အခုနိုင်ငံတကာသီတင်းပတ်ကာလအတွင်း အင်္ဂလန်အသင်းအတွက် ခြေစွမ်းပြသခဲ့သူတွေအနက် ဘယ်လင်ဟမ်လည်း ပါဝင်ပြီး ခရိုအေးရှားကို ခုနစ်ဂိုးပြတ်အနိုင်ယူခဲ့တဲ့ပွဲစဉ်မှာလည်း နောက်တစ်ကြိမ် ထပ်မံတောက်ပခဲ့ပါတယ်။

ဒါက နည်းပြမော်ရင်ဟိုရဲ့ဦးဆောင်မှုအောက်၊ ပိုမိုတက်ကြွလန်းဆန်းလာခဲ့ပုံရတဲ့ ဒီအင်္ဂလန်ကစားသမားရဲ့ ရီးရဲလ်မက်ဒရစ်မှာပြသထားတဲ့ ခြေစွမ်းကောင်းတွေကို ဆက်လလက်ထိန်းသိမ်းထားနိုင်မှု ဖြစ်ပါတယ်။

ဘောလုံးပရိသတ်အများစုကလည်း ဘယ်လင်ဟမ်မှာ ရီးရဲလ်မက်ဒရစ်ကစားသမားဘ၀ပွဲဦးထွက်ဘောလုံးရာသီခြေစွမ်းမျိုး ပြန်လည်ရရှိနေပြီလို့ ယုံကြည်နေပါတယ်။ အခုတော့ အင်္ဂလန်ကြယ်ပွင့်အတွက် တိုနီခရူးစ်ရဲ့အသိအမှတ်ပြုထောက်ခံမှု ထွက်ပေါ်လာပါပြီ။

တိုနီခရူးစ်ရဲ့ 'Kroos & Kroos' အစီအစဉ်မှာ ရီးရဲလ်မက်ဒရစ်ကစားသမားဟောင်းက သူ့ရဲ့ အသင်းဖော်ဟောင်းကို အားပါးတရချီးကျူးဂုဏ်ပြုခဲ့ပါတယ်။

"ကျွန်တော့်အတွက်တော့ ဘယ်လင်ဂမ်ဆိုတာ ပြီးပြည့်စုံမှုအရှိဆုံး ကွင်းလယ်ကစားသမားတွေအနက် တစ်ဦး ဖြစ်ပါတယ်။ သူသာ အကောင်းဆုံးပုံစံမှာရှိနေရင် ကမ္ဘာ့အကောင်းဆုံးကွင်းလယ်ကစားသမား ဖြစ်လိမ့်မယ်လို့ ယူဆမိသလို ကမ္ဘာ့အကောင်းဆုံးကွင်းလယ်ကစားသမားလည်း ဖြစ်လာနိုင်ပါတယ်" လို့ တိုနီခရူးစ်က ပြောပါတယ်။

ဘယ်လင်ဟမ်နဲ့ တိုနီခရူးစ်တို့က ၂၀၂၃-၂၀၂၄ ဘောလုံးရာသီ၊ ရီးရဲလ်မက်ဒရစ်အသင်းရဲ့ လာလီဂါ၊ ချန်ပီယံလိဂ်နဲ့ စူပါဖလားအောင်ပွဲတွေမှာ အတူလက်တွဲပါဝင်ခဲ့ဖူးပါတယ်။

ဆက်လက်ပြီး မိခင်နိုင်ငံမှာ ဘယ်လင်ဟမ် မကြာခဏတွေ့ကြုံရလေ့ရှိတဲ့ ဝေဖန်မှုတွေနဲ့ပတ်သက်လို့ အသင်းဖော်ဟောင်းရဲ့ အရည်အသွေးအစစ်အမှန်ကို မထင်ဟပ်စေနိုင်ဘူးလို့ တိုနီခရူးစ်က ထောက်ပြခဲ့ပါတယ်။

သူက "မိခင်နိုင်ငံမှာ ကစားသမားတွေဆိုတာ တခါတလေ ဝေဖန်ခံရမှု အများဆုံးဖြစ်လေ့ရှိတယ်ဆိုတာ ကျွန်တော်သိပါတယ်" လို့ ရှင်းပြခဲ့ပါတယ်။