ဘာစီလိုနာဟာ ဒီရာသီမှာ အသင်းကိုပုံစံကောင်းရရှိအောင် စွမ်းဆောင်ပြီး အကောင်းဆုံးဦးဆောင်ထားနိုင်တဲ့ နည်းပြ ဟန်ဆီဖလစ်ကို ရာသီကုန်မှာ စာချုပ်သက်တမ်းတိုးမြှင့်ဖို့ ပြင်ဆင်ထားတယ်လို့ သတင်းတွေကဖော်ပြလာခဲ့ပါတယ်။ 

ဖလစ်ရဲ့စာချုပ်သက်တမ်းဟာ ၂၀၂၇ ခုနှစ်အထိကျန်ရှိနေသေးပေမယ့် လာမယ့်ရာသီအစမှာတော့ ၁၂ လသာ ကျန်ရှိတော့မှာဖြစ်လို့ ဘာစီလိုနာအနေနဲ့ ယခုရာသီကုန်မှာပဲ သက်တမ်းတိုးမြှင့်နိုင်ဖို့ ရည်ရွယ်ထားတာဖြစ်ပါတယ်။ ဖလစ်အနေနဲ့လည်း ဘာစီလိုနာမှာဆက်လက်နေထိုင်လိုတာကြောင့် ဆွေးနွေးညှိနှိုင်းမှုတွေ ခက်ခက်ခဲခဲပြုလုပ်စရာမလိုဘဲ သဘောတူညီမှုရရှိမယ်လို့ မျှော်လင့်ရပါတယ်။ တစ်ချိန်တည်းမှာပဲ ဘာစီလိုနာဟာ ဟန်ဆီဖလစ်ရဲ့လစာကို တိုးမြှင့်ပေးချေဖို့ဆန္ဒရှိနေတယ်လို့သိရပါတယ်။ 

ယခုရာသီအစ ဘာစီလိုနာနဲ့ ပထမဆုံးအကြိမ်ချုပ်ဆိုခဲ့တဲ့ ၂ နှစ်သက်တမ်းရှိစာချုပ်မှာတော့ ဂျာမန်သားဟာ တစ်နှစ်ကို ပေါင် ၃.၅ သန်းရရှိသွားမှာဖြစ်ပြီး ချန်ပီယံလိဂ်ဖလားကို ဆွတ်ခူးပေးနိုင်မယ်ဆိုရင်တော့ ဘောနပ်စ် ၁ သန်းထပ်မံရရှိမှာဖြစ်ပါတယ်။ 

ဖလစ်ဟာ ဘာစီလိုနာကို ချစ်ခင်ကြောင်းနဲ့ ဆက်လက်နေထိုင်ဖို့ အလားအလာရှိကြောင်း မကြာခဏပြောကြားထားပေမယ့် ကာလရှည်စာချုပ်ချုပ်ဆိုသွားဖို့တော့ ဆန္ဒရှိမှာမဟုတ်ကြောင်း စပိန်သတင်းတွေက ဖော်ပြထားပါတယ်။ သို့သော်လည်း စာချုပ်သက်တမ်းတိုးဖို့ကိစ္စကိုတော့ သဘောတူညီသွားဖို့ သေချာသလောက်ဖြစ်နေလို့ အနာဂတ်မှာ ဂျာမန်သားကို ဘာစီလိုနာမှာ ဆက်လက်မြင်တွေ့သွားရဦးမှာဖြစ်ပြီး ဒီရာသီမှာလည်း ဆုဖလားတွေ ဘယ်နကြိမ်အထိဆွတ်ခူးသွားနိုင်မလဲ စောင့်ကြည့်ရပါမယ်။