ဆန်းဒါးလန်းနည်းပြ ရက်ဂျစ်လီဘရစ်က ဂရာနစ်ဇာခါ ချဲလ်ဆီးကို ပြောင်းရွှေ့မယ်ဆိုတဲ့ သတင်းတွေနဲ့ပတ်သက်ပြီး 'ဒီကိစ္စက အဆုံးသတ်သွားပါပြီ' လို့ ပြောကြားကာ အပြီးတိုင် ရပ်တန့်လိုက်ပါတယ်။

အသက် ၃၃ နှစ်အရွယ် ဇာခါကို ချဲလ်ဆီးအသင်းရဲ့ နည်းပြသစ် ဇာဘီအလွန်ဆိုရဲ့ တောင်းဆိုချက်အရ နွေရာသီအစောပိုင်းမှာ ပေါင် ၈ သန်းနဲ့ ကမ်းလှမ်းခဲ့တာ ဖြစ်ပါတယ်။ ဆန်းဒါးလန်းအသင်းကတော့ ဒီကမ်းလှမ်းမှုကို 'စော်ကားရာရောက်တယ်' လို့ သတ်မှတ်ပြီး ချက်ချင်း ငြင်းပယ်ခဲ့သလို ဂျာကာကိုယ်တိုင်ကလည်း အသင်းမှာ ဆက်ရှိနေမယ်ဆိုတာကို ထပ်လောင်း အတည်ပြုခဲ့ပါတယ်။

ဇာခါဟာ ၂၀၂၈ ခုနှစ်အထိ အသင်းနဲ့ စာချုပ်သက်တမ်းရှိနေသူဖြစ်ပြီး ပြီးခဲ့တဲ့ရာသီက ဆန်းဒါးလန်းအသင်း ဥရောပပြိုင်ပွဲ ဝင်ခွင့်ရအောင် ကူညီပေးရာမှာ အဓိကနေရာက ပါဝင်ခဲ့ပါတယ်။ သူဟာ လိဂ်ပွဲ ၃၄ ပွဲ ကစားခဲ့ပြီး ၁ ဂိုးသွင်းကာ ဂိုးဖန်တီးမှု ၆ ကြိမ် ပြုလုပ်နိုင်ခဲ့သူလည်း ဖြစ်ပါတယ်။

လီဗာပူးကို ၄-၂ ဂိုးနဲ့ ရှုံးနိမ့်ခဲ့တဲ့ ရာသီကြိုခြေစမ်းပွဲအပြီးမှာ သတင်းထောက်တွေကို ပြောကြားခဲ့တာဖြစ်ပြီး ဇာခါအနေနဲ့ သူ့ရဲ့နည်းပြဟောင်းဆီကို သွားရောက်ပူးပေါင်းတော့မှာ မဟုတ်ဘူးလို့ လီဘရစ်က အတည်ပြုခဲ့ပါတယ်။ "မဟုတ်ပါဘူး၊ ဒီကိစ္စက အဆုံးသတ်သွားပါပြီ။ သူက သူ့ရဲ့အနာဂတ်နဲ့ပတ်သက်ပြီး ရှင်းရှင်းလင်းလင်း ပြောထားပြီးသားပါ။ သူ ဆန်းဒါးလန်းကို ချစ်တယ်၊ ဒီမှာပဲ ဆက်နေချင်တယ်။ သူက ဆန်းဒါးလန်းရဲ့ အနာဂတ်ကို တည်ဆောက်ချင်နေတာပါ။ သူဟာ ကပ္ပတိန်ကောင်းတစ်ယောက်ဖြစ်သလို ခေါင်းဆောင်ကောင်းတစ်ယောက်လည်း ဖြစ်ပါတယ်" လို့ ၎င်းက ဆိုပါတယ်။

ဒါ့အပြင် ဆန်းဒါးလန်းအသင်းအတွက် ဒီနွေရာသီဟာ တိတ်ဆိတ်တဲ့ နွေရာသီဖြစ်လာလိမ့်မယ်လို့လည်း လီဘရစ်က ခန့်မှန်းထားပြီး "ဒီနွေရာသီကတော့ အေးအေးဆေးဆေးပဲ ဖြစ်မှာပါ။ ဘာသတင်းမှ သိပ်ထွက်လာမှာမဟုတ်ဘူး၊ ဟုတ်တယ်မလား။ ကျွန်တော် ဘာသတင်းအချက်အလက်မှ ပေးမှာမဟုတ်ပါဘူး။ ဘာဖြစ်လို့လဲဆိုတော့ ကျွန်တော်တို့ ကွယ်ရာမှာ အလုပ်တွေ အများကြီး လုပ်နေလို့ပါ။ အေးအေးဆေးဆေးရှိဖို့က အရမ်းအရေးကြီးပါတယ်၊ မဟုတ်ရင် ရှုပ်ထွေးသွားနိုင်လို့ပါ။ ပြီးခဲ့တဲ့ရာသီနဲ့ ယှဉ်ရင်တော့ အပြောင်းအရွှေ့ကာလက ကွာခြားသွားပါလိမ့်မယ်။ မနှစ်ကတော့ ကစားသမားသစ် ၁၄ ယောက်လောက် ခေါ်ခဲ့ရတယ်။ ဒီနှစ်မှာတော့ အဲဒီလိုမျိုး ဖြစ်လာမှာ မဟုတ်ပါဘူး။ ဘာတွေဖြစ်လာမလဲဆိုတာ စောင့်ကြည့်ရမှာပါ" လို့ ထပ်လောင်း ပြောကြားခဲ့ပါတယ်။