ဂါစီယာသည် ၂၀၂၁ ခုနှစ်တွင် အက်စ်ပန်ညိုရဲ့ ပထမအသင်းအတွက် ပွဲဦးထွက် ကစားခဲ့ပြီး ပြီးခဲ့တဲ့ ရာသီနှစ်ခုအတွင်း လာလီဂါရဲ့ အကောင်းဆုံး ဂိုးသမားများထဲမှ တစ်ဦးအဖြစ် ရပ်တည်လာနိုင်ခဲ့ပါတယ်။

အက်စ်ပန်ညိုဟာ ယခုရာသီ နောက်ဆုံးပွဲစဉ်တွင် တန်းဆင်းဇုန်မှ ကပ်၍ လွတ်မြောက်ခဲ့ပြီး ခက်ခဲတဲ့ ရာသီတစ်လျှောက် ဂါစီယာဟာ ကလပ်ရဲ့ ထွန်းတောက်တဲ့ ကြယ်ပွင့် ဖြစ်ခဲ့ပါတယ်။ အသက် ၂၄ နှစ်အရွယ် ဂိုးသမားဟာ စပိန်ထိပ်တန်းလိဂ်ရှိ ဂိုးသမားများထဲတွင် အများဆုံး ဂိုးပေါက်ကာကွယ်မှု (၁၁၇ ကြိမ်) ဖြင့် ရာသီကုန်ဆုံးခဲ့ပြီး တစ်ပွဲလျှင် ပျမ်းမျှ လေးကြိမ်ခန့် ကာကွယ်ခဲ့ပါတယ်။

ပြီးခဲ့တဲ့ နွေရာသီက အာဆင်နယ်ဟာ ဂါစီယာနှင့် ပုဂ္ဂိုလ်ရေးဆိုင်ရာ သဘောတူညီမှု ရရှိခဲ့သော်လည်း ဂန်နာ တို့က အိုလံပစ် ရွှေတံဆိပ်ဆုရှင်အတွက် အက်စ်ပန်ညိုရဲ့ တောင်းဆိုချက်များကို ဖြည့်ဆည်းပေးရန် ငြင်းဆန်ခဲ့ပြီးနောက် အဆိုပြုထားတဲ့ သဘောတူညီချက် ပျက်ပြယ်သွားခဲ့ပါတယ်။

မြောက်လန်ဒန်အခြေစိုက် အသင်းဟာ ဂါစီယာကို စိတ်ဝင်စားနေဆဲ ဖြစ်သော်လည်း ဘာစီလိုနာက နွေရာသီ အပြောင်းအရွှေ့ကာလတွင် မြို့ခံပြိုင်ဘက်ဟောင်းထံမှ ဂိုးသမားကို ခေါ်ယူရန် လျင်မြန်စွာ ချဉ်းကပ်လာနေတယ်လို့ ထင်ရပါတယ်။

စပိန်သတင်းစာ AS ရဲ့ ဖော်ပြချက်အရ ဘာစီလိုနာဟာ ဂါစီယာအတွက် သဘောတူညီချက် ရရှိထားပြီး ကတ္တလန် အင်အားကြီးအသင်းက ကစားသမားအတွက် စာချုပ်ဖျက်သိမ်းခကို ပေးဆောင်ရန် အသင့်ရှိနေကြောင်း ပြောကြားခဲ့ပါတယ်။

ဂါစီယာအတွက် ယူရို ၂၅ သန်း ကုန်ကျမှာဖြစ်ပြီး အကယ်၍ သူ့ကို လူးဝစ်ဒီလာ ဖူရန်တေးက စပိန်ရဲ့ နောက်လာမယ့် နေးရှင်းလိဂ်အသင်းအတွက် ရွေးချယ်ခံရပါက ယူရို ၃၀ သန်းအထိ တိုးမြှင့်နိုင်ဖွယ်ရှိနေပါတယ်။ ဂါစီယာရဲ့ ရည်မှန်းချက်မှာ ပွဲကစားချိန် အာမခံချက် ရရှိရန်ဖြစ်ကြောင်း ပါဝင်ပတ်သက်သူ အားလုံးကို ရှင်းလင်းစွာ ပြောကြားထားတယ်လို့ သတင်းမှာ ဖော်ပြထားပါတယ်။

ဘာစီလိုနာတွင် မာ့ခ်အန်ဒရေ တာစတီဂန် ရှိနေခြင်းကြောင့် ဂါစီယာကို လာမယ့်ရာသီတွင် အခြားသော လာလီဂါအသင်းသို့ အငှားချရန် စိတ်ကူးထားပါတယ်။ ရီးရဲလ်ဘက်တစ် နှင့် ဗလင်စီယာ နှစ်သင်းစလုံးကလည်း ယာယီခေါ်ယူမှု ကိုစိတ်ဝင်စားနေပါတယ်။

