ဂျုဒ် ဘယ်လင်ဂမ်က သူ့ရဲ့ ၂၀၂၄-၂၅ ဘောလုံးရာသီဟာ လုံးဝပျက်စီးသွားတာမျိုး မဟုတ်ဘူးလို့ ယုံကြည်နေပေမယ့် ဗုဒ္ဓဟူးနေ့ ညက ချန်ပီယံလိဂ်မှာ ဂျူဗင်တပ်စ်ကို အနိုင်ရတဲ့ပွဲမှာ ဂိုးစသွင်းပြီးနောက် ဒီရာသီမှာ ပိုမိုကောင်းမွန်ချင်တယ်လို့ ပြောပါတယ်။ ဘယ်လင်ဂမ်ဟာ ၅၇ မိနစ်မှာ တစ်လုံးတည်းသော အနိုင်ဂိုးကို သွင်းယူပေးခဲ့ပြီး ရီးရဲလ်မက်ဒရစ်အသင်းဟာ ဂျူဗင်တပ်စ်အသင်းကို ကျော်ဖြတ်ကာ ယူအီးအက်ဖ်အေရဲ့ အဓိကပြိုင်ပွဲဖြစ်တဲ့ ချန်ပီယံလိဂ်ရဲ့ လိဂ်အဆင့်ပွဲစဉ် သုံးပွဲမှာ ကိုးမှတ် ရရှိထားပါတယ်။

အင်္ဂလန်လက်ရွေးစင်ကစားသမားဟာ ဗီနီစီယပ်စ် ဂျူနီယာရဲ့ ကန်ချက်က ဂိုးတိုင်အောက်ခြေကို ထိပြီး ပြန်ထွက်လာတဲ့ ဘောလုံးကို အလျင်အမြန်ဆုံး တုံ့ပြန်ပြီး ကန်သွင်းယူခဲ့တာ ဖြစ်ပါတယ်။ ဒါဟာ သူ အီတလီအသင်းတွေနဲ့ ကစားတဲ့ ချန်ပီယံလိဂ်ပွဲစဉ်တွေမှာ သွင်းယူတဲ့ စတုတ္ထမြောက်ဂိုး ဖြစ်ပြီး၊ တခြားနိုင်ငံအသင်းတွေနဲ့ ကစားတဲ့ပွဲတွေထက် ပိုများပါတယ်။

သို့သော်လည်း ပခုံးခွဲစိတ်မှုခံယူခဲ့ရပြီး ရီးရဲလ်မက်ဒရစ်အသင်းရဲ့ ရာသီအစပွဲစဉ်တွေကို လွဲချော်ခဲ့ရတဲ့ ဘယ်လင်ဂမ်အတွက် ဒါဟာ ကလပ်ကမ္ဘာ့ဖလားပြိုင်ပွဲနောက်ပိုင်း ပထမဆုံး သွင်းဂိုးဖြစ်ပါတယ်။ ကလပ်ကမ္ဘာ့ဖလားပွဲတွေကိုပါ ထည့်တွက်မယ်ဆိုရင် ဘယ်လင်ဂမ်ဟာ ပြီးခဲ့တဲ့ရာသီမှာ ဂိုး ၁၅ ဂိုး သွင်းယူပြီး ၁၄ ဂိုး ဖန်တီးပေးခဲ့တာကြောင့် ၂၀၂၃-၂၄ ရာသီက (သွင်းဂိုး ၂၃ ဂိုး၊ ဖန်တီးမှု ၁၃ ဂိုး) ၃၆ ဂိုးမှာ ပါဝင်ပတ်သက်ခဲ့တာထက် နည်းသွားတာ ဖြစ်ပါတယ်။

ပွဲအပြီးမှာ ဘယ်လင်ဂမ်က ဂိုးပြန်သွင်းနိုင်ခဲ့လို့ စိတ်သက်သာရာရကြောင်း CBS သို့ "အရမ်းကောင်းတဲ့ ခံစားချက်ပါပဲ" "ဂိုးမသွင်းနိုင်တာ တော်တော်ကြာသွားပြီ။ အချိန်အတော်ကြာအောင် ကစားခွင့်မရခဲ့ဘဲ အဲဒီလိုအခိုက်အတန့်မျိုးကို အိပ်မက်မက်ခဲ့ရတယ်။ ချန်ပီယံလိဂ်ကို ပြန်လာနိုင်ခဲ့ပြီ၊ ပြီးတော့ အသင်းကြီးတစ်သင်းနဲ့ ကစားရတာပါ"

