမယ့် အဲ့တာက ပထမဆုံးခြေလှမ်းပါပဲ။ ကျွန်တော်တို့ ခြေလှမ်းများစွာလုပ်ဆောင်ရပါဦးမယ်။

ဒါကြောင့် သူတို့ ပရီးမီးယားလိဂ်အတွက် အဆင်သင့်ဖြစ်နေဖို့ လိုအပ်ပါတယ်။ ဒီပွဲတွေက သူတို့အဆင်သင့်ဖြစ်အောင် ကူညီပေးနိုင်ပါတယ်။ သူတို့ကို ပွဲတိုင်းအသုံးပြုဖို့ လိုအပ်ပြီး ရေရှည်မှာ သူတို့အသင်းကိုအကျိုးပြု နိုင်မယ်ဆိုတာ ကျွန်တော်တပ်အပ်ပြောရဲပါတယ်”လို့ ဟာဇယ်လာက ပြောကြားခဲ့ပါတယ်။