ဖရန့်ဖတ်ဟာ အာဆင်နယ်ဗဟိုခံစစ်မှူး ဟေးဗန်းအတွက် ဆွေးနွေးမှုများလုပ်နေပါတယ်။ အသက် ၁၈ နှစ်အရွယ် ကစားသမားဟာ အာဆင်နယ်ရဲ့အကယ်ဒမီမှာ အသက် ၁၂ နှစ်ကတည်းက ရှိနေတာဖြစ်ပြီး ပထမဆုံး စီနီယာပွဲဦးထွက်ကို အောက်တိုဘာလတုန်းက ပရက်စတန်နော့အန့်နှင့် ကစားခဲ့တဲ့ ကာရာဘောင်ဖလားမှာ လုပ်နိုင်ခဲ့တာဖြစ်ပါတယ်။ အခုတော့ ဟေးဗန်ဟာ အာဆင်နယ်ပထမအသင်းနှင့် ပုံမှန်လေ့ကျင့်ခန်းဆင်းနေပြီး ဒီရာသီ ပရီးမီးယားလိဂ် ၃ ပွဲမှာ အရန်ကစားသမားအဖြစ် ပါဝင်ခဲ့သော်လည်း ပွဲထွက်ခွင့်တော့ မရရှိသေးပါဘူး။

အာဆင်နယ်ကတော့ အကယ်ဒမီထွက်တွေဖြစ်တဲ့ ဟေးဗန် အပါအဝင် လူးဝစ်စကယ်လီနှင့် ဝမ်နယ်ရီတို့ကိုပါ ထိန်းထားလိုနေတာဖြစ်ပါတယ်။ သို့သော်လည်း ဟေးဗန်းကတော့ အာဆင်နယ်နှင့် ပရော်ဖက်ရှင်နယ်စာချုပ် မချုပ်ရသေးပါဘူး။ သူ့ရဲ့စကောလားရှစ်က နွေရာသီမှာ ကုန်ဆုံးမှာဖြစ်ပါတယ်။သောကြာနေ့မှာတော့ ဖရန့်ဖတ်ရဲ့စီအီးအိုက ဘွန်ဒက်စ်လီဂါကလပ်အနေနဲ့ ဟေးဗန်းကို ချဉ်းကပ်ခဲ့ကြောင်း အတည်ပြုထားပါတယ်။

"ကျွန်တော်တို့က အာဆင်နယ်နှင့် ဆွေးနွေးခဲ့ပါတယ်။ သူ့ကိုခေါ်ယူဖို့ ကျွန်တော်တို့ ကြိုးစားသွားမှာပါ။ သူက တကယ်ကို အလားအလာရှိတဲ့ ကစားသမားပါ။ ကျွန်တော်တို့ အဖြေရှာနိုင်မလားဆိုတာ စောင့်ကြည့်ရမှာပါ" လို့ ဒေါ့မွန်အား ၂-၀ ဂိုးဖြင့် အနိုင်ရရှိခဲ့တဲ့ပွဲစဉ်ပြီးနောက် ဖရန့်ဖတ်ရဲ့ စီအီးအိုက ပြောပါတယ်။