ချဲလ်ဆီးနောက်ခံလူ အက်ဇဲလ်ဒီဆာဆီဟာ ပြိုင်ဘက်ပရီးမီးယားလိဂ်ကလပ် အက်စတွန်ဗီလာသို့ပြောင်းရွှေ့ဖို့ ပုဂ္ဂိုလ်ရေးဆိုင်ရာသဘောတူညီချက်တွေရရှိထားပြီး ယခုအခါမှာတော့ ပြောင်းရွှေ့မှုကို အတည်ပြုဖို့ ကလပ်နှစ်သင်းအကြား ဆွေးနွေးညှိနှိုင်းမှုတွေပြုလုပ်နေတယ်လို့သိရပါတယ်။ 

၂၀၂၃ ခုနှစ်၊ နွေရာသီမှာ စတန်းဖို့ဒ်ဘရစ်ချ်သို့စတင်ရောက်ရှိလာခဲ့တဲ့ ဒီဆာဆီဟာ နည်းပြအန်ဇိုမာရက်စ်ကာလက်အောက်မှာ ပုံမှန်ပွဲထွက်ခွင့်ရဖို့ ရုန်းကန်နေရပြီး ဒီရာသီ ပရီးမီးယားလိဂ်မှာ ချဲလ်ဆီးအတွက် ၄ ပွဲသာပွဲထွက်ပါဝင်ကစားခွင့်ရထားပါတယ်။ ဒါကြောင့် ကစားသမားဟာ ဇန်နဝါရီအပြောင်းအရွှေ့ကာလမှာပဲ ချဲလ်ဆီးမှထွက်ခွာဖို့ပြင်ဆင်ထားခဲ့ကာ ယခုအခါမှာတော့ အက်စတွန်ဗီလာနဲ့ ပုဂ္ဂိုလ်ရေးဆိုင်ရာ သဘောတူညီမှုရရှိထားတယ်လို့ အပြောင်းအရွှေ့ကျွမ်းကျင် ဖာဘရီဇီယိုရိုမာနိုက ဖော်ပြလာခဲ့တာဖြစ်ပါတယ်။ 

ပြင်သစ်ထိပ်သီးကလပ် မိုနာကိုကနေထွက်ခွာလာခဲ့ပြီးကတည်းက ချဲလ်ဆီးမှာရုန်းကန်နေခဲ့ရတဲ့ ဒီဆာဆီအတွက် အက်စတွန်ဗီလာသို့ပြောင်းရွှေ့ခြင်းက မှန်ကန်တဲ့ဆုံးဖြတ်ချက်ဖြစ်လာဖို့ရှိနေပါတယ်။ အက်စတွန်ဗီလလာနည်းပြ အူနိုင်းအမ်မရီအနေနဲ့ နောက်ခံလူ ဒီယေဂိုကားလို့စ်ရဲ့ထွက်ခွာမှုနဲ့ တိုင်ရွန်မင့်စ်ရဲ့ ဒဏ်ရာပြဿနာတို့ကြောင့် အသင်းရဲ့နောက်တန်းပိုင်းကို အင်အားဖြည့်တင်းနိုင်ဖို့ ဆန္ဒရှိနေခဲ့တာလည်းဖြစ်ပါတယ်။ 

ဒေါ့မွန်တိုက်စစ်မှူး ဒွန်ယဲလ်မာလန်ကိုခေါ်ယူပြီး တိုက်စစ်ပိုင်းအင်အားဖြည့်တင်းထားတဲ့ အက်စတွန်ဗီလာဟာ ရီးရဲလ်မက်ဒရစ်၊ ပီအက်စ်ဂျီနဲ့ အယ်လ်နာဆာတို့ရဲ့စိတ်ဝင်စားမှုတွေခံနေရတဲ့ တိုက်စစ်မှူး ဂျွန်ဒူရန်ကိုလည်း အသင်းမှာ ဆက်လက်ထိန်းသိမ်းနိုင်ဖို့ ကြိုးစားနေတယ်လို့သိရပါတယ်။ 

ဆောင်းရာသီအပြောင်းအရွှေ့ဈေးကွက်က လာမယ့်ဖေဖော်ဝါရီလ ၃ ရက်နေ့မှာ ကုန်ဆုံးမှာဖြစ်လို့ ချဲလ်ဆီးနဲ့ အက်စတွန်ဗီလာတို့အနေနဲ့ ဒီဆာဆီရဲ့အပြောင်အရွှေ့အတွက် မကြာမီမှာပဲ သဘောတူညီမှုရရှိဖို့ကြိုးစားသွားရမှာဖြစ်ပါတယ်။လာမယ့်ပရီးမီးယားလိဂ်ပွဲစဉ်မှာတော့ ချဲလ်ဆီးဟာ လန်ဒန်ဒါဘီအဖြစ် ဝက်စ်ဟမ်းနဲ့ယှဉ်ပြိုင်သွားရမှာဖြစ်ပြီး အက်စတွန်ဗီလာကတော့ ချန်ပီယံလိဂ်အုပ်စုအဆင့် နောက်ဆုံးပွဲစဉ်အဖြစ် ဆဲလ်တစ်ကိုအိမ်ကွင်းမှာ ဧည့်ခံကစားသွားရပါမယ်။