အာဆင်နယ်အသင်းဟာ လေဗာကူဆင်နောက်ခံလူ ပီရိုဟင်ကာပီကို ခေါ်ယူဖို့ သဘောတူညီမှုရရှိခဲ့ပါတယ်။ အသက် ၂၃ နှစ်အရွယ် နောက်ခံလူဟာ တစ်ရာသီအငှားစာချုပ်နဲ့ လာရောက်ကစားမှာဖြစ်ပြီး အာဆင်နယ်အသင်းကတော့ နောက်ပိုင်းမှာ ယူရို ၅၂ သန်းနဲ့ အပြီးသတ်ခေါ်ယူခွင့်ရှိမှာပါ။ ကစားသမားကလည်း အာဆင်နယ်အသင်းမှာ ကစားဖို့ သဘောတူညီထားပြီး တော့တင်ဟမ်အသင်းက ခေါ်ယူဖို့ စိတ်ဝင်စားနေပေမဲ့ အာဆင်နယ်ကို ရွေးချယ်ခဲ့တာဖြစ်ပါတယ်။ 

ဟင်ကာပီဟာ ဆေးစစ်မှုခံယူဖို့အတွက် ဒီသီတင်းပတ်ကုန်မှာ လန်ဒန်မြို့ကို ရောက်ရှိလာမှာပါ။ လေဗာကူဆင်အသင်းက ယူရို ၆၀ သန်း ချက်ချင်းပေးချေဖို့ တောင်းဆိုခဲ့ပေမဲ့ အာဆင်နယ် အားကစားဒါရိုက်တာ ဘာတာက အငှားစာချုပ်နဲ့ခေါ်ယူဖို့ သဘောတူညီမှုရရှိအောင် စွမ်းဆောင်နိုင်ခဲ့ပါတယ်။ အာဆင်နယ်အသင်းက ဟင်ကာပီကို အပြီးသတ်ခေါ်ယူမယ်ဆိုရင် ငါးနှစ်သက်တမ်းရှိတဲ့ စာချုပ်ချုပ်ဆိုမှာဖြစ်ပြီး  လေဗာကူဆင်အသင်းကတော့ Sell On Clause ၁၀% ရရှိမှာဖြစ်ပါတယ်။

ဟင်ကာပီဟာ ဗဟိုနောက်ခံလူနဲ့ ဘယ်နောက်ခံလူနေရာတွေမှာ ကစားနိုင်တာကြောင့် အာဆင်နယ်အသင်းအတွက် ခံစစ်မှာ ရွေးချယ်စရာတွေ ပိုမိုရရှိလာမှာပါ။ အာဆင်နယ်အသင်းဟာ ဟင်ကာပီကို ခေါ်ယူနိုင်ရေးအတွက် ကီဝီအောကို ပေါ်တိုအသင်းထံ ရောင်းချခဲ့ပါတယ်။