ဘင်ဖီကာရဲ့ ဥက္ကဌလောင်း ဂျိုအာအို နိုရိုညာ လိုပက်စ်က မန်စီးတီးကြယ်ပွင့် ဘာနာဒို ဆေးလ်ဗားကို သူ့ရဲ့ငယ်ဘဝကလပ်ဆီ ပြန်ခေါ်ဖို့ ရည်မှန်းချက်ကြီးတဲ့ အစီအစဉ်ကို ထုတ်ဖော်ခဲ့ပါတယ်။ ဒီနှစ်နှောင်းပိုင်းမှာ ကျင်းပမယ့် မဲပေးပွဲမတိုင်ခင် လိုပက်စ်က အီတီဟက်ဒ်မှာ ၂၀၂၆ ခုနှစ်အထိ စာချုပ်သက်တမ်းရှိတဲ့ ပေါ်တူဂီကြယ်ပွင့်အတွက် စာချုပ်တစ်ခုက ‘အဆင်သင့်’ ရှိနေပြီလို့ အခိုင်အမာ ပြောဆိုခဲ့ပါတယ်။ သူဟာ မန်စီးတီးကို ဒီနှစ် ဇန်နဝါရီမှာ ကွင်းလယ်ကစားသမားကို လက်လွှတ်ဖို့ ဆွဲဆောင်နိုင်ဖို့ မျှော်လင့်နေပါတယ်။

လိုပက်စ်ဟာ အောက်တိုဘာ ၂၅ ရက်နေ့မှာ ကျင်းပမယ့် ဘင်ဖီကာရဲ့ ဥက္ကဌနေရာအတွက်အရွေးခံဖို့ ဝင်ရောက်ယှဉ်ပြိုင်နေတာဖြစ်ပြီး ဆေးလ်ဗားကို ပြန်ခေါ်မယ်ဆိုတဲ့ သူ့ရဲ့ကတိဟာ ပရိသတ်တွေကို မဲပေးဖို့ ဆွဲဆောင်နိုင်ပါတယ်။ အကယ်၍သာ ရွေးချယ်ခံခဲ့ရမယ်ဆိုရင် မန်စီးတီးနဲ့ ချက်ချင်းပဲ စတင် ဆွေးနွေးမှုတွေ ပြုလုပ်ပါလိမ့်မယ်။ ဇန်နဝါရီဖြစ်စေ၊ နွေရာသီဖြစ်စေ ဆေးလ်ဗားရဲ့ နောက်တစ်ဆင့်က သူ့ရဲ့ကစားသမားဘဝ အစပြုခဲ့ရာကို ပြန်ရောက်လာနိုင်ပါတယ်။

ပေါ်တူဂီသတင်းဌာနဖြစ်တဲ့ A Bola ကို လိုပက်စ်က ‘ဟုတ်ပါတယ်။ ဘာနာဒို ဆေးလ်ဗားအတွက် စာချုပ်က အဆင်သင့်ရှိနေပြီဆိုတာကို ကျွန်တော် အတည်ပြုနိုင်ပါတယ်။ သူ့ကို ဇန်နဝါရီမှာ ခေါ်ယူချင်ပါတယ်။ သူဟာ ဘင်ဖီကာအတွက် ကျွန်တော်လိုချင်တဲ့ အရာအားလုံးကို ပုံဖော်နိုင်တဲ့သူပါ။ ကစားပုံ၊ အနိုင်ရတဲ့ ယဉ်ကျေးမှုနဲ့ သူဟာ တကယ့်ကို ဘင်ဖီကာပရိသတ်တစ်ယောက်ပါပဲ။ ဒါ့အပြင် ကျွန်တော်တို့ဟာ ဒီမှာ ရပ်တန့်မှာမဟုတ်ဘူးဆိုတာကိုလည်း သေချာစေချင်ပါတယ်’လို့ ပြောကြားခဲ့ပါတယ်။

အသက် ၃၁ နှစ်အရွယ် ဆေးလ်ဗားဟာ ၂၀၁၄ ခုနှစ်မှာ ပြည်ပကို မပြောင်းရွှေ့ခင် ဘင်ဖီကာအကယ်ဒမီကနေ ပေါ်ထွက်လာခဲ့သူပါ။ ဆေးလ်ဗားဟာ လစ္စဘွန်းကို ပြန်လာမယ်လို့ သတင်းတွေ ထွက်ပေါ်ခဲ့ပြီး သူဟာ ဘင်ဖီကာပရိသတ်တွေကြားမှာ အချစ်ခံရသူ ဖြစ်နေဆဲပါ။ ၂၀၂၃ ခုနှစ်မှာ မန်စီးတီးနဲ့ စာချုပ်သစ်ချုပ်ဆိုခဲ့ပေမယ့် သူ့ရဲ့အနာဂတ်နဲ့ပတ်သက်တဲ့ သတင်းတွေကတော့ ဆက်ရှိနေခဲ့ပါတယ်။ လိုပက်စ်ရဲ့ကတိဟာ မဲဆွယ်စည်းရုံးရေးအတွက် အစွမ်းထက်တဲ့ လက်နက်တစ်ခု ဖြစ်နိုင်ပါတယ်။ ဒါပေမဲ့ ရာသီအလယ်မှာ မန်စီးတီးကို လက်လွှတ်ဖို့ ဆွဲဆောင်နိုင်ပါ့မလားဆိုတာကတော့ လွယ်ကူမှာ မဟုတ်ပါဘူး။