မန်ချက်စတာယူနိုက်တက်နည်းပြ ရူဘင်ဘာအာမိုရင်က ကလပ်ပွဲစဉ်တွေရပ်နားပြီး နိုင်ငံတကာပွဲစဉ်တွေကျင်းပချိန်အတွင်းမှာ အသင်းအနေနဲ့ ဘာတွေလုပ်ဆောင်သွားမယ်ဆိုတာ ထုတ်ဖော်ပြောကြားလာခဲ့ပါတယ်။ ယူနိုက်တက်ဟာ ကလပ်အသင်းပွဲစဉ်တွေကစားရဖို့မရှိပေမယ့် ဒဏ်ရာရကစားသမားတွေနဲ့ပတ်သက်ပြီး အစီအစဉ်တွေပြုလုပ်ထားလို့ အနားရသွားမှာမဟုတ်ဘူးလို့ အာမိုရင်ကဆိုပါတယ်။ 

လန်နီယိုရို၊ လီဆန်ဒရိုမာတီနက်ဇ်၊ လုခ်ရှော၊ ကိုဘီမိုင်နူး၊ မေဆင်မောင့်နဲ့ ဟယ်ရီမက်ဂွါရီတို့အပါအဝင် ယူနိုက်တက်ရဲ့ ကစားသမားအချို့ဟာ ဒဏ်ရာပြဿနာကြုံတွေ့နေရတာကြောင့် လက်ရွေးစင်အသင်းတွေအတွက် ပါဝင်ကစားပေးနိုင်မှာမဟုတ်ဘဲ အသင်းမှာပဲ ဆက်လက်ကျန်ရှိနေခဲ့ကြမှာဖြစ်ပါတယ်။ 

ဒါကြောင့် အာမိုရင်က သူ့အနေနဲ့ အဆိုပါကစားသမားတွေအတွက် အစီအစဉ်တွေပြုလုပ်ထားကြောင်းကို "အသင်းရဲ့နည်းပြတွေအတွက် နားချိန်ရှိမှာမဟုတ်ပါဘူး။ ကျွန်တော်တို့ရဲ့လူစာရင်းကို ခွဲခြမ်းစိတ်ဖြာမှုတွေပြုလုပ်သွားရပါမယ်။မေဆင်မောင့်နဲ့ တိုဘီကိုလီယာတို့လိုကစားသမားတွေအနေနဲ့ ဒီကာလမှာ ကြံ့ခိုင်မှုပြန်လည်တည်ဆောက်သွားရပါမယ်။ ကစားသမားတွေအားလုံး ကြံ့ခိုင်မှုပြန်ရဖို့ ကျွန်တော်တို့ အကူအညီပေးသွားပါမယ်" လို့ပြောကြားခဲ့ပါတယ်။ 

ဆက်လက်ပြီး နိုင်ငံတကာပွဲစဉ်တွေအပြီးမှာ ဟယ်ရီမက်ဂွါရီနဲ့ကိုဘီမိုင်နူးတို့ အဆင့်သင့်ဖြစ်နေစေဖို့ ကြိုးစားသွားမယ့်အကြောင်းကို ပေါ်တူဂီသားနည်းပြက "ဟယ်ရီမက်ဂွါရီနဲ့ ကိုဘီမိုင်နူးတို့ကလည်း နိုင်ငံပွဲစဉ်တွေအပြီးမှာ ပြန်ကစားနိုင်အောင်ကူညီသွားရပါမယ်။ အချို့ကစားသမားတွေကတော့ သာမန်ထက်ပိုပြီးတော့ နားချိန်ရသွားမှာပါ။ နောက်ဆုံးကျန်တဲ့ ၂ လအတွက် ကျွန်တော်တို့ မတူညီတဲ့ကစားသမားတွေနဲ့ အသင်းရဲ့လူစာရင်းကို ခွဲခြမ်းစိတ်ဖြာသွားပါမယ်" လို့ပြောကြားခဲ့ပါတယ်။ 

နိုင်ငံပွဲတွေ ကစားပြီး ကလပ်ပွဲတွေပြန်လည်စတင်ချိန်မှာ ယူနိုက်တက်ဟာ ခက်ခဲတဲ့ပွဲစဉ်တွေအဖြစ် နော်တင်ဟမ်ဖောရက်စ်၊ မန်စီးတီးတို့နဲ့ ၂ ပွဲဆက်တိုက်ယှဉ်ပြိုင်သွားရမှာဖြစ်ပြီး အဆိုပါ ၂ သင်းစလုံးဟာ ဥရောပဝင်ခွင့်အတွက် ယှဉ်ပြိုင်နေကြတဲ့အသင်းတွေဖြစ်ပါတယ်။ အာမိုရင်ရဲ့အသင်းဟာ ယူရိုပါလိဂ်မှာလည်း ကွာတားဖိုင်နယ်အထိ တက်ရောက်ထားနိုင်တာကြောင့် ပွဲစဉ်တွေအများအပြားကစားရဖို့ရှိနေလို့ မေဆင်မောင့်နဲ့ မက်ဂွါရီတို့ကို ပြန်လည်အသုံးပြုနိုင်မယ်ဆိုရင် အသင်းရဲ့လူစာရင်းအတွက် တိုးတက်မှုတွေရှိလာမှာဖြစ်ပါတယ်။