ယူနိုက်တက်နည်းပြ ရူဘင်အာမိုရင်က အက်စတွန်ဗီလာအသင်းအတွက် အက်ဖ်အေဖလားပွဲစဉ်က မာကပ်စ်ရက်ရှ်ဖို့ဒ်ရဲ့ ခြေစွမ်းကောင်းတွေအပေါ် မှတ်ချက်ပေးခဲ့ပါတယ်။ လက်ရှိမှာ ယူနိုက်တက်ကနေ ဗီလာအသင်းကို အငှားနဲ့သွားရောက်ကစားနေတဲ့ ရက်ရှ်ဖို့ဒ်ဟာ တနင်္ဂနွေနေ့က ပရက်စတန်အသင်းကို ၃-၀ ဂိုးနဲ့အနိုင်ရရှိခဲ့တဲ့ အက်ဖ်အေဖလား ဆီမီးဖိုင်နယ်ပွဲစဉ်မှာ အသင်းအတွက် ပထမဆုံး သွင်းဂိုးနှစ်ဂိုးကို သွင်းယူပေးနိုင်ခဲ့ပါတယ်။

ဇန်နဝါရီအပြောင်းအရွှေ့ကာလမှာ အူနိုင်းအမ်မရီရဲ့ အက်စတွန်ဗီလာအသင်းကို အငှားနဲ့ထွက်ခွာခဲ့ပြီးနောက် ရက်ရှ်ဖို့ဒ်ရဲ့ ခြေစွမ်းကောင်းတွေ ဆက်လက်ပေါ်ထွက်လာခဲ့တာဖြစ်ပါတယ်။ သူ့ရဲ့ဂိုးတွေကြောင့် ဗီလာဟာ အက်ဖ်အေဖလား ဆီမီးဖိုင်နယ်မှာ ခရစ္စတယ်ပဲလေ့စ်အသင်းနဲ့ ယှဉ်ပြိုင်ကစားရမှာဖြစ်ပြီး ရက်ရှ်ဖို့ဒ်အတွက် အက်ဖ်အေဖလားဖိုင်နယ်ကို ၃ကြိမ်ဆက် ကစားခွင့်ရဖို့ မျှော်လင့်ချက်တွေရှိနေပါတယ်။ 

ဒါ့အပြင် အက်စတွန်ဗီလာအသင်းဟာ ချန်ပီယံလိဂ်မှာလည်း ဆက်လက်ယှဉ်ပြိုင်နေပြီး လာမယ့်အပတ်မှာ ကွာတားဖိုင်နယ်မှာ  ပီအက်စ်ဂျီနဲ့ ရင်ဆိုင်ရမှာဖြစ်ပါတယ်။ ယူနိုက်တက်နည်းပြ ရူဘင်အာမိုရင်က အိုးထရက်ဖို့ဒ်မှာ တာဝန်ယူပြီး မကြာခင်မှာ ရက်ရှ်ဖို့ဒ်ကို အငှားနဲ့ထွက်ခွာခွင့်ပြုခဲ့တာဖြစ်ပါတယ်။

ရက်ရှ်ဖို့ဒ်ရဲ့ အက်စတွန်ဗီလာအသင်းအတွက် မကြာသေးခင်က စွမ်းဆောင်ရည်နဲ့ပတ်သက်ပြီး မေးမြန်းခဲ့တဲ့အခါ အာမိုရင်က "ကျွန်တော်တို့ကစားရမယ့်ပွဲတွေအများကြီးရှိပြီး ကျွန်တော့်အသင်းနဲ့ ကျွန်တော့်ကစားသမားတွေကိုပဲ အာရုံစိုက်ထားပါတယ်။ ပြီးတော့ ရက်ရှ်ဖို့ဒ်က အခုလောလောဆယ် ကျွန်တော့်ကစားသမားမဟုတ်ပါဘူး။ ဒါပေမဲ့ အငှားနဲ့ထွက်ကစားနေတဲ့ကစားသမားတွေ ခြေစွမ်းပြနိုင်တာက ကျွန်တော်တို့ကလပ်အတွက် သတင်းကောင်းပါပဲ၊ ဒါကြောင့် ကျွန်တော်တို့ဝမ်းသာပါတယ်" လို့ပြောကြားခဲ့ပါတယ်။ ယူနိုက်တက်ဟာ ယနေ့ညမှာ ယခုနှစ်ရာသီ ပရီးမီးယားလိဂ်မှာ ခြေစွာနေတဲ့ နော်တင်ဟမ်ဖောရက်စ်နဲ့ရင်ဆိုင်ရမှာ ဖြစ်ပါတယ်။