တူချယ်နေရာမှာ အစားထိုးဖို့ အလွန်ဆိုကို နံပတ် ၁ ပစ်မှတ်အဖြစ် ဘိုင်ယန်သတ်မှတ်ထား
ဘိုင်ယန်မြူးနစ်အသင်းဟာ တူချယ်နေရာမှာ အစားထိုးဖို့ လေဗာကူဆင်နည်းပြ အလွန်ဆိုကို ထိပ်တန်းပစ်မှတ်အဖြစ် သတ်မှတ်ထားတယ်လို့ သိရပါတယ်။
ချဲလ်ဆီးနဲ့ ပီအက်စ်ဂျီနည်းပြဟောင်းဟာ ဘိုင်ယန်ကနေ ရာသီအကုန်မှာ ထုတ်ပယ်ခံရဖွယ်ရှိနေပါတယ်။ တူချယ်ဟာ ပြီးခဲ့တဲ့ရာသီတုန်းက ဘိုင်ယန်ကို ပြောင်းလာခဲ့တာဖြစ်ပြီး နာဂယ်စမန်းနေရာမှာ အစားဝင်ခဲ့ကာ ဘွန်ဒက်စ်လီဂါချန်ပီယံဖြစ်အောင် စွမ်းဆောင်ပေးနိုင်ခဲ့ပါတယ်။
ကိန်းရောက်လာမှုနဲ့အတူ ဘိုင်ယန်ဟာ ပြည်တွင်းဆုဖလားတွေကို စိုးမိုးထားနိုင်ရမှာဖြစ်သလို ချန်ပီယံလိဂ်မှာလည်း အောင်မြင်မှုရယူနိုင်ရမှာဖြစ်ပါတယ်။ ခြေစွမ်းကောင်းတွေနဲ့အတူ ဘိုင်ယန်ဟာ ရာသီသစ်စတင်နိုင်ခဲ့ပေမယ့် လေဗာကူဆင်ဟာ အလွန်ဆို လက်အောက်မှာ ခြေစွမ်းကောင်းတွေနဲ့အတူ အမြင့်ပျံတက်လာနိုင်ခဲ့ပြီး ဘိုင်ယန်ကို ၈ မှတ်ဖြတ်ကာ ဦးဆောင်ထားနိုင်ခဲ့ပါတယ်။
ဘိုင်ယန်ဟာ ချန်ပီယံလိဂ်မှာလည်း လာဇီယိုကို ပထမအကျော့မှာ အရေးနိမ့်ထားခဲ့ကာ ဒုတိယအကျော့အတွက် ခက်ခဲတော့မှာဖြစ်ပါတယ်။ အဆိုပါအခြေအနေတွေကြောင့် ဘိုင်ယန်နည်းပြ တူချယ်ရဲ့အနာဂတ်က မသေချာတဲ့အနေအထားဖြစ်လာခဲ့ပါတယ်။ ဘိုင်ယန်အသင်းဘက်ကလည်း မိမိတို့ဟာ နည်းပြသစ်ရှာဖွေနေတယ်လို့ အတည်ပြုခဲ့ပါတယ်။
“ကျွန်တော်တို့ ဆွေးနွေးမှုတွေရှိပြီး နွေရာသီမှာ ၂ ဦးသဘောတူ လမ်းခွဲဖို့ လုပ်ဆောင်နေပါတယ်။ ကျွန်တော်တို့ ရာသီသစ်ကို နည်းပြသစ်နဲ့စတင်ဖို့ လုပ်ဆောင်နေပါတယ်။ အဲ့မတိုင်ခင် အသင်းအနေနဲ့ ချန်ပီယံလိဂ်နဲ့ ဘွန်ဒက်စ်လီဂါမှာ အောင်မြင်မှုရအောင် လုပ်ဆောင်ရပါမယ်။ အသင်းကိုလည်း လမ်းကြောင်းမှန်ပေါ်ပြန်ရောက်အောင် လုပ်ရပါမယ်။ ချန်ပီယံလိဂ်မှာ ၁-၀ နဲ့ လာဇီယိုကို အရေးနိမ့်ထားခဲ့ပါတယ်။ ကွာတားဖိုင်နယ်ကို တက်ရောက်နိုင်ဖို့ ဒုတိယအကျော့က အရေးကြီးပါတယ်”လို့ ဘိုင်ယန်အမှုဆောင် ခရစ္စတီယန်ဒရီဆန်က ပြောကြားခဲ့ပါတယ်။
“ကျွန်တော်တို့ ရာသီအကုန်မှာ ၂ ဦးသဘောတူလမ်းခွဲဖို့ သဘောတူညီမှုရရှိခဲ့ပြီးပါပြီ။ အဲ့မတိုင်ခင် ကျွန်တော့်နည်းပြအဖွဲ့ဝင်တွေနဲ့ ကျွန်တော် အောင်မြင်မှုရအောင် လုပ်ဆောင်မှာပါ”လို့ တူချယ်က ပြောကြားခဲ့ပါတယ်။
စကိုင်းဂျာမနီသတင်းတွေအရ ဘိုင်ယန်ဟာ အလွန်ဆိုကို ခန့်အပ်ဖို့ ချိတ်ဆက်မှုတွေပြုလုပ်ထားပြီးဖြစ်တယ်လို့ ဖော်ပြနေကြပါတယ်။ စပိန်သားကတော့ သူ့အနေနဲ့ လေဗာကူဆင်အတွက်ပဲ အာရုံစိုက်ထားတယ်လို့ ဘိုင်ယန်ကို အသိပေးထားပါတယ်။
ဘိုင်ယန်အနေနဲ့ အလွန်ဆိုကို ခေါ်ယူဖို့ လီဗာပူးအသင်းနဲ့ အားပြိုင်ရဖွယ်ရှိနေပြီး ကလော့ပ်ကလည်း ရာသီအကုန်မှာ အန်ဖီးလ်ကနေ ထွက်ခွာတော့မှာဖြစ်ပါတယ်။ ဘရန့်ဖို့ဒ်နဲ့ပွဲမတိုင်ခင် ကလော့ပ်က ဇာဘီအလွန်ဆိုတစ်ယောက် သူ့အလုပ်သူအကောင်းဆုံးလုပ်ဆောင်နေတယ်လို့ ချီးကျူးပြောကြားခဲ့ပါတယ်။
