ဒီနွေရာသီမှာ ဘိုင်ယန်မြူးနစ်ဟာ ဘင်ဖီကာဗဟိုခံစစ်မှူး အန်တိုနီယိုဆေးလ်ဗားကို ယူနိုက်တက်နှင့် အပြိုင် ခေါ်ယူမယ်လို့ သတင်းတွေရ သိရှိရပါတယ်။ ယူနိုက်တက်ဟာ ဆေးလ်ဗားကို အိုးထရက်ဖို့ဒ်ထံ ခေါ်ယူဖို့ ပြောဆိုပြီးပြီဖြစ်ပြီး ကစားသမားရဲ့ အခြေအနေကို သိရဖို့အတွက် ကင်းထောက်တွေ စေလွှတ်ထားတာလည်းဖြစ်ပါတယ်။

ဘောလုံးဆိုင်ရာလုပ်ဆောင်ချက်များကို ဆာဂျင်မ်ရက်ဖ်ကလစ် လွှဲပြောင်းရယူပြီးနောက် ယူနိုက်တက်ဟာ အသင်းကို အလုံးစုံပြောင်းလဲလိုနေတာဖြစ်ပြီး အသင်းရဲ့စတားအချို့ ထွက်ခွာသွားချိန်မှာ ဗဟိုခံစစ်ကိုဖြည့်တင်းလိုနေတာဖြစ်ပါတယ်။ ဆေးလ်ဗားက ၂၀၁၇ခုနှစ်မှာ ဘင်ဖီကာကနေ ယူနိုက်တက်သို့ ပြောင်းလာခဲ့တဲ့ လင်ဒီလော့ဖ်ရဲ့ခြေရာကို နင်းဖွယ်ရှိနေပြီး တစ်နိုင်ငံသားတည်းသားတွေဖြစ်တဲ့ ဖာနန်ဒက်စ်၊ ဒါလော့တို့နှင့်လည်း တွေ့ဆုံရမှာ ဖြစ်ပါတယ်။

ဘိုင်ယန်မြူးနစ်ကလည်း ယူနိုက်တက်ထံကနေ ဆေးလ်ဗားကို ဖြတ်ခေါ်ဖို့ မျှော်လင့်ထားပြီး ကစားသမားကို ဂျာမန်မြေသို့ အရခေါ်ယူလိုနေတာ ဖြစ်ပါတယ်။ ဘွန်ဒက်စ်လီဂါ အသင်းကြီးဟာ ဆေးလ်ဗားရဲ့တိုးတက်မှုတွေကို သဘောကျနေပြီး အပြောင်းရွှေ့စာရင်းထဲမှာ သူ့ကိုထည့်သွင်းထားတယ်လို့ သတင်းတွေအရ သိရပါတယ်။

ဆေးလ်ဗားရဲ့ စာချုပ်ဖျက်သိမ်းခက ယူရိုသန်း ၁၀၀ လောက်ရှိနေသော်လည်း ဘင်ဖီကာအနေနဲ့ ယူရိုသန်း ၇၀ - ၈၀ ကြားဖြင့် ရောင်းချဖွယ်ရှိနေပါတယ်။ ဆေးလ်ဗားဟာ သူ့ရဲ့စီနီယာ ကစားသမားဘဝကို ဘင်ဖီကာနှင့်အတူ ရှိခဲ့တာဖြစ်ပြီး အသင်းရဲ့အကယ်ဒမီထွက် ကစားသမားတစ်ဦးဖြစ်ကာ ၈၁ ပွဲအထိ ကစားပေးထားတာဖြစ်ပါတယ်။

ပြီးခဲ့တဲ့ရာသီက ဘင်ဖီကာကို ထိပ်တန်းဆုဖလား ရရှိအောင် ဆေးလ်ဗားက ကူညီပေးခဲ့ပြီး ပရီးမီးယား လီဂါနဲ့ တစ်နှစ်တာအကောင်းဆုံး အသင်းမှာ ပါဝင်ခဲ့ပါတယ်။ ဘင်ဖီကာနှင့် ၂၀၂၇ ခုနှစ်အထိ စာချုပ်ချုပ်ဆိုထားတဲ့ ဆေးလ်ဗားဟာ ပေါ်တူဂီအသင်းကြီး အတွက် ၇ ကြိမ် ကစားပေးထားပြီး ကာတာမှာ ကျင်းပခဲ့တဲ့ ၂၀၂၂ ကမ္ဘာ့ဖလားမှာ ပါဝင်ခဲ့တာလည်းဖြစ်ပါတယ်။