ဘိုင်ယန်မြူးနစ်အသင်းဟာ ချဲလ်ဆီးတိုက်စစ်မှူး ခရစ္စတိုဖာအန်ကွန်ကူကိုခေါ်ယူဖို့ ချိတ်ဆက်မှုတွေပြုလုပ်နေတယ်လို့ သတင်းတွေထွက်ပေါ်နေပေမယ့် ကလပ်ရဲ့အားကစားဒါရိုက်တာ မက်ဇ်အီဘယ်လ်ကတော့ ယခုဇန်နဝါရီဈေးကွက်အတွင်း ကစားသမားသစ်ခေါ်ယူဖို့မရှိကြောင်း အခိုင်အမာပြောကြားလာခဲ့ပါတယ်။ 

The Athletic ရဲ့ဖော်ပြချက်အရ ချဲလ်ဆီးဟာ ယခုဆောင်းရာသီအပြောင်းအရွှေ့ကာလမှာပဲ အန်ကွန်ကူကိုရောင်းချဖို့ လမ်းဖွင့်ထားပြီး တန်ကြေးအဖြစ် ပေါင် ၆၅ သန်းအထိသတ်မှတ်ထားတယ်လို့သိရပါတယ်။ ချဲလ်ဆီးဟာ ပြင်သစ်သားကို ၂၀၂၃ ခုနှစ်မှာ လိုက်ပ်ဇစ်မှ ပေါင်သန်း ၅၀ နဲ့ခေါ်ယူထားခဲ့တာဖြစ်ပြီး ယခုအခါမှာတော့ ပြန်လည်ရောင်းချကာ ဘဏ္ဍာရေးကိုထိန်းညှိနိုင်ဖို့ ကြိုးစားနေတာဖြစ်ပါတယ်။ 

ကစားသမားကလည်း ယခုရာသီမှာ ချဲလ်ဆီးအတွက် ပုံမှန်ပွဲထွက်ကစားခွင့်မရဘဲ အရန်ကစားသမားအဖြစ်သာပါဝင်နေရတာကြောင့် အသင်းကနေထွက်ခွာလိုနေတာဖြစ်ပါတယ်။ စွယ်စုံရတိုက်စစ်ကစားသမားဟာ နည်းပြသစ် အန်ဇိုမာရက်စ်ကာရဲ့လက်အောက်မှာ ချဲလ်ဆီးအတွက် ပရီးမီးယားလိဂ်ပွဲစဉ် ၃ ပွဲသာ ပွဲထွက်ပါဝင်ကစားခွင့်ရထားပါတယ်။

ပုံမှန်ပွဲထွက်ခွင့်မရပေမယ့် အန်ကွန်ကူဟာ ဒီရာသီချဲလ်ဆီးအတွက် ဂိုးသွင်းအများဆုံးကစားသမားစာရင်းမှာ ပါဝင်နေပြီး ပြိုင်ပွဲစုံ ၁၃ ဂိုးအထိသွင်းယူထားနိုင်ကာ ကိုးလ်ပယ်လ်မာနဲ့ သွင်းဂိုးအရေအတွက်တူညီနေပါတယ်။ ယခုအခါမှာ အန်ကွန်ကူကို ဘိုင်ယန်မြူးနစ်သို့ခေါ်ယူဖို့ရှိမရှိမေးမြန်းခဲ့ရာ အီဘယ်လ်က “ကျွန်တော်တို့မှာ ကစားသမားအရေအတွက်နဲ့ အရည်အသွေးလုံလုံလောက်လောက်ရှိပါတယ်။ ဒီဇန်နဝါရီမှာတော့ ဘယ်ကစားသမားကိုမှ စိတ်မဝင်စားသေးပါဘူး” လို့ဖြေကြားခဲ့ပါတယ်။ 

သတင်းတွေအရ ချဲလ်ဆီးဟာ အန်ကွန်ကူကို ဘိုင်ယန်မြူးနစ် တိုက်စစ်မှူးလေး မာသီစ်တဲလ်နဲ့ အလဲအလှယ်လုပ်ဖို့ရည်ရွယ်ထားတယ်လို့လည်းသိရပါတယ်။ သို့သော်လည်း အဆိုပါသတင်းနဲ့ပတ်သက်ပြီး အီဘယ်လ်က “မာသီစ်တဲလ်က ကျွန်တော်တို့ကစားသမားပါ။ သူ့ကို့အသင်းမှာထားရတာအရမ်းကျေနပ်ပါတယ်” လို့တုံ့ပြန်ပြောကြားခဲ့ပါတယ်။ 

အပြောင်းအရွှေ့ကိစ္စတွေနဲ့ပတ်သက်ပြီး ကောလာဟလတွေတောက်လျှောက်ထွက်ပေါ်နေချိန် တစ်ဖက်မှာချဲလ်ဆီးအသင်းကတော့ ပရီးမီးယားလိဂ်မှာ နိုင်ပွဲပြန်လည်ဖော်ဆောင်နိုင်ဖို့ အာရုံစိုက်သွားရဦးမှာဖြစ်ပါတယ်။ ပရီးမီးယားလိဂ် ၅ ပွဲဆက်တိုက်နိုင်ပွဲပျောက်ဆုံးထားတဲ့ ချဲလ်ဆီးဟာ လာမယ့်တနင်္လာနေ့မှာ ဝုဗ်ကိုအိမ်ကွင်းမှာဧည့်ခံကစားသွားရမှာဖြစ်ပြီး အန်ကွန်ကူတစ်ယောက်ကတော့ အရန်ကစားသမားအဖြစ်ပဲ ဆက်လက်ပါဝင်လာဖို့ရှိနေပါတယ်။