တနင်္လာနေ့မှာ ပါရာဂွေးအသင်းကို ရှုံးနိမ့်ပြီး ကမ္ဘာ့ဖလားပြိုင်ပွဲမှ စိတ်ပျက်ဖွယ်ထွက်ခွာလာရပြီးနောက် နည်းပြဂျူလီယန်နာဂယ်စ်မန်းနဲ့ အင်္ဂါနေ့မှာပြုလုပ်ဖို့ စီစဉ်ထားတဲ့ သတင်းစာရှင်းလင်းပွဲကို ဂျာမနီဘောလုံးအဖွဲ့ချုပ် ဖျက်သိမ်းလိုက်တယ်လို့ သိရပါတယ်။

Sport1 သတင်းဌာနရဲ့ဖော်ပြချက်အရ ဂျာမနီဘောလုံးအဖွဲ့ချုပ်က ဒီသတင်းစာရှင်းလင်းပွဲကို မပြုလုပ်ဖို့ ဆုံးဖြတ်ခဲ့တယ်လို့ သိရပါတယ်။

ဒီသတင်းစာရှင်းလင်းပွဲဖျက်သိမ်းလိုက်ခြင်းကြောင့် ဂျာမနီအသင်းကစားသမားတွေက အင်္ဂါနေ့မှာပဲ နေရပ်ဆီ လေကြောင်းခရီးစဉ်ပြန်လာကြပြီး အားလပ်ရက်ခံစားသွားရပါလိမ့်မယ်။

သတင်းစာရှင်းလင်းပွဲမပြုလုပ်တော့ပေမဲ့ နာဂယ်စ်မန်းနဲ့ ဂျာမနီဘောလုံးအဖွဲ့ချုပ်တို့က လက်ရှိအခြေအနေကို အခြားနည်းလမ်းတွေမှတစ်ဆင့် ရှင်းပြဖို့ စီစဉ်ထားတယ်လို့ သိရပါတယ်။ ဒါပေမဲ့ ဘယ်လိုပုံစံမျိုးနဲ့ ရှင်းပြမလဲဆိုတာကိုတော့ အတိအကျ မသိရသေးပါဘူး။

အခုလိုသတင်းစာရှင်းလင်းပွဲဖျက်သိမ်းလိုက်မှုကြောင့် နာဂယ်စ်မန်းရဲ့အနာဂတ်နဲ့ပတ်သက်ပြီး ခန့်မှန်းပြောဆိုမှုတွေ ပိုမိုများပြားလာပါတယ်။

ပါရာဂွေးကို ရှုံးပြီးနောက် အသက် ၃၈ နှစ်အရွယ်နည်းပြနာဂယ်စ်မန်းက ဂျာမနီဘောလုံးအဖွဲ့ချုပ်ရဲ့ဆန္ဒရှိနေရသရွေ့ လက်ရွေးစင်အသင်းနည်းပြအဖြစ် ဆက်ရှိနေချင်တယ်လို့ ပြောထားပါတယ်။ သူ့ရဲ့စာချုပ်သက်တမ်းကလည်း ၂၀၂၈ ခုနှစ်အထိ ရှိနေပြန်ပါတယ်။