နယူးကာဆယ်ကို ဝင်ဘာလေကွင်းအတွင်း ၂-၁ ဂိုးဖြင့် ရှုံးနိမ့်ခဲ့တဲ့ပွဲစဉ်မှာ လီဗာပူးအသင်းတိုက်စစ်ပိုင်း အားနည်းလွန်းတယ်လို့ အန်းစလော့က ဝမ်းပန်းတနည်းထုတ်ဖော်ပြောဆိုခဲ့ပါတယ်။ ဆက်လက်ပြီး ကြိုးကြာနီနည်းပြက ချန်ပီယံလိဂ်ပြိုင်ပွဲကိုပါ နှုတ်ဆက်ထွက်ခွာခဲ့ရတဲ့ ခက်ခဲတဲ့ရက်သတ္တပတ်တစ်ခုအတွင်း အသင်းကို လမ်းကြောင်းမှန်ပေါ်ဆီ ချက်ချင်းဆိုသလိုဆွဲတင်နိုင်ရေးခွင့်မပြုပေးတဲ့ နိုင်ငံတကာသီတင်းပတ်ကို စိတ်ပျက်မိတယ်လို့ ဝန်ခံပြောဆိုခဲ့ပါတယ်။

အန်းစလော့က အခုဗိုလ်လုပွဲအတွက် တောင်ပံနှစ်ဖက်မှာ မိုဆာလက်၊ လူးဝစ်ဒီယက်ဇ်တို့ကို ခြံရံပြီး ဂျိုတာကို အထောင်တိုက်စစ်မှူးအဖြစ် ပွဲထွက်လာခဲ့ပေမယ့် ပေါ်တူဂီလက်ရွေးစင်ဟာ နယူးကာဆယ်အသင်းခံစစ်ပိုင်းကို ဒုက္ခမပေးနိုင်ခဲ့ပါဘူး။ သူ့နေရာမှာ အစားထိုးဝင်လာတဲ့ ဒါဝင်နူနက်ဇ်လည်း အလားတူပုံစံမျိုးနဲ့ပဲ ဆက်လက်ရုန်းကန်ခဲ့ရပါတယ်။

ဒန်ဘန်း၊ အီဆက်ခ်တို့ရဲ့ဦးဆောင်ဂိုးတွေကို ချေပနိုင်ဖို့ လူစားဝင်ကစားသမားချီယေဆာတစ်ဦးတည်းသာ စွမ်းဆောင်နိုင်ခဲ့ပြီး ကာရာဘောင်းချန်ပီယံဆု ၁၀ ကြိမ်တိုင်တိုင်ရယူထားနိုင်တဲ့  ချန်ပီယံတွေအတွက် ထိုက်တန်တဲ့ရှုံးနိမ့်မှုတစ်ခု ဖြစ်လာခဲ့ပါတယ်။ တဖက်မှာလည်း နယူးကာဆယ်က နှစ်ပေါင်း ၇၀ အကြာမှာ သူတို့ရဲ့ပထမဆုံးပြည်တွင်းဆုဖလားတစ်ခုကို အမိအရကိုင်မြှောက်နိုင်ခဲ့ပါတယ်။

အန်းစလော့က “ ဂျိုတာထက် ခေါင်းတိုက်ပုံပိုကောင်းတဲ့ No.9 တိုက်စစ်မှူးတစ်ဦးထည့်သွင်းပြီး အပြောင်းအလဲအချို့လုပ်သွားဖို့ ကြိုးစားခဲ့ပါတယ်။ ပထမပိုင်းပွဲချိန်အတွင်း အမြင့်ဘောအခိုက်အတန့်အားလုံးနီးပါးမှာ အမြဲလိုလိုအနိုင်ရရှိနေတဲ့ ဒန်ဘန်းလိုခံစစ်မှူးတွေအတွက် ဒါဝင်နူနက်ဇ်က အနည်းငယ်ပိုမိုခက်ခဲစေမယ်လို့ မျှော်လင့်မိပါတယ်။

ဒီပုံစံအတိုင်း ပြိုင်ဘက်ကိုလွှမ်းမိုးဖို့ ကြိုးစားခဲ့ပါတယ်။ ပထမပိုင်းပွဲချိန်အတွင်း မြေပြင်မှာဘောလုံးရှိနေချိန် ကျွန်တော်တို့ တွေးထားတာထက်တောင် အချိန်အနည်းငယ်ပိုရပြီး ပိုမိုကောင်းမွန်တဲ့ဆုံးဖြတ်ချက်တွေ ချမှတ်နိုင်သင့်တဲ့ အခိုက်အတန့်များစွာရှိတယ်ဆိုတာ ကစားသမားတွေကို ပြသခဲ့ပါတယ်။ကျွန်တော်ကိုယ်တိုင်လည်း ပထမပိုင်းပွဲချိန်ပြီးပြီးချင်းမှာ ဒီအချက်ကို ချက်ချင်းဆိုသလို မြင်တွေ့ခဲ့ပါတယ်။ ဒုတိယပိုင်းပွဲချိန်အတွင်းမှာ ကျွန်တော်တို့တွေ ပြိုင်ဘက်ကို အနည်းငယ်ကျော်ဖြတ်ကစားနိုင်ခဲ့ပါတယ်။ အများကြီးတော့ မဟုတ်ပါဘူး၊ အနည်းအကျဉ်းလောက်ပါပဲ”လို့ ပြောပါတယ်။

ချန်ပီယံလိဂ်ပြိုင်ပွဲမှာ ပီအက်စ်ဂျီကို ပယ်နယ်တီအဆုံးအဖြတ်ဖြင့် ရှုံးနိမ့်ခဲ့ပြီးနောက် ရက်ပိုင်းအတွင်းမှာပဲ ခက်ခဲမှုတစ်ခုနဲ့ ရင်ဆိုင်ရခြင်းအပေါ် အန်းစလော့က “နှစ်ပွဲဆက်ရှုံးနိမ့်တယ်ဆိုတာ အသင်းသမိုင်းတလျှောက် ပထမဆုံးအကြိမ်တော့ မဟုတ်ပါဘူး။ ဒါက ဘောလုံးလောကရဲ့အစိတ်အပိုင်းတစ်ရပ်ဖြစ်ပါတယ်။ လီဗာပူးအသင်းဆိုရင်တောင်မှ ဘောလုံးပွဲစဉ်တွေကို ရှုံးနိမ့်နိုင်ပါတယ်။ ဒါက ဖြစ်လေ့ဖြစ်ထရှိပါတယ်။

ကျွန်တော်ကတော့ လာမယ့်သီတင်းပတ်မှာ ပွဲစဉ်တွေဆက်ကစားသွားချင်ပါတယ်။ ဒါပေမယ့် လက်ရှိအခြေအနေတွေအရ ကစားသမားတွေက နှစ်ပွဲထက်မနည်းကစားပေးရနိုင်တဲ့ လက်ရွေးစင်အသင်းတွေနဲ့ ပူးပေါင်းသွားရပါမယ်။ ပြီးရင်တော့ အဲဗာတန်နဲ့ကစားရမယ့်ပွဲစဉ်မတိုင်ခင် သီတင်းတစ်ပတ်ခွဲလောက် အချိန်ရရှိပါမယ်။ အဲဗာတန်ကိုလည်း ကျွန်တော်တို့ရင်ဆိုင်ပြီးပြီဖြစ်လို့ ဒီပွဲစဉ် ဘယ်လောက်အထိခက်ခဲမလဲဆိုတာ ကျွန်တော်တို့ သိကြပါတယ်။ စောင့်ကြည့်သွားကြတာပေါ့”လို့ ပြောပါတယ်။