မန်ချက်စတာစီးတီးနောက်ခံလူ မန်နူရယ်အကန်ဂျီက ချန်ပီယံလိဂ် ပလေးအော့ဖ်အဆင့်မှာ ပြိုင်ပွဲရဲ့ အစဉ်အလာကြီးတဲ့အသင်းတွေဖြစ်တဲ့ ရီးရဲလ်မက်ဒရစ် ဒါမှမဟုတ် ဘိုင်ယန်မြူးနစ်နဲ့ရင်ဆိုင်သွားဖို့ အဆင်သင့်ရှိနေကြောင်း ဖွင့်ဟပြောကြားလာခဲ့ပါတယ်။ ဗုဒ္ဓဟူးနေ့ကယှဉ်ပြိုင်ခဲ့တဲ့ ချန်ပီယံလိဂ်ပွဲစဉ်မှာ ကလပ်ဘရုကို ၃-၁ နဲ့အနိုင်ရခဲ့ပြီး မန်စီးတီးဟာ ချန်ပီယံအမှတ်ပေးဇယားရဲ့ အဆင့် ၂၂ နေရာမှာရပ်တည်နိုင်ခဲ့တာကြောင့် ရှုံးထွက် ၁၆ သင်းအဆင့်ကို တက်လှမ်းနိုင်ဖို့ ပလေးအော့ဖ်ပွဲစဉ် ၂ ပွဲ ကစားသွားရမှာဖြစ်ပါတယ်။ 

မန်စီးတီးဟာ ဘိုင်ယန်မြူးနစ်နဲ့ ရီးရဲလ်မက်ဒရစ်တို့ ထိပ်သီးအသင်း ၂ သင်းမှ ၁ သင်းနဲ့ရင်ဆိုင်သွားရမှာဖြစ်ပြီး အနိုင်ရမှသာ ၁၆ သင်းအဆင့်ကို တက်လှမ်းနိုင်မှာဖြစ်ပါတယ်။ အခုလို မန်စီးတီးအနေနဲ့ ချန်ပီယ့လိဂ်ရှုံးထွက်အဆင့်ကို တိုက်ရိုက်တက်ရောက်ဖို့ ပျက်ကွက်ခဲ့ခြင်းမှာ ၂၀၁၂-၁၃ ရာသီနောက်ပိုင်း ပထမဆုံးအကြိမ်လည်းဖြစ်ပါတယ်။ 

သို့သော်လည်း ရီးရဲလ်မက်ဒရစ်၊ ဘိုင်ယန်မြူးနစ်တို့နဲ့ရင်ဆိုင်သွားဖို့ ယုံကြည်ချက်ရှိနေကြောင်းကို အကန်ဂျီက “ကျွန်တော်တို့ သေချာပေါက် အဆင်သင့်ဖြစ်နေပါပြီ။ ရီးရဲလ်မက်ဒရစ်နဲ့ ဘိုင်ယန်မြူးနစ်တို့က ဘယ်အသင်းမှ ရင်မဆိုင်ချင်တဲ့အသင်းတွေဖြစ်ပေမယ့် ကျွန်တော်တို့ကတော့ ဥရောပက ဘယ်အသင်းကိုမဆို အနိုင်ယူနိုင်တယ်လို့ ယုံကြည်ပါတယ်”

“လက်ရှိပြိုင်ပွဲမှာ ကျွန်တော်တို့ အရင်လိုပုံစံတိုင်း မကစားထားနိုင်ခဲ့ပေမယ့် ဘယ်အသင်းမှ ကျွန်တော်တို့နဲ့ ရင်မဆိုင်ချင်ဘူးဆိုတာ ကျွန်တော်ခံစားမိနေပါသေးတယ်။ ဘိုင်ယန်နဲ့ ရီးရဲလ်မက်ဒရစ်တို့ ဘာတွေတွေးနေကြမလဲမသိပေမယ့် ကျွန်တော်တို့ကတော့ စိန်ခေါ်မှုအတွက် ရယ်ဒီဖြစ်နေပါပြီ” လို့ ပြောကြားခဲ့ပါတယ်။ 

မန်စီးတီးဟာ ယခုနှစ်ရာသီ ချန်ပီယံလိဂ်ဆုဖလားကိုဆွတ်ခူးနိုင်ဖို့ ပြိုင်ပွဲမတိုင်မီမှာ ရေပန်းစားခဲ့သေးပေမယ့် ပြိုင်ပွဲအတွင်းမှာတော့ နိုင်ပွဲ ၃ ပွဲသာရခဲ့ပြီး အုပ်စုအမှတ်ပေးဇယားရဲ့ အဆင့် ၂၂ နေရာမှာသာရပ်တည်နိုင်ခဲ့ပါတယ်။ ဆက်လက်ပြီး အကန်ဂျီက “ပလေးအော့ဖ်အဆင့်ကို ရောက်ခဲ့လို့ ဝမ်းသာပါတယ်။ ဒါပေမယ့် ကျွန်တော်တို့က ထိပ်ဆုံး ၈ သင်းစာရင်းမှာ ပါဝင်ချင်ခဲ့တာပါ။ အခုလိုအခြေအနေက ခက်ခဲပေမယ့် ပလေးအော့ဖ်ကိုတော့ ရောက်အောင်စွမ်းဆောင်နိုင်ခဲ့ပါတယ်။ ကျွန်တော်တို့လိုချင်တဲ့ရလဒ်တွေ မဖြစ်ခဲ့ပေမယ့် လာမယ့်ပွဲစဉ်တွေမှာတော့ နိုင်ပွဲရရှိအောင်ကြိုးစားသွားပါမယ်” လို့ပြောကြားခဲ့ပါတယ်။ 

ချန်ပီယံလိဂ်မှာ ရုန်းကန်နေရတဲ့ မန်စီးတီးဟာ တစ်ချိန်တည်းမှာပဲ ပရီးမီးယားလိဂ်မှာလည်း ရလဒ်ဆိုးတွေနဲ့တောက်လျှောက်ကြုံတွေ့ထားခဲ့တာဖြစ်ပါတယ်။ လာမယ့် တနင်္ဂနွေနေ့မှာတော့ မန်စီးတီးဟာ ခက်ခဲတဲ့ပရီးမီးယားလိဂ်ပွဲစဉ်အဖြစ် အာဆင်နယ်ကို အဝေးကွင်းမှာ သွားရောက်ရင်ဆိုင်ရပါမယ်။