"အိမ်ကွင်းမှာ အနိုင်ဂိုးသွင်းနိုင်တာဟာ မယုံနိုင်စရာပါပဲ။ ကျွန်တော် သက်တောင့်သက်သာရှိပြီး တကယ်ကို ကောင်းတယ်လို့ ခံစားရတယ်။ကောင်းကောင်းကစားနိုင်ဖို့က အရေးကြီးတယ်။ ပြီးတော့ အနိုင်ဂိုးသွင်းနိုင်တာက အသင်းကို အများကြီး အထောက်အကူဖြစ်စေပါတယ်" လို့ ပြောပါတယ်။

ဘာစီလိုနာအသင်းက လာလီဂါ၊ ကိုပါဒယ်ရေးနဲ့ စူပါကိုပါ ဒီ အက်စ်ပါညာ ဖလားသုံးလုံးကို ရရှိခဲ့ချိန်မှာ ရီးရဲလ်မက်ဒရစ်အသင်းကတော့ အာဆင်နယ်အသင်းရဲ့ လက်ချက်နဲ့ ချန်ပီယံလိဂ် ကွာတားဖိုင်နယ်အဆင့်ကနေ ထွက်ခဲ့ရတဲ့အတွက် ပြီးခဲ့တဲ့ရာသီမှာ အဓိကဖလားကြီးတစ်လုံးမှ မရရှိခဲ့ပါဘူး။ ဒါပေမဲ့ ဇာဘီ အလွန်ဆို နည်းပြအဖြစ် တာဝန်ယူနေပြီဖြစ်တဲ့အတွက် ဘယ်လင်ဂမ်က သူရော၊ ရီးရဲလ်မက်ဒရစ်အသင်းပါ ဒီရာသီမှာ ပိုကောင်းအောင် လုပ်နိုင်မယ်လို့ ခံစားရပါတယ်။

"ပြီးခဲ့တဲ့နှစ်က လုံးဝပျက်စီးသွားခဲ့တယ်လို့ ကျွန်တော် မထင်ပါဘူး" လို့ ဘယ်လင်ဂမ်က ပြောပါတယ်။ "ကျွန်တော် ဂိုး ၁၅ ဂိုး သွင်းပြီး ၁၄ ဂိုး ဖန်တီးပေးခဲ့ပါသေးတယ်၊ ဒါပေမဲ့ ယေဘုယျအားဖြင့် ပိုဆိုးသွားတယ်လို့ ခံစားကြရတာကိုတော့ ကျွန်တော် သိပါတယ်"

"ကျွန်တော်တို့ ပြီးခဲ့တဲ့နှစ်က ကောင်းကောင်း မကစားနိုင်ခဲ့တဲ့ အပိုင်းမှာ ကျွန်တော်လည်း ပါဝင်ခဲ့တယ်။ ကောင်းတဲ့ အချိန်လေးတွေ ရှိခဲ့ပေမယ့် ကျွန်တော် ကစားချင်တဲ့အဆင့်၊ ပထမနှစ်တုန်းကလို အဆင့်မျိုး မဟုတ်ခဲ့ပါဘူး" "အခု ကျွန်တော့်ရဲ့ ပခုံးခွဲစိတ်မှုလုပ်ပြီးသွားပြီ၊ နည်းပြအသစ်လည်း ရထားပြီ၊ သူက ကျွန်တော်တို့ ကစားချင်တဲ့ ပုံစံကို ဖော်ဆောင်ပေးထားတယ်။ ဒီအခြေအနေတွေကနေ သင်ယူရမှာပါ" လို့ ပြောပါတယ်။

ရီးရဲလ်မက်ဒရစ်အသင်းဟာ လာမယ့် တနင်္ဂနွေနေ့မှာ ဘာစီလိုနာအသင်းနဲ့ ဒီရာသီရဲ့ ပထမဆုံး အယ်လ် ကလက်စီကို ပွဲကို ကစားရမှာဖြစ်ပြီး ဘာစီလိုနာအသင်းနဲ့ နောက်ဆုံးလေးကြိမ်ဆက် တွေ့ဆုံမှုမှာ ရှုံးနိမ့်ထားပါတယ်။ ဒါဟာ ၂၀၀၈ နဲ့ ၂၀၁၀ ကြား ပက် ဂွါဒီယိုလာရဲ့ ဘာစီလိုနာကို ငါးကြိမ်ဆက် ရှုံးနိမ့်ခဲ့ဖူးတဲ့ အယ်လ် ကလက်စီကို သမိုင်းမှာ သူတို့ရဲ့ ဒုတိယအဆိုးဆုံး ရှုံးပွဲဆက်တိုက် စံချိန်ပဲ ဖြစ်ပါတယ်။