ဘာစီလိုနာဟာ ဂါစီယာကို ခေါ်ယူရန် အခွင့်အရေးကို လက်လွတ်ခံလိုခြင်း မရှိဘဲ နူးကမ့် အခြေစိုက် အသင်းကို ယခုရာသီတွင် ဖြစ်နိုင်ခြေရှိတဲ့ ဖလားလေးခုအနက် သုံးခုကို ရယူပေးခဲ့တဲ့ နည်းပြ ဟန်ဆီဖလစ်ခ်ကို ဆက်လက် ပံ့ပိုးရန် ဆုံးဖြတ်ထားတယ်လို့ ပြောထားပါတယ်။

သို့သော်လည်း ဘာစီလိုနာနှင့် ဂါစီယာကို ချိတ်ဆက်နေတဲ့ နောက်ဆုံးသတင်းများအကြောင်း အက်သလက်တစ် ဘီလ်ဘာအိုကို ၃-၀ ဂိုးဖြင့် အနိုင်ရခဲ့ပြီးနောက် မေးမြန်းရာတွင် "ဂျုံး ဂါစီယာလား။ ကျွန်တော့်အသင်းမှာ မရှိတဲ့ ကစားသမားတွေအကြောင်း ကျွန်တော် မပြောလိုပါဘူး" "ကျွန်တော်တို့မှာ အရမ်းကောင်းတဲ့ ဂိုးသမား သုံးယောက် ရှိပြီးသားပါ" လို့ ဖလစ်ခ်က ပြန်ဖြေခဲ့ပါတယ်။

တစ်ချိန်တည်းမှာပင် အက်စ်ပန်ညို နည်းပြချုပ် မာနိုလို ဂွန်ဇာလက်ဇ်က ဂါစီယာဟာ တာစတီဂန်နှင့် ဆက်ဇ်နီ တို့ထံမှ ပြင်းထန်တဲ့ ပြိုင်ဆိုင်မှုကို ရင်ဆိုင်ရမည်ဖြစ်သဖြင့် ဘာစီလိုနာသို့ ပြောင်းရွှေ့ရန် သေချာစွာ စဉ်းစားရန် အကြံပေးခဲ့ပါတယ်။

"သူ့အနေနဲ့ အက်စ်ပန်ညိုအပေါ် ပြင်းပြတဲ့ ခံစားချက်တွေ ရှိတယ်ဆိုတာ ကျွန်တော် သိပါတယ်" လို့ ဂွန်ဇာလက်ဇ်က တနင်္ဂနွေနေ့တွင် သတင်းထောက်များကို ပြောကြားခဲ့ပါတယ်။ "ကျွန်တော် သူ့အတွက် သေချာတော့မသိပါဘူး။ ဒါပေမယ့် သူ ဘာကာကို သွားမယ်ဆိုရင်တော့ ကျွန်တော် အရမ်း အံ့သြမိပါလိမ့်မယ်။ ဘာလို့လဲဆိုတော့ သူတို့မှာ တာစတီဂန် ရှိနေလို့ရယ် သူတို့က ကျွန်တော်တို့ရဲ့ ထာဝရပြိုင်ဘက်တွေ ဖြစ်လို့ရယ်ပါ"

"ကျွန်တော် အရမ်း အံ့သြမိပါလိမ့်မယ်။ ဒါပေမယ့် ကျွန်တော် ဘယ်သူ့စိတ်ထဲမှ မရှိပါဘူး။ သူ ဘာလုပ်မယ်ဆိုတာ ကျွန်တော် မသိပါဘူး။ သူ့ကို ဘာမှ မပြောပါဘူး" လို့ ဂွန်ဇာလက်ဇ်က ထပ်လောင်းပြောကြားခဲ့ပါတယ်။ "တစ်စုံတစ်ယောက်က သူ့ရဲ့ စာချုပ်ဖျက်သိမ်းခကို ပေးပြီး သူ သွားချင်တယ်ဆိုရင်တော့ ကျွန်တော်တို့ ဘာမှ မတတ်နိုင်ပါဘူး"

"ကျွန်တော် သူ့ကို ပြောခဲ့တာကတော့ အရမ်း သေချာစွာ စဉ်းစားဖို့ပါ။ ဘာလို့လဲဆိုတော့ သူ အခု လုပ်ရမှာက ကစားဖို့ပါပဲ" "ကျွန်တော် လိုချင်တာက သူ ပျော်ရွှင်စွာ ကစားနိုင်ပြီး ထိပ်တန်းကစားသမား ဖြစ်နိုင်မယ့် နေရာကို သွားစေချင်တာပါ။ နာမည်ကြောင့် သူ့ကို ကျော်တက်သွားမယ့် ဝါရင့်ဂိုးသမား ရှိတဲ့ နေရာကို သွားစေချင်တာ မဟုတ်ပါဘူး"

"သူ ဆက်ပြီး ကစားသင့်ပါတယ်။ ပွဲထွက်ကစားသမား ဖြစ်သင့်ပါတယ်။ သူ စမတ်ကျကျ ရွေးချယ်မှုတွေ ပြုလုပ်ပြီး နာမည် သို့မဟုတ် ငွေကြေး တစ်ခုတည်းကို မရွေးချယ်ဖို့ မျှော်လင့်ပါတယ်" လို့ သူက ပြောကြားခဲ့ပါတယ်။