ကမ္ဘာ့ဖလားပြိုင်ပွဲမှာ ဆွီဒင်အသင်းနဲ့အတူ ခြေစွမ်းပြသနိုင်ခဲ့ပြီးနောက် အီဆက်ခ်က အကောင်းဆုံး ပုံစံကောင်း ရရှိနေပြီလို့ ဝန်ခံပြောကြားခဲ့ပါတယ်။

နယူးကာဆယ်ယူနိုက်တက်မှ ပေါင် ၁၂၅ သန်းဖြင့် ပြောင်းရွှေ့လာပြီးနောက် လီဗာပူးအသင်းမှာ အီဆက်ခ်ရဲ့လှုပ်ရှားမှုတိုင်းကို မာဆေးဆိုဒ်ပရိသတ်တွေနဲ့ ဝေဖန်သူတွေ အနီးကပ်စောင့်ကြည့်နေခဲ့ကြပါတယ်။

အသက် ၂၆ နှစ်အရွယ်ကစားသမားက ဗြိတိန်စံချိန်တင်ပြောင်းရွှေ့ကြေးနဲ့ ပြောင်းရွှေ့လာခဲ့ပြီးနောက် ဒဏ်ရာပြဿနာတွေ ဆက်တိုက်ကြုံတွေ့ခဲ့ပြီး ကြံ့ခိုင်မှုအပြည့်အဝရရှိဖို့ ရုန်းကန်ခဲ့ရလို့ ပြိုင်ပွဲစုံ ၂၂ ပွဲ ကစားခဲ့ရာမှာ လေးဂိုးသာ သွင်းယူနိုင်ခဲ့ပါတယ်။

ဆွီဒင်အသင်းရုန်းကန်နေရပေမဲ့လည်း အီဆက်ခ်ကတော့ တူနီးရှားကို ၅-၁ ဂိုးဖြင့် ဂိုးပြတ်အနိုင်ရရှိခဲ့တဲ့ပွဲစဉ်မှာ သူ့ရဲ့ ပထမဆုံးသောကမ္ဘာ့ဖလားသွင်းဂိုးကို ရယူနိုင်ခဲ့ပြီး ပြိုင်ပွဲတစ်လျှောက်လုံးမှာလည်း ခြေစွမ်းပြသနိုင်ခဲ့ပါတယ်။

ကမ္ဘာ့ဖလားပြိုင်ပွဲ၊ ၃၂-သင်းရှုံးထွက်အဆင့်ဆီ ဆွီဒင်အသင်း တက်လှမ်းလာချိန် လီဗာပူးတိုက်စစ်မှူးက သူ့ရဲ့ကြံ့ခိုင်မှုနဲ့ ခြေစွမ်းပိုင်းအပေါ် အပေါင်းလက္ခဏာဆောင်တဲ့သတင်းစကား ပေးပို့လာခဲ့ပါတယ်။

"ကလပ်အသင်းနဲ့ နိုင်ငံလက်ရွေးစင်အသင်းဆိုတာ တကယ်ကို ကွဲပြားခြားနားတဲ့ အရာနှစ်ခုပါ။ နိုင်ငံလက်ရွေးစင်အသင်းဆီ ကျွန်တော်ပူးပေါင်းချိန်မှာ ဆွီဒင်နဲ့ ကမ္ဘာ့ဖလားပြိုင်ပွဲအကြောင်းမှလွဲရင် အခြားဘာကိုမှ စိတ်ထဲမှာ မထည့်ထားပါဘူး။" လို့ အီဆက်ခ်က ပြောကြားခဲ့ပါတယ်။ 

"ကမ္ဘာ့ဖလားမှာ အကောင်းဆုံး ကစားနိုင်တယ်ဆိုတာ တကယ်ကောင်းပါတယ်။ အမြဲတမ်းလည်း ပိုကောင်းအောင် လုပ်ဆောင်ချင်တယ်ဆိုတာ သဘာ၀ကျပါတယ်။ လက်ရှိမှာ ကျွန်တော်က ကောင်းမွန်တဲ့အခြေအနေမှာ ရှိနေတယ်လို့ ခံစားရပြီး ရှေ့လျှောက် ဆက်လက်ခြေစွမ်းပြနိုင်ဖို့ မျှော်လင့်ပါတယ်။"

"အခု ကျွန်တော် အဆင်ပြေပါတယ်၊ တကယ်အဆင်ပြေပါတယ်။ ဒါပေမဲ့ ခင်ဗျားရဲ့အမြင့်မားဆုံးစွမ်းဆောင်ရည် ဘယ်လောက်လဲဆိုတာ တိတိကျကျသတ်မှတ်ဖို့ ခက်ခဲပြီး ဒါကို ဘယ်တော့မှ အတိအကျ မသိနိုင်ပါဘူး။ ဒါပေမဲ့ လက်ရှိမှာတော့ ကျွန်တော့်ရဲ့ရုပ်ပိုင်းဆိုင်ရာကြံ့ခိုင်မှုနဲ့ပတ်သက်ပြီး ပြောစရာ မရှိပါဘူး" လို့ သူက ဆိုပါတယ်။

အီဆက်ခ်ရဲ့ကြံ့ခိုင်မှုပိုင်း အခုလိုပြန်လည်ကောင်းမွန်လာလို့ ဒီနှစ်၊ ဘောက်ဆင်ဒေးကာလအထိ တိုက်စစ်မှူးဟူဂိုအီကီတီကီကို လက်လွှတ်ရမယ့် လီဗာပူးအတွက် အဖိုးတန်အားသာချက်တစ်ခု ဖြစ်လာနိုင်ပါတယ်။