ရီးရဲလ်မက်ဒရစ်နည်းပြအန်ဆယ်လော့တီက အမှတ်ပေးဇယားအောက်ခြေရှိ လီဂါနက်စ်နဲ့ရင်ဆိုင်ရချိန် သူ့အသင်းမှာ ဟန်ချက်ညီမှုပျောက်ဆုံးပြီး ပွဲကိုထိန်းချုပ်နိုင်ဖို့ ရုန်းကန်ခဲ့ရပေမယ့် မြိုခံပြိုင်ဘက်ကို ၃-၂ ဂိုးဖြင့် တဖန်ပြန်လည်အနိုင်ယူဖို့အတွက် ရင်ဆိုင်တိုက်ပွဲဝင်ခဲ့တဲ့ ကစားသမားတွေရဲ့စိတ်ဓါတ်ပြင်းထန်မှုကိုတော့ ချီးကျူးဂုဏ်ပြုခဲ့ပါတယ်။ အီတာလျံသားက ပထမပိုင်းပွဲချိန်အပြီး ခြေချော်မှုနဲ့အတူ ၂-၁ ဂိုးဖြင့် ရှုံးနိမ့်နေခဲ့ပေမယ့် နိုင်ပွဲတစ်ခုအတွက် ကောင်းမွန်တဲ့စွမ်းဆောင်ရည်တစ်ရပ်ကို သူ့အသင်းကစားသမားတွေ ချပြနိုင်ခဲ့တယ်လို့ ဆိုပါတယ်။

သတင်းထောက်တွေနဲ့တွေ့ဆုံချိန် အန်ဆယ်လော့တီက “ ကျွန်တော်တို့အသင်းကစားပုံ အရမ်းဆိုးရွားတယ်လို့တော့ မထင်ပါဘူး။ ကျွန်တော်တို့ ထိန်းချုပ်ထားနိုင်ခဲ့ပါတယ်။ ဒါပေမယ့် ကျွန်တော်တို့ ပျောက်ဆုံးနေတဲ့အရာကတော့ ဟန်ချက်ညီမှုဖြစ်ပြီး ဒါကြောင့်ပဲ ပြိုင်ဘက်ကို နှစ်ဂိုးပေးလိုက်ရပါတယ်။

ပြိုင်ဘက်က ကျွန်တော်တို့ကို တန်ပြန်တိုက်စစ်တွေနဲ့ ဒုက္ခပေးခဲ့ပါတယ်။ဘောလုံးပိုင်ဆိုင်မှုဆုံးရှုံးချိန်တိုင်း ကျွန်တော်တို့ ဒုက္ခများခဲ့ပါတယ်။ ပိုကောင်းတဲ့ဦးဆောင်မှုမျိုးကိုတောင် ကျွန်တော်တို့ ဖန်တီးနိုင်ခဲ့သင့်တယ်။ ၃-၂ ဂိုးဆိုတဲ့ ရလဒ်ပိုင်းလိုပဲ ကျွန်တော်တို့လည်း ရုန်းကန်ခဲ့ရပြီး နိုင်ငံတကာသီတင်းပတ်အလွန်မှာ ဖြစ်လေ့ဖြစ်ထရှိတဲ့ ကိစ္စမျိုးပါပဲ။ အသင်းလိုက်ဟန်ချက်ရှာဖွေဖို့ အချိန်ယူရပါမယ်”လို့ ပြောပါတယ်။

အခုပွဲစဉ်အတွင်း ရီးရဲလ်မက်ဒရစ်က အမ်ဘာပေရဲ့ပယ်နယ်တီသွင်းဂိုးနဲ့ ဦးဆောင်နိုင်ခဲ့ပေမယ့် ချက်ချင်းဆိုသလိုပဲ လီဂါနက်စ်အတွက် ဒီယေဂိုဂါစီယာက ချေပဂိုးသွင်းယူခဲ့သလို ပထမပိုင်းပွဲချိန်မပြီးဆုံးခင် ဒါနီရာဘာက ဦးဆောင်ဂိုးသွင်းယူခဲ့ပါတယ်။

အန်ဆယ်လော့တီက “ ပယ်နယ်တီအပြီးမှာ ကိစ္စတိုင်းကို အခုထက်ပိုကောင်းအောင် ကိုင်တွယ်နိုင်ခဲ့သင့်တယ်။ အသင်းရဲ့နေရာယူပုံတွေ မကောင်းခဲ့သလို ဂိုးတွေလည်း ခွင့်ပြုပေးခဲ့ရပါတယ်”လို့ ဆိုပါတယ်။ ဒီနေရာမှာ ရီးရဲလ်မက်ဒရစ်အသင်း အာရုံစူးစိုက်မှုကင်းမဲ့နေခြင်းမျိုး လုံးဝမဟုတ်ဘဲ ခက်ခက်ခဲခဲနိုင်ပွဲရရှိမှုက ဘောလုံးအားကစားရဲ့အစိတ်အပိုင်းတစ်ခုသာ ဖြစ်တယ်လို့ အန်ဆယ်လော့တီက ရှင်းပြပါတယ်။

သူက “ ကျွန်တော်တို့မှာ စိတ်အားထက်သန်မှုရှိပါတယ်။ ဒုတိယပိုင်းပွဲချိန်တွေမှာ ကျွန်တော်တို့ ဒီအချက်ကို သက်သေပြခဲ့ပြီး ပွဲကို အလှည့်အပြောင်းဖြစ်အောင် စွမ်းဆောင်နိုင်ခဲ့ပါတယ်။ ဒုက္ခခံဖို့တော့ လိုအပ်ပါတယ်။ ကျွန်တော်တို့ ဒုက္ခမခံရတဲ့ပွဲစဉ်တစ်ခုကို ကျွန်တော်လည်း မမှတ်မိတော့ပါဘူး။အရေးကြီးတာက ဒုက္ခတွေကို မျှဝေခံစားဖို့ပါပဲ။ အတူတူမျှဝေခံစားရင်း အခုလိုနိုင်ပွဲတွေကို ဖန်တီးရပါတယ်။ ဘောလုံးပွဲစဉ်တွေဆိုတာ ဒါပါပဲ။ လွယ်ကူတဲ့ပွဲစဉ်ဆိုတာ မရှိပါဘူး။ ဒါကိုလည်း ကျွန်တော်တို့ အပြည့်အဝနားလည်ထားပါတယ်”လို့ ပြောပါတယ်။

ဆက်လက်ပြီး နည်းပြက စီရော်နယ်ဒိုရဲ့စံချိန်ဖြစ်တဲ့ ဗွေဆော်ဦးဘောလုံးရာသီ၊ ပြိုင်ပွဲစုံသွင်းဂိုး ၃၃ ဂိုးကို သွင်းဂိုးနှစ်ဂိုးနဲ့အတူ အမီလိုက်နိုင်သွားတဲ့ အမ်ဘာပေကိုလည်း ချီးကျူးဂုဏ်ပြုခဲ့ပါတယ်။ ပြင်သစ်အသင်းခေါင်းဆောင်နဲ့ပတ်သက်လို့ အန်ဆယ်လော့တီက “ သူ အကောင်းဆုံးလုပ်ဆောင်ပြနေပါပြီ။ ပိုပြီးတက်ကြွလာသလို ပွဲစဉ်တွေဆီမှာလည်း ပိုပြီး ပါဝင်ပတ်သက်လာပါတယ်။ အမ်ဘာပေက ကောင်းကောင်းအခြေကျသွားပြီး ကျွန်တော်တို့မျှော်လင့်ထားတဲ့အတိုင်း အတိအကျလုပ်ပြနေပါတယ်”လို့ ပြောပါတယ်။

ရီးရဲလ်မက်ဒရစ်က လာမယ့်အင်္ဂါနေ့မှာ ဆိုစီဒက်နဲ့ ကိုပါဒယ်လ်ရေးဆီမီးဖိုင်နယ်ဒုတိယအကျော့အိမ်ကွင်းပွဲစဉ်၊ လာမယ့်စနေ့နေ့မှာ ဗလန်စီယာနဲ့ အိမ်ကွင်းလာလီဂါပွဲစဉ်တွေကို ယှဉ်ပြိုင်ကစားသွားရပါမယ်။ သူတို့တွေက နောက်သီတင်းပတ်အတွင်းမှာတော့ အာဆင်နယ်နဲ့ လန်ဒန်မြေချန်ပီယံလိဂ်ကွာတားဖိုင်နယ်ပထမအကျော့ဆီ ခရီးဆက်ရပါမယ